1 Korintobi 12 - Somi He Ɔ

Mumi mi dloomi nike nihi

¹ Jehanɛ, mamimɛ, i suɔ kaa ma ha nyɛɛ le nɔ́ ko ngɛ mumi mi nihi a he.

² Nyɛ le kaa benɛ nyɛ ji wɔ jali ɔ, amaga mumuihi a ngɔ a kpaka nyɛ kɛ ya, bɔ tsuaa bɔ nɛ a kpaka nyɛ ha a.

³ Lɔ ɔ he ɔ, i ngɛ hae nɛ nyɛɛ le kaa, nɔ nɛ tuɔ munyu ngɛ Mawu mumi mi ɔ, de we ke Yesu ɔ musutsɛ ji lɛ, nɛ nɔ ko be nyɛe ma de ke Yesu ji Nyɔmtsɛ hulɔ, kaa ja Mumi Klɔuklɔu ɔ kpaka lɛ.

⁴ Dloomi nike nihi slɔɔtohi ngɛ, se mumi kake ɔ nɔuu lɛ haa.

⁵ Sɔmɔmi ni tsumihi slɔɔtohi hu ngɛ, se Nyɔmtsɛ kake ɔ nɔuu a kɛ sɔmɔɔ;

⁶ nɛ ni tsumihi slɔɔtohi hu ngɛ, se Mawu kake ɔ nɔuu ji nɔ nɛ tsuo kulaa ngɛ nihi kulaa mi.

⁷ Se nɔ tsuaa nɔ ɔ, a haa Mumi ɔ jeɔ e he kpo ngɛ e mi konɛ e hi ha nihi.

⁸ Mumi ɔ haa nɔ ko ni lemi munyu; nɛ nɔ ko hu jamɛ a Mumi ɔ nɔuu haa lɛ nihi a sisi nami he ni lemi.

⁹ Lɛ Mumi ɔ nɔuu haa nɔ ko hemi kɛ yemi; nɛ nɔ kpa hu tsami dloomi nike nihi,

¹⁰ Nɔ ko ɔ, he wami nihi a tsumi; nɔ ko ɔ gbami; nɔ ko hu mumihi a si kpami; nɔ ko hu gbi slɔɔtohi a tumi; nɛ nɔ kpa hu munyuhi a sisi tsɔɔmi.

¹¹ Se kikɛmɛ a ni nɛ ɔmɛ kulaa a, Mumi kake ɔ nɔuu lɛ tsuo, nɛ e dlaa ngɔ haa nɔ tsuaa nɔ kakaaka, bɔ nɛ e suɔ.

Nɔmlɔ tso kake kɛ e he nihi slɔɔtohi

¹² Ejakaa kaa bɔ nɛ nɔmlɔ tso ɔ kake ʼi, se e hɛɛ he nihi fuu, nɛ nɔmlɔ tso ɔ he nihi fuu ɔ kulaa ji nɔmlɔ tso kake ɔ, ja nɔuu hu ji Kristo.

¹³ Ejakaa Yudafohi ji wɔ jio, Helabihi ji wɔ jio, nyɔguɛhi jio, he yeli jio, wɔ tsuo ɔ Mumi kake mi a gu a baptisi wɔ ngɔ wo nɔmlɔ tso kake mi; nɛ wɔ tsuo Mumi kake akɛ ha wɔ nɛ waa nu.

¹⁴ Ejakaa nɔmlɔ tso ɔ hu pi he nɔ kake ʼi, se fuu ʼi.

¹⁵ Ke nane ma de ke: “Akɛnɛ i pi nine he je ɔ, i pi nɔmlɔ tso ɔ he ni ɔmɛ eko” ɔ, anɛ enɛ ɔ he je ɔ, e pi nɔmlɔ tso ɔ he ni ɔmɛ eko lo?

