1 Korintobi 11 - Somi He Ɔ

Yinɔhami ngɛ sɔlemi

¹ Nyɛɛ kase mi kaa bɔ nɛ imi hu i kaseɔ Kristo ɔ.

² Se, mamimɛ, i ngɛ nyɛ yi jee kaa nyɛ kaii mi ngɛ nihi tsuo mi, nɛ tsɔɔmihi nɛ i kɛ ha nyɛ ɔ, nyɛ hɛɛ mi bɔ pɛ nɛ i kɛ ha nyɛ ɔ.

³ Se i suo kaa nyɛɛ le kaa nyumu tsuaa nyumu yi ji Kristo, nɛ yo tsuaa yo hu yi ji nyumu, nɛ Kristo yi ji Mawu.

⁴ Nyumu nɛ sɔlee aloo e gbaa nɛ e kɛ nɔ́ ko haa e yi ɔ nɔ ɔ, e ngɛ e yi ɔ he guɛ gbee.

⁵ Se yo tsuaa yo nɛ sɔlee aloo e gbaa nɛ e hɛ̃ɛ e yi ɔ nɔ gu ɔ, lɛ hu e ngɛ e yi ɔ he guɛ gbee; ejakaa e ngɛ kaa nɔ́ nɛ e sɛ e yi nɔuu kɛ.

⁶ Ejakaa ke yo hɛ́ e yi ɔ nɔ ɔ, lɛɛ e sã e yi ɔ nɔ mɔ. Se ke e ngɛ lɛ zo pee kaa e ma sã eyi ɔ nɔ loo e maa sɛ e yi ɔ, lɛɛ e ha e yi ɔ nɔ mɔ.

⁷ Se nyumu lɛɛ, e sɛ kaa e haa e yi ɔ nɔ, ejakaa Mawu subai kɛ e hɛ mi nyami ji lɛ; se yo lɛɛ, nyumu hɛ mi nyami ji lɛ.

⁸ Ejakaa nyumu ji yo mi, se yo mohu lɛɛ je nyumu mi.

⁹ Nɛ jehanɛ hu, a bɔɛ nyumu ngɛ yo he se yo mohu a bɔ ngɛ nyumu he.

¹⁰ Lɔ ɔ he ɔ, ngɛ hiɔwe bɔfo ɔmɛ a he ɔ, e sa nɛ yo nɛ na he wami he okadi ko ngɛ e vi ɔ nɔ.

¹¹ Ngɛ Nyɔmtsɛ ɔ mi ɔ, nyumu ko si yo se, nɛ ɔ hu ko si nyumu se.

¹² Ejakaa kaa bɔ nɛ yo je nyumu mi ɔ, ja nɔuu kɛ nyumu hu gu yo mi kɛ ba; se nihi kulaa je Mawu mi.

¹³ Nyɛ nitsɛmɛ nyɛ hla mi ngɛ nyɛ kpɛti. Anɛ e ngɛ fɛu kaa yo maa sɔle ngɛ Mawu hɛ mi nɛ e hɛ́ e yi nɔ lo?

¹⁴ Anɛ fɔmi su nitsɛ tsɔɔ we nyɛ kaa, ke nyumu fia e yi kusuu ɔ, e ngɛ zo ha lɛ,

¹⁵ se yo lɛɛ ke e fia e yi kusuu ɔ, e ji hɛ mi nyami ha lɛ lo? Ejakaa a kɛ yi bwɔmi ɔ ha lɛ kaa he hami nɔ.

¹⁶ Se ke nɔ ko suɔ kaa e pee e he nya sãlɔ ngɛ enɛ ɔ he ɔ, wɔɔ lɛɛ wa pee we ja, nɛ Mawu asafo ɔmɛ hu pee we ja.

Nyɔmtsɛ Niyeni ɔ

¹⁷ Kita nɛ i ngɛ nyɛ woe nɛ ɔ, pi nyɛ yi nɛ i kɛ ngɛ jee, ejakaa ke nyɛ kpe ɔ, nɔ́ kpakpa ko ji mi, se mohu nɔ́ yaya lɛ jee mi.

¹⁸ Se kekleekle ɔ, i nuɔ kaa ke nyɛ ya bua nyɛ he nyɛ ngɛ asafo ɔ mi ɔ, mi gbamihi ngɛ nyɛ kpɛti, nɛ i heɔ yeɔ fã kɛ fã;

¹⁹ ejakaa e sa kaa migbami nɛ te si ngɛ nyɛ kpɛti konɛ ni kpakpa amɛ a je a he si paa ngɛ nyɛ kpɛti.

