1 Korintobi 14 - Somi He Ɔ

Mumi mi dloomi nike nihi

¹ Nyɛɛ di suɔmi se. Nyɛ hɛ nɛ dɔ ngɛ mumi mi nihi a he, se titli ɔ, gbami.

² Ejakaa nɔ nɛ tuɔ munyu kɛ lilɛ slɔɔto ko ɔ, pi nimli nɛ e kɛ ngɛ tue, se Mawu mohu, ejakaa nɔ ko nɔ ko nui, se mumi mi e ngɛ laami munyu ɔmɛ tue ngɛ.

³ Nɔ nɛ gbaa a, nimli e gbaa ngɔ tsɔɔ konɛ e kɛ ha a nane nɛ nu si nɛ e bɔ mɛ kɔkɔ nɛ e jɔɔ a bua.

⁴ Nɔ nɛ tuɔ munyu kɛ lilɛ slɔɔto ko ɔ, yeɔ buaa lɛ nitsɛ e he, se nɔ nɛ gbaa a, e yeɔ buaa asafo ɔ.

⁵ Se i ko suɔ nɛ nyɛ tsuo nyɛ ko tu munyu kɛ lilɛ slɔɔtohi Se nɔ́ nɛ i ko suɔ titli ji kaa nyɛɛ gba, ejakaa nɔ nɛ gbaa a, e pe nɔ nɛ tuɔ munyu kɛ lilɛ slɔɔtohi, ja e tsɔɔ sisi hulɔ konɛ e ye bua asafo ɔ kulaa.

⁶ Jehanɛ, mamimɛ, ke i ba nyɛ ngɔ ba tu munyu kɛ lilɛ slɔɔtohi nɛ pi kpo jemi loo ni lemi loo gbami loo ni tsɔɔmi ko ɔ, mɛni se i haa nyɛ naa?

⁷ Kaa bɔ nɛ nihi nɛ wami be mi ɔ pɛɛ ɔ, bɛ jio, saku jio, ke e pɛmi ɔ mi tsɔ we ɔ, kɛ maa pee kɛɛ nɛ a maa le nɔ nɛ a ngɛ kpae aloo nɔ nɛ a ngɛ fiae ɔ nɛɛ?

⁸ Ejakaa ke titimati pɛ́ pɛmi nɛ ngɛ faii ɔ, mɛnɔ ma dla e he ngɔ to ta?

⁹ Ja nɔuu kɛ nyɛ hu, ngɛ munyu tumi blɔfami ɔ, ke nyɛ tu we munyu nɛ sisi ngɛ faii ɔ, kɛ maa pee kɛɛ nɛ a maa le nɔ nɛ nyɛ ngɛ dee ɔ? Ejakaa kɔlɔ ɔ lɛɛ nyɛ ngɛ kaa nihi nɛ ngɛ munyu tue woɔ kɔhiɔ mi.

¹⁰ Gbi slɔɔtohi fuu ngɛ je ɔ mi mohu, se eko eko be nɛ be sisi.

¹¹ Se jehanɛ ke i nui munyu ɔ sisi ɔ, lɛɛ ma plɛ maje no ngɛ nɔ nɛ ngɛ munyu ɔ tue ɔ hɛ mi, nɛ nɔ nɛ ngɛ munyu ɔ tue ɔ hu ma plɛ maje no ngɛ ye hɛ mi.

¹² Be abɔ nɛ nyɛ hɛ dɔɔ ngɛ mumi mi nihi a he ɔ, ja nɔuu hu nyɛɛ bɔ mɔde konɛ nyɛɛ be nɔ ngɛ nihi nɛ ma ha asafo ɔ maa wa a mi.

¹³ Lɔ ɔ he ɔ, nɔ nɛ tuɔ munyu kɛ lilɛ slɔɔto ko ɔ, e sɔle konɛ e nyɛ sisi hu nɛ e tsɔɔ.

¹⁴ Ejakaa ke i sɔlee kɛ lilɛ slɔɔto ɔ, ye mumi ɔ sɔlee lɛɛ, se ye juɛmi ɔ piɛ we he.

¹⁵ Jeha nɛ kɛ ma pee kɛɛ? I kɛ mumi maa sɔle, nɛ i kɛ juɛmi hu maa sɔle. Ma fia kɛ mumi, nɛ ma la kɛ juɛmi hulɔ.

¹⁶ Ejakaa ke o kɛ mumi ngɛ Mawu yi jee ɔ, kɛ maa pee kɛɛ nɛ nɔ nɛ hii si ngɛ ninɛmɛ nɛ li mi eko ɔmɛ a blɔ he ɔ ma de Amen ngɔ si o sina a nɔ, akɛnɛ e li nɔ nɛ o ngɛ dee ɔ?

¹⁷ Moo lɛɛ, o ngɛ si nae saminya mohu, se kɛ ɔ, o yi bua we nɔ kpa a kulaa.

¹⁸ I naa ye Mawu ɔ si kaa i pe nyɛ tsuo ngɛ gbi slɔɔtohi a tumi mi.

¹⁹ Se ke ɔ, ngɛ asafo ɔ mi ɔ, i suɔ kaa i kɛ ye juɛmi nɛ tu munyu kakaaka enuɔ, konɛ ma kɛ tsɔɔ ni kpahi a ni mohu, pe nɔ nɛ ma tu munyu kakaaka akpe nyɔngma ngɛ gbi slɔɔtohi a mi.

