1 Korintobi 10 - Somi He Ɔ

Amagahi a he kɔkɔbɔmi

¹ Se, mamimɛ, i suɔ kaa nyɛ kai kaa wa tsɛmɛ ɔmɛ tsuo hi bɔ ku ɔ sisi, nɛ mɛ tsuo a po wo ɔ,

² nɛ a baptisi mɛ kulaa ngɔ wo Mose mi ngɛ bɔ ku ɔ kɛ wo ɔ mi,

³ nɛ mɛ kulaa a, mumi mi niyeni kake ɔ nɔuu a ye,

⁴ nɛ mɛ kulaa a nu mumi mi tɛ sa nɛ kɛ mɛ nyɛɛ ɔ mi nyu, nɛ tɛ sa a ji Kristo?

⁵ Se kɛ̃ ɔ Mawu na we a ti nihi fuu a he tsui, ejakaa a kpata a hɛ mi ngɛ nga a nɔ.

⁶ Se a kɛ enɛ ɔmɛ to wɔ okadi konɛ wa ko ha ni yayahi nɛ pee wɔ akɔnɔ kaa bɔ nɛ e pee mɛ ɔ.

⁷ Jehanɛ hu nyɛ ko plɛ amaga jali kaa a ti ni komɛ pee ɔ, kaa bɔ nɛ a ngma a ke: “Ma a be hi si, nɛ a ye ni, nɛ a nu da, kɛkɛ nɛ a te si nɛ a bɔni fiɛmi.”

⁸ Nɛ jehanɛ hu wa ko bɔ ajuama kaa bɔ nɛ a ti ni komɛ bɔ nɛ ligbi kake nɔ ɔ nihi akpe nyingmi enyɔ kɛ etɛ yi tã a.

⁹ Nɛ jehanɛ hu wa ko ka Nyɔmtsɛ ɔ kaa bɔ nɛ a ti ni komɛ ka lɛ nɛ sinɔhi ba kpata a hɛ mi ɔ.

¹⁰ Nɛ jehanɛ hu nyɛ ko tu munyu huitihuiti kaa bɔ nɛ a ti ni komɛ tu munyu huitihuiti nɛ nɔ́ puɛlɔ ɔ ba kpata a hɛ mi ɔ.

¹¹ A pee mɛ enɛ ɔmɛ kulaa nɛ a kɛ to okadi ha ni kpahi; nɛ a ngma kaa kɔkɔ bɔmi nɔ́ kɛ ha wɔ, wɔ nihi nɛ je ɔ nyagbe ligbi ɔmɛ na wɔ ɔ;

¹² benɛ pee nɛ nɔ nɛ susuu kaa e daa si ɔ, e hyɛ e he nɛ hi konɛ e ko nɔ si.

¹³ Ka ko bɛ nyɛ nɔ nɛ pi nɔmlɔ he nɔ́; se anɔkualetsɛ ji Mawu, nɔ nɛ be hae nɛ a ka nyɛ pe bɔ nɛ