1 Korintobi 16 - Somi He Ɔ

Oniatsumi kɛ ha Yerusalem asafo ɔ

¹ Jehanɛ ngɛ onia nɛ a tsuɔ kɛ haa Mawu webi ɔmɛ a he ɔ, kaa bɔ nɛ i to ha Galatia asafo ɔmɛ ɔ, nyɛ hu nyɛɛ pee ja.

² Daa otsi kekleekle ligbi ɔ nɔ ɔ, nyɛ ti nɔ tsuaa nɔ nɛ je nɔ́ ko ngɔ to, ngɛ bɔ nɛ e naa a nya, konɛ ma ko ba loko a tsu onia a.

³ Nɛ ke i ba a, ma tsɔ nihi nɛ nyɛ buu kaa a sa kɛ womi nɛ a hɛɛ nyɛ nike ni ɔmɛ kɛ ya Yerusalem.

⁴ Se ke e sa kaa imi hu ma ya a, i kɛ mɛ maa ya.

Paulo yimitomi

⁵ Se ma ya gu Makedonia loko ma ba nyɛ ngɔ, ejakaa Makedonia ma ya gu.

⁶ Eko ɔ ma hi nyɛ gɔ bɔɔ, nɛ eko ɔ ma ye fiɛ̃ be ɔ hu ngɛ lejɛ ɔ, konɛ he tsuaa he nɛ i yaa a nɛ nyɛ ya je mi blɔ.

⁷ Ejakaa i sume kaa ma na nyɛ ngɛ blɔ kpɛ kɛkɛ, se ye hɛ ngɛ nɔ kaa ke Nyɔmtsɛ ɔ maa ngmɛ mi blɔ ɔ, ma kɛ bɔɔ ngɛ nyɛ ngɔ.

⁸ Se ma hi Efeso kɛ maa su Pentekoste ligbi ɔ nɔ.

⁹ Ejakaa a bli sinya kpetekpleenyɛ nya ha mi, kɛ ha ni tsumi fuu nɛ maa wo yiblii, se ninɛmɛ nɛ kuɔ nya a hu hiɛ.

¹⁰ Ke Timoteo ba nyɛ ngɔ ɔ, nyɛɛ hyɛ nɛ nyɛ he lɛ hɛmuɔ, ejakaa Nyɔmtsɛ ɔ ni tsumi nɔuu e ngɛ tsue kaa imi.

¹¹ Kɔlɔ ɔ he ɔ nɔ ko ko bu lɛ kaa pi nɔ ko ji lɛ; se nyɛ je lɛ blɔ ngɛ he jɔmi mi konɛ e ba ye ngɔ. Ye hɛ ngɛ nɔ kaa e kɛ nyamimɛ ɔmɛ maa ba.

¹² Wa nyɛmi Apolo ɔ, i kpa lɛ pɛɛ hluu nɛ e kɛ nyɛmimɛ ɔmɛ nɛ ba nyɛ ngɔ, se e kplɛɛ we kulaa kaa e maa ba amlɔ nɛ ɔ, se ke e na e he deka hu e maa ba.

Nyagbe munyuhi

¹³ Nyɛɛ huɔ, nyɛɛ da si kpɛii ngɛ hemi kɛ yemi ɔ mi, nyɛɛ pee nyumu, nɛ nyɛ he nɛ wa!

¹⁴ Nyɛɛ pee nyɛ nihi kulaa ngɛ suɔmi mi.

¹⁵ Mamimɛ, nyɛ le Stefana we mi bi ɔmɛ kaa mɛ ji Akaia kekleekle yiblii, nɛ a ngɔ Mawu webi ɔmɛ a sɔmɔmi ɔ ngɔ fɔ a nɔ.

¹⁶ I kpa nyɛ pɛɛ konɛ nyɛ hu nyɛɛ ba nyɛ he si ha ni nɛ ɔmɛ, kɛ nɔ tsuaa nɔ nɛ kɛ mɛ tsuɔ ni nɛ e bɔɔ mɔde ɔ.

¹⁷ I na buajɔmi ngɛ Stefana kɛ Fortunato kɛ Akaiko bami ɔ he, ejakaa nɛ nyɛ be ye ngɔ nɛ ɔ, mɛ lɛ a ba ye nyɛ nɛne mi.

¹⁸ Ejakaa a ba wo ye bua kaa bɔ nɛ a wo nyɛ hu nyɛ bua a. Lɔ ɔ he ɔ, nimli nɛ ngɛ kaa ni nɛ ɔmɛ ɔ nyɛɛ le mɛ saminya.

¹⁹ Asia asafo ɔmɛ biɔ nyɛ. Akwila kɛ Priskila kɛ asafo nɛ ngɛ a we ɔ mi ɔ biɔ nyɛ saminya ngɛ Nyɔmtsɛ ɔ mi.

²⁰ Nyɛmimɛ ɔmɛ kulaa biɔ nyɛ. Nyɛ nga nyɛ he kɛ nya he fiɔmi klɔuklɔu.

²¹ Ami Paulo nitsɛ ye nine nya biɔmi ji nɛ ɔ nɛ.

²² Ke nɔ ko sume Nyɔmtsɛ Yesu Kristo sane ɔ, jamɛ a nɔ ɔ e plɛ musutsɛ! Wa Nyɔmtsɛ, ba! (Maran ata.)

²³ Nyɔmtsɛ Yesu Kristo dloomi ɔ kɛ nyɛ nɛ hi si!

²⁴ Ye suɔmi ɔ kɛ nyɛ tsuo nɛ hi si ngɛ Kristo Yesu mi! Amen.