1 Korintobi 2 - Somi He Ɔ

Kristo ngɛ seumi tso ɔ nɔ he sane

¹ Imi hu, mamimɛ, benɛ i ba nyɛ ngɔ ɔ, pi nyamitsɔmi loo nilemi fuu nɛ i kɛ ba ba jaje Mawu laami sane ɔ tsɔɔ nyɛ;

² ejakaa i to we imi nitsɛ ye yi mi kaa ma le nɔ ko ngɛ nyɛ kpɛti, kaa ja Yesu Kristo, nɔ nɛ a sɛu ɔ.

³ Nɛ i kɛ nyɛ hi si ngɛ gbɔjɔmi kɛ gbeyeyemi kɛ hedomi babauu mi;

⁴ nɛ ye munyu kɛ ye sanefiɛmi ɔ hu ji nimli a nilemi munyuhi nɛ plɛɛ nɔ yi mi mi, se mohu e je mumi kɛ hewami tsɔɔmi mi,

⁵ benɛ pee nɛ nyɛ hemi kɛ yemi ɔ ko da nimli a nilemi nɔ, se mohu e da Mawu hewami nɔ.

Mawu nilemi

⁶ Se kɛ ɔ, wa tuɔ nilemi munyu ngɛ ninɛmɛ nɛ a hi kɛ pi si ɔmɛ a kpɛti, se tsa pi je nɔ mi nilemi aloo je nɔ mi nikɔtɔmahi nɛ bee kɛ yaa amɛ a nɔ ʼi;

⁷ se mohu Mawu nilemi nɛ a kɛ laa ngɛ laami sane mi ɔ wa deɔ, nɔ nɛ Mawu dla to ha wa hɛminyamiwomi loko a bɔ je ɔ,

⁸ nɔ nɛ je nɔ mi nikɔtɔma amɛ a ti nɔ ko nɔ ko li ɔ; ejakaa a le jinɛ a be hɛminyami Nyɔmtsɛ ɔ sɛue.

⁹ Se kaa bɔ nɛ pa ngma a: “Nihi nɛ hɛngmɛ nɛ, nɛ tue hu nui, Nɛ e bɛ nɔmlɔ ko tsui mi hyɛ Ji nihi nɛ Mawu dla ngɔ to nihi nɛ suɔ lɛ ɔ.”

¹⁰ Se wɔɔ lɛɛ, Mawu gu E mumi ɔ nɔ je kpo ngɔ tsɔɔ wɔ; ejakaa Mumi ɔ hlaa nihi kulaa mi, Mawu nihi nɛ mi kuɔ tete.

¹¹ Se nimli a kpɛti mɛnɔ le nihi nɛ ngɛ nɔmlɔ mi, kaa ja nɔmlɔ ɔ mumi nɛ ngɛ e mi ɔ? Ja nɔuu kɛ̃ Mawu mi ni ɔmɛ hu nɔ ko nɔ ko li, kaa ja Mawu mumi ɔ.

¹² Wɔɔ lɛɛ, pi je nɔ mi mumi ɔ nɛ wa na, se mohu mumi nɛ je Mawu mi ɔ, konɛ waa le nihi nɛ Mawu kɛ dloo wɔ ɔ.

¹³ Kɔlɔɔmɛ hu wa deɔ, pi nimli a nilemi munyuhi nɛ waa kɛ deɔ, se mohu munyuhi nɛ Mumi ɔ tsɔɔ ɔ, nɛ waa kɛ mumi mi nihi toɔ mumi mi nihi a he.

¹⁴ Se nɔmlɔ su nɛ a kɛ fɔ lɛ ɔ he we Mawu Mumi ɔ ni ɔmɛ; ejakaa e peɔ lɛ kaa kuasiahi a sane ʼi, nɛ e nɛ́ nya, ejaka mumi a kɛ hlaa nya.

¹⁵ Mumi mi nɔmlɔ ɔ kojoɔ nihi kulaa, se lɛɛ, nɔ ko nɔ ko kojo we lɛ.

¹⁶ “Ejakaa mɛnɔ lɛ le Nyɔmtsɛ ɔ juɛmi, nɛ e maa tsɔɔ lɛ ni?” Se wɔɔ lɛɛ wa hɛɛ Kristo juɛmi.