²⁰ Mamimɛ, nyɛ ko pee nyɛ he jokuɛwi ngɛ juɛmi blɔfami, se yayami blɔfami ɔ, nyɛɛ pee nyɛ he bimwɔwi, se juɛmi blɔfami ɔ, nyɛɛ pee nyɛ he nihi nɛ a wa.

²¹ A ngma ngɛ Mlaa a mi ke: “Nyɔmtsɛ ɔ ke: Gbi slɔɔtohi a mi kɛ nya slɔɔtohi a nɔ Ma gu nɛ i kɛ kikɛmɛ a ma nɛ ɔ maa tu munyu, Se lɔ ɔ hu tete a be mi tue bue.”

²² Lɔ ɔ he ɔ gbi slɔɔtohi ɔmɛ ɔ a pi okadi ha ninɛmɛ nɛ heɔ yeɔ, se mohu a ji okadi ha ninɛmɛ nɛ he we yi. Gbami ɔ, e pi ninɛmɛ nɛ he we yi ɔmɛ a nɔ, se mohu ninɛmɛ nɛ heɔ ye ɔmɛ a nɔ.

²³ Lɔ ɔ he ɔ jehanɛ, ke asafo mluku ɔ tsuo nya ba bua ngɛ he kake, nɛ ni ɔmɛ tsuo kɛ gbi slɔɔtohi ngɛ munyu tue, nɛ ninɛmɛ nɛ li mi eko aloo ninɛmɛ nɛ he we yi ɔmɛ a ti ni komɛ hu ba lejɛ ɔ, anɛ a be dee ke nyɛ ngɛ godo nue lo?

²⁴ Se ke ni ɔmɛ kulaa ngɛ gbae, nɛ nɔ ko nɛ he we yi aloo e li mi eko ba lejɛ ɔ, ni ɔmɛ tsuo ma kã lɛ, ni ɔmɛ tsuo maa kojo lɛ,

²⁵ a ma je e tsui mi laami nihi a kpo paa nɛ lɔ ɔ ma ha e kɛ e hɛ mi ma bu si nɛ e ja Mawu, nɛ e maa jaje ke Mawu ngɛ nyɛ kpɛti niinɛ.

Blɔnyatomi ngɛ asafo ɔ mi

²⁶ Lɛɛ mɛni mɔ, mamimɛ? Ke nyɛ nya ba bua, nɛ nyɛ ti nɔ ko ngɛ la ko, nɔ ko hu ngɛ tsɔɔmi ko, nɔ ko ngɛ gbi slɔɔto ko, nɔ ko ngɛ kpo jemi ko, nɔ ko ngɛ sisi tsɔɔmi ko ɔ, a pee kulaa bɔ nɛ e maa ye bua nihi.

²⁷ Ke a ngɛ gbi slɔɔto tue ɔ, nyɛ ha ni enyɔ loo ke e hiɛ hluu ɔ, ni etɛ pɛ nɛ tu, kakaaka, nɛ nɔ kake hu nɛ tsɔɔ sisi.

²⁸ Ke sisi tsɔɔlɔ ko be ɔ, e ma e nya ngɛ asafo ɔ mi, se e tu munyu ha lɛ nitsɛ e he kɛ Mawu.

²⁹ Se gbali ɔmɛ ɔ, ni enyɔ loo ni etɛ nɛ tu munyu, nɛ nihi nɛ piɛ ɔ a susu he.

³⁰ Se ke a je nɔ ko kpo tsɔɔ nɔ ko nɛ hii si ɔ, nɔ nɛ ngɛ munyu ɔ tue ɔ e jɔɔ tumi.

³¹ Ejakaa nyɛ tsuo nyɛ maa gba, kakaaka, konɛ nɔ tsuaa nɔ nɛ kase nɔ ko nɛ a tu munyu ngɔ tsɔɔ nihi kulaa kɛ wo mɛ he wami.

³² Gbali a mumi baa a he si haa gbali ɔmɛ,

³³ ejakaa Mawu ɔ, e pi basabasa peemi Mawu, se mohu he jɔmi Mawu, kaa bɔ nɛ e ngɛ ngɛ he tsɔli asafo ɔmɛ kulaa mi ɔ.

³⁴ Nyɛ ha yi ɔmɛ nɛ pee kɔ ngɛ asafo kpehi a mi, ejakaa a ngmɛ mɛ blɔ nɛ a tu munyu, se mohu a ba a he si kaa bɔ nɛ Mlaa a hu deɔ ɔ.

³⁵ Ke a suɔ kaa a kase nɔ ko ɔ, a bi mɛ nitsɛmɛ a hunomɛ ngɛ we mi. Ejakaa e ngɛ zo ha yihi kaa a maa tu munyu ngɛ asafo kpehi a mi.

³⁶ Anɛ nyɛ ngɔ Mawu munyu ɔ je? Aloo nyɛ kɛkɛ nyɛ ngɔ e ba?

³⁷ Ke e peɔ nɔ ko kaa gbalɔ loo mumi mi nɔmlɔ ji lɛ ɔ, e sa nɛ e le kaa nɔ nɛ i ngma nyɛ nɛ ɔ, Nyɔmtsɛ ɔ kita ʼi;

³⁸ se ke nɔ ko li enɛ ɔ ɔ, nyɛ ko le lɛ.

³⁹ Lɔ ɔ he ɔ, mamimɛ, nyɛ hɛ nɛ dɔ ngɛ gbami he, nɛ gbi slɔɔtohi a tumi hu nyɛ ko tsi nya.

⁴⁰ A pee nɔ tsuaa nɔ bɔ nɛ ngɛ fɛu ngɛ blɔ nya blɔ nya.