²⁰ Jehanɛ ke nyɛ nya ba bua ngɛ he kake ɔ, pi Nyɔmtsɛ Niyeni ɔ yemi nɛ nyɛ ba;

²¹ ejakaa kikɛmɛ a nyɛ ni yemi nɛ ɔ mi ɔ, nɔ tsuaa nɔ ngɔɔ lɛ nitsɛ e ni ye ni nɛ e yeɔ, nɛ benɛ hwɔ ngɛ nɔ ko yee ɔ, blɔɔ nɔ ko de da.

²² Anɛ nyɛ be wehi nɛ nyɛ maa ye ni nɛ nyɛ maa nu ngɛ lejɛ ɔmɛ lo? Aloo Mawu asafo ɔ he guɛ nyɛ ngɛ gbee, nɛ nyɛ ngɛ nihi nɛ be nɔ́ ko ɔmɛ a hɛ mi si puee ɔ? Kɛ ma de nyɛ kɛɛ? Ma je nyɛ yi lo? Enɛ ɔ lɛɛ i be nyɛ yi jee ngɛ he.

²³ Ejakaa imi nitsɛ nɔ́ nɛ i na kɛ je Nyɔmtsɛ dɛ mi nɛ i kɛ ha nyɛ ɔ ji nɛ ɔ nɛ, kaa: Nyɔmtsɛ Yesu ɔ, jamɛ a nyɔ ɔ mi nɔuu nɛ a tsɔɔ e se blɔ ɔ, e kɛ̃ abolo,

²⁴ nɛ e na si, nɛ e kuɔ mi, nɛ e ke: “Enɛ ɔ ji ye nɔmlɔ tso nɛ a kuɔ ngɛ nyɛ ke. Nyɛɛ pee e nɛ ɔ nɛ nyɛ kɛ kai mi.”

²⁵ Ja nɔuu e wo kplu ɔ hu ngɛ niyeni ɔ se, nɛ e ke: “Kikɛmɛ a kplu nɛ ɔ ji somi he ɔ ngɛ ye muɔ ɔ mi. Nyɛɛ pee enɛ ɔ; si abɔ nɛ nyɛ maa nu ɔ nɛ nyɛ kɛ kai mi.”

²⁶ Ejakaa si abɔ nɛ nyɛ yeɔ kikɛmɛ a bolo nɛ ɔ, nɛ nyɛ nuu kikɛmɛ a kplu nɛ ɔ hulɔ ɔ, nyɛ ngɛ Nyɔmtsɛ ɔ gbenɔ ɔ jajee kɛ ngɛ tsɔɔe kɛ maa su be nɛ e maa ba.

²⁷ Lɔ ɔ he ɔ, nɔ tsuaa nɔ nɛ yeɔ kikɛmɛ a abolo nɛ ɔ nɛ e nuu Nyɔmtsɛ ɔ kplu ɔ bɔ nɛ sɛ́ ɔ, e ngɛ Nyɔmtsɛ ɔ nɔmlɔ tso ɔ kɛ e muɔ ɔ nɔ tɔe.

²⁸ Nɔmlɔ nɛ ka lɛ nitsɛ e he loko e ye abolo nɛ ɔ eko nɛ e nu kplu nɛ ɔ eko;

²⁹ ejakaa nɔ nɛ yeɔ nɛ e nuu bɔ nɛ sɛ́ ɔ, kojomi mohu e yeɔ nɛ e nuu haa e he ejakaa e bui Nyɔmtsɛ e nɔmlɔ tso ɔ.

³⁰ Kɔlɔ ɔ he hu nɛ nyɛ ti nihi fuu ngɛ gboe nɛ a he wɛ mɛ, nɛ nihi babauu hu gbo nɛ ɔ nɛ.

³¹ Se e ji wa kaa wɔ nitsɛmɛ wa he hyɛɛ jinɛ a be wɔ kojoe.

³² Se ke a kojo wɔ ɔ, Nyɔmtsɛ ɔ tsɔsemi ʼi, benɛ pee nɛ a ko bu wɔ kɛ je ɔ kulaa fɔ.

³³ Lɔ ɔ he ɔ, mamimɛ, ke nyɛ nya ba bua nɛ nyɛ maa ye ni ɔ, nyɛɛ mlɛ nyɛ sibi.

³⁴ Se ke hwɔ ngɛ nɔ ko yee ɔ, e ye ni ngɛ we mi lolo, benɛ pee nɛ nyɛ he nya buami ɔ ko tsɛ kojomi ha nyɛ. Nihi nɛ piɛ ɔmɛ ɔ, ke i ba a, ma to mɛ blɔ nɔ.