¹⁶ Nɛ ke tue hu ma de ke: “Akɛnɛ i pi hɛngmɛ he je ɔ, i pi nɔmlɔ tso ɔ he ni ɔmɛ eko” ɔ, anɛ enɛ ɔ he je ɔ, e pi nɔmlɔ tso ɔ he ni ɔmɛ eko lo?

¹⁷ Ke nɔmlɔ tso mluku ɔ kulaa ji hɛngmɛ ɔ, jije nɔ numi ngɛ? Ke nɔ numi sɔuu ʼi ɔ, jije nɔ he fu numi ɔ ngɛ?

¹⁸ Se jehanɛ Mawu kɛ he nɔ́ tsuaa he nɔ́ ma nɔmlɔ tso ɔ he bɔ nɛ e suɔ.

¹⁹ Se ke mɛ kulaa ji he nɔ́ kake ɔ, jije nɔmlɔ tso ɔ ngɛ?

²⁰ Se jehanɛ he nihi fuu ʼi mohu, se nɔmlɔ tso kake ʼi.

²¹ Hɛngmɛ be nyɛe ma de nine ke: “I be o he ni tsumi;” nɛ jehanɛ hu yi be nyɛe ma de nanehi ke: “I be nyɛ he ni tsumi.”

²² Nɔmlɔ tso ɔ he nihi nɛ peɔ wɔ kaa a he wɛ́ kulaa a, mɛ mohu a he hiaa wɔ titli,

²³ nɛ nihi nɛ e peɔ wɔ kaa a ji nɔmlɔ tso he nihi nɛ hɛ mi be nyami kulaa a, kɔlɔ ɔmɛ titli a hɛ mi nyami wa woɔ, nɛ wa he nihi nɛ be fɛu ɔ mohu naa he fɛu;

²⁴ se wa he nihi nɛ ngɛ fɛu momo ɔ, a hia we hɛ mi nyami womi. Se Mawu tsla nɔmlɔ tso ɔ ngɛ blɔ nɔ nɛ nɔ́ nɛ piɛ lɛ nɔ́ ko ɔ, kɔlɔ ɔ titli e kɛ bu haa;

²⁵ konɛ mi gbami nɛ ko ba nɔmlɔ tso ɔ mi, se mohu he ni ɔmɛ nɛ baa a sibi a yi pɛpɛɛpɛ.

²⁶ Nɛ ke he nɔ kake ngɛ nɔ nae ɔ, he ni ɔmɛ kulaa kɛ lɛ naa nɔ. Nɛ ke he nɔ kake hɛ mi ba nyami hu, he ni ɔmɛ kulaa kɛ lɛ naa bua jɔmi.

²⁷ Jehanɛ nyɛ tsuo ɔ, Kristo nɔmlɔ tso ji nyɛ, nɛ kakaaka a, e he nihi.

²⁸ Nɛ kekleekle ɔ, Mawu wo ni komɛ bɔfohi ngɛ asafo ɔ mi, nɔ́ nɛ ji enyɔ ɔ, gbali, nɔ́ nɛ ji etɛ ɔ, tsɔɔli; kɔlɔ ɔ se ɔ he wami ni tsuli, kɔlɔ ɔ se ɔ, hiɔhi a tsami dloomi nike nihi, yemi kɛ buami, nɔyemihi, gbi slɔɔtohi a tumi.

²⁹ Anɛ nihi tsuo ji bɔfohi lo? Anɛ nihi tsuo ji gbali lo? Anɛ nihi tsuo ji tsɔɔli lo? Anɛ nihi tsuo ji he wami ni tsuli lo?

³⁰ Anɛ nihi tsuo lɛ ngɛ hiɔhi a tsami dloomi nike nihi lo? Anɛ nihi tsuo lɛ tuɔ munyu slɔɔtohi lo? Anɛ nihi tsuo lɛ tsɔɔ munyuhi a sisi lo?

³¹ Nyɛ hɛ nɛ dɔ ngɛ dloomi nike nihi nɛ hi saminya amɛ a he. Nɛ ma kpale tsɔɔ nyɛ blɔ nɛ hi pe kulaa.