1 Korintobi 15 - Somi He Ɔ

Kristo sitemi

¹ Jehanɛ, mamimɛ, i ngɛ nyɛ kaie kaa Sane Kpakpa a nɛ i jaje tsɔɔ nyɛ nɛ nyɛ pɛtɛ he hulɔ nɛ nyɛ hɛɛ mi ɔ,

² kɔlɔ ɔ a kɛ heɔ nyɛ yi wami hulɔ, ke nyɛ pɛtɛ he bɔ nɛ i jaje tsɔɔ nyɛ ɔ, ke pi ja a lɛɛ nyɛ he ye yaka gu.

³ Ejakaa sanehi nɛ he hia pe kulaa nɛ a kɛ ha mi nɛ imi hu i kɛ ha nyɛ ɔ ji kaa, Kristo gbo ngɛ wa he yayami ɔmɛ a he ngɛ ngmami ɔmɛ a nya,

⁴ kaa a pu lɛ, nɛ a tle lɛ si ekohu ngɛ ligbi nɛ ji ligbi etɛ ɔ nɔ ngɛ ngmami ɔmɛ a nya;

⁵ nɛ kaa e je e he kpo ngɔ tsɔɔ Kefa, lɔ ɔ se ɔ, ni nyɔngma kɛ enyɔ ɔ.

⁶ Lɔ ɔ se ɔ, e je e he kpo ngɔ tsɔɔ nyɛmimɛ pe lafa enuɔ si kake, nihi nɛ a ti nihi fuu ngɛ kɛ ba su mwɔnɛ, se ni komɛ hu gbo.

⁷ Lɔ ɔ se ɔ, e je e he kpo ngɔ tsɔɔ Yakobo, lɔ ɔ se ɔ bɔfo ɔmɛ tsuo kulaa.

⁸ Se mɛ kulaa a se ɔ, e je e he kpo ngɔ tsɔɔ imi hulɔ nɛ i ngɛ kaa nɔ ko nɛ a kpatu fɔ lɛ ɔ.

⁹ Ejakaa imi lɛɛ, i ji enɔ wayo kulaa ngɛ bɔfo ɔmɛ a kpɛti, nɛ i sɛ́ tete kaa a tsɛɛ mi bɔfo po, ejakaa i wa Mawu asafo ɔ yi mi.

¹⁰ Se Mawu dloomi nya i kɛ ji nɔ nɛ i ji nɛ ɔ nɛ, nɛ e dloomi nɛ e kɛ dloomi ɔ pee we yaka; se mohu, i tsu ni wawɛɛ pe mɛ tsuo pɛpɛɛpɛ, se pi imi tete, se mohu Mawu dloomi nɛ kɛ mi ngɛ ɔ.

¹¹ Lɔ ɔ he ɔ jehanɛ, imi jio, mɛ jio, enɛ ɔ ji wa fiɛmi, nɛ enɛ ɔ hu ji nɔ́ nɛ nyɛ he ye.

Wa sitemi

¹² Jehanɛ ke a fiɛ ngɛ Kristo he kaa a tle lɛ si kɛ je gbeje ɔ, mɛni he je nɛ nyɛ ti ni komɛ deɔ ke ni gbogboehi a si temi ko be ɔ?

¹³ Se ke ni gbogboehi a si temi ko be ɔ, lɛɛ Kristo hu a tle we lɛ si.

¹⁴ Nɛ ke a tle we Kristo si ɔ, lɛɛ wa fiɛmi ɔ pee yaka, nɛ nyɛ hemi kɛ yemi ɔ hu pee yaka gu.

¹⁵ Jeha nɛ a kpa wɔ si kaa Mawu he lakpa odase yeli ji wɔ, ejakaa wa ye Mawu he odase kaa e tle Kristo si, nɔ nɛ, ke e ngɛ mi kaa ni gbogboehi ti si ɔ, lɛɛ e tle we lɛ si?

¹⁶ Ejakaa ke a tle we ni gbogboehi a si ɔ, lɛɛ Kristo hu a tle we lɛ si.

¹⁷ Nɛ jehanɛ ke a tle we Kristo si ɔ, lɔ ɔ lɛɛ nyɛ hemi kɛ yemi ɔ pee yaka nɛ nyɛ fɔɔ si ngɛ nyɛ he yayami ɔmɛ a mi kɛ mwɔɔ;

¹⁸ lɔ ɔ lɛɛ nihi nɛ gbo ngɛ Kristo mi ɔ hu laa.

¹⁹ Ke wami nɛ ɔ mi kɛkɛ wa hɛ ngɛ Kristo nɔ ngɛ ɔ, wa ni ngɛ mɔbɔ pe nimli kulaa.

²⁰ Se anɔkuale ɔ ji kaa, a tle Kristo si kɛ je gbeje, e pee kekleekle nɔ ngɛ nihi nɛ gbo ɔmɛ a kpɛti.

²¹ Ejakaa bɔ nɛ gbenɔ gu nɔmlɔ nɔ kɛ ba a, ja nɔuu si temi ɔ hu gu nɔmlɔ nɔ kɛ ba.

²² Ejakaa, kaa bɔ nɛ Adam mi nɛ nihi kulaa gboɔ ngɛ ɔ, ja nɔuu kɛ̃ Kristo mi nɛ mɛ kulaa a yi ma na wa ngɛ.

²³ Nɔ tsuaa nɔ ngɛ lɛ nitsɛ e blɔ he: Kekleekle nɔ ji Kristo, lɔ ɔ se ɔ nihi nɛ ji Kristo ni ɔmɛ ngɛ e bami ɔ mi.

²⁴ Lɔ ɔ se loko nyagbe ɔ maa ba, benɛ e maa ngɔ matsɛ yemi ɔ ngɔ ha Mawu nɛ ji Tsɛ ɔ; nɛ e maa po nɔ yemi kulaa kɛ he blɔ kulaa kɛ he wami kulaa se ɔ.

²⁵ Ejakaa ja Kristo ye matsɛ kɛ maa su be nɛ Mawu maa ngɔ henyɛli kulaa ngɔ wo e nane si.

²⁶ Nyagbe henyɛlɔ nɛ a ma kpata e hɛ mi ji gbenɔ.

²⁷ Ejakaa ngmami ɔ ke: “Mawu ngɔ nihi tsuo kulaa ngɔ wo e nane si.” Se ke e de ke a ngɔ nihi kulaa ngɔ wo e sisi ɔ, blɔɔ e ngɛ paa kaa nɔ nɛ ngɔ nihi kulaa ngɔ wo e sisi ɔ be mi.

²⁸ Se e benɛ a ngɔ nihi kulaa ngɔ wo Bi ɔ sisi ɔ, lɔ ɔ lɛɛ Bi ɔ nitsɛ hu maa ngɔ e he ngɔ wo nɔ nɛ ngɔ nihi kulaa ngɔ wo e sisi ɔ sisi, konɛ Mawu nɛ pee nihi kulaa yi.

²⁹ Ejakaa, kɛ nihi nɛ haa a baptisii mɛ ngɛ ni gbogboehi a nane mi ɔ maa pee kɛɛ? Ke ni gbogboehi be si tee kulaa a, mɛ he je mɔ nɛ a haa a baptisii mɛ ngɛ ni gbogboehi a nane mi ɔ?

³⁰ Mɛ he je wɔ hu wa naa amane ngmlɛfia tsuaa ngmlɛfia a?

³¹ I na nyɛ he fiami nɛ i ngɛ ngɛ wa Nyɔmtsɛ Kristo Yesu mi ɔ, kaa i gboɔ daa nɛ ɔ.

³² Ke nimli a blɔfami nɛ i kɛ “lohwe dikali” hwu ta ngɛ Efeso ɔ, jinɛ mɛni se i naa? Ke ni gbogboehi ti si ɔ, “Nyɛ ha waa ye ni nɛ waa nu ni, ejakaa hwɔɔ ɔ wa ma gbo!”

³³ Nyɛ ko ha nɛ a sisi nyɛ. “Huɛ yaya bɔmi puɛɔ je mi bami kpakpa.”

³⁴ Nyɛ ha nyɛ hɛ mi nɛ tsɔ nyɛ saminya, nɛ nyɛ ko pee yayami; ejakaa nyɛ ti ni komɛ li nɔ́ ko nɔ́ ko ngɛ Mawu he. I ngɛ enɛ ɔ dee nɛ ma kɛ gbe nyɛ zo.

Nɔmlɔ tso nɛ a kɛ maa te si

³⁵ Se eko ɔ nɔ ko ma bi ke: “Kɛ ni gbogboehi maa pee kɛ te si kɛɛ? Nɛ jehanɛ mɛni nɔmlɔ tso a ma kɛ ba?”

³⁶ Lohwe! Nɔ́ nɛ mo nitsɛ o du ɔ, ja e gbo lolo loko e yi ma na wa.

³⁷ Nɛ jehanɛ hu, nɔ́ nɛ o duɔ ɔ, pi tso nɛ maa puɛ ʼi, se mohu dumi wu ngmelu kɛkɛ, ke ngma jio, nihi nɛ piɛ ɔmɛ eko ʼi jio.

³⁸ Mawu haa wu ɔ tso bɔ nɛ e suɔ, nɛ wu tsuaa wu ɔ, e haa lɛ lɛ nitsɛ e tso.

³⁹ Pi he lo tsuo ji he lo kake, se mohu eslo nimli a he lo, nɛ e slo lohwehi a he lo, eslo nyu mi lohi a nɔ, nɛ eslo lohwe pɛlitsɛmɛ a nɔ hulɔ.

⁴⁰ Hiɔwe nɔmlɔ tsohi ngɛ, nɛ zugba nɔ nɔmlɔ tsohi hu ngɛ; se kɛ ɔ eslo hiɔwe nihi a hɛ mi nyami, nɛ eslo zugba nɔ ni ɔmɛ hu a nɔ.

⁴¹ Eslo pu hɛ mi nyami, nɛ eslo hlami hu hɛ mi nyami, nɛ eslo dodoehi a hɛ mi nyami; ejakaa eslo dodoe kake hɛ mi nyami ngɛ dodoe kpa hɛ mi nyami he.

⁴² Jã nɔuu ji ni gbogboehi a sitemi ɔ hulɔ. A duɔ lɛ ngɛ puemi mi, a tleɔ lɛ si ngɛ nɔ́ nɛ puɛ we mi;

⁴³ a duɔ lɛ ngɛ nɔ́ nɛ be nyami mi, a tleɔ lɛ si ngɛ nyami mi; a duɔ lɛ ngɛ gbɔlemi mi, a tleɔ lɛ si ngɛ he wami mi.

⁴⁴ A duɔ klaa nɔmlɔ tso, a tleɔ mumi nɔmlɔ tso si. Ke klaa nɔmlɔ tso ngɛ ɔ, mumi nɔmlɔ tso hu ngɛ.

⁴⁵ Jã a ngma hulɔ ke: “Adam nɛ ji kekle nɔmlɔ ɔ plɛ klaa nɛ hɛ ngɛ; nyagbe Adam ɔ plɛ mumi nɛ haa nɔ yi naa wa.”

⁴⁶ Se tsa pi mumi nɔ ɔ ji kekle nɔ, se mohu klaa nɔ ɔ, kɔlɔ ɔ se ɔ mumi nɔ ɔ.

⁴⁷ Kekle nɔmlɔ nɛ je zugba a mi ɔ, zu ʼi, nɔmlɔ nɛ ji enyɔ ɔ je hiɔwe.

⁴⁸ Bɔ nɛ zugba nɛ ɔ nɔ no ɔ ngɛ ɔ, jã zugba nɛ ɔ nɔ bi ɔmɛ hu ngɛ; nɛ bɔ nɛ hiɔwe no ɔ ngɛ ɔ, ja hiɔwe bi ɔmɛ hu ngɛ.

⁴⁹ Nɛ kaa bɔ nɛ wa hɛɛ zugba nɛ ɔ nɔ no ɔ subai ɔ, jã nɔuu wa maa hɛɛ hiɔwe no ɔ hu subai.

⁵⁰ Mamimɛ, nɔ́ nɛ i ngɛ tsɔɔe ji kaa, he lo kɛ muɔ nine be Mawu matsɛ yemi ɔ nɔ sue, nɛ jehanɛ puemi hu nine be nɔ́ nɛ puɛ we ɔ nɔ sue.

⁵¹ Oʼɛ, laami sane i ngɛ nyɛ dee nɛ ɔ nɛ: Tsa pi wɔ tsuo kulaa nɛ wa ma gbo ɔ, se a ma tsake wɔ tsuo,

⁵² tlukaa ngɛ hɛngmɛfia mi, benɛ a ma kpa nyagbe titimati ɔ; ejakaa a ma kpa titimati, nɛ a ma tle ni gbogboehi a si nɛ a be puɛe hu, nɛ wɔɔ lɛɛ, a ma tsake wɔ.

⁵³ Ejakaa ja puɛmi nɔ́ nɛ ɔ wo nɔ́ nɛ puɛ we ɔ, nɛ kikɛmɛ a gbomi nɔ́ nɛ ɔ wo nɔ́ nɛ gbo we ɔ.

⁵⁴ Se benɛ kikɛmɛ a puemi nɔ́ nɛ ɔ wo nɔ́ nɛ puɛ we ɔ, nɛ kikɛmɛ a gbomi nɔ́ nɛ ɔ wo nɔ́ nɛ gbo we ɔ, lɔ ɔ lɛɛ munyu nɛ a ngma a maa ba mi ke: “A mi gbenɔ ngɛ kunimi yemi mi.

⁵⁵ Mo gbenɔ, jije o kɛ̃ɛ ɔ ngɛ? Mo gbeje, jije o kunimi yemi ɔ ngɛ?”

⁵⁶ Se gbenɔ kɛ̃ɛ ji yayami, nɛ yayami he wami ji Mlaa a.

⁵⁷ Se sina ha Mawu, nɔ nɛ guu wa Nyɔmtsɛ Yesu Kristo nɔ haa wa yeɔ kunimi ɔ.

⁵⁸ Lɔ ɔ he ɔ, mamimɛ nɛ i suɔ, nyɛ fi si nɛ nyɛ ko gbɔle, nɛ nyɛɛ ya nɔ ngɛ Nyɔmtsɛ ɔ ni tsumi ɔ mi daa nɛ ɔ, ejakaa nyɛ le kaa nyɛ dengme gbomi ɔ be yaka pee ngɛ Nyɔmtsɛ ɔ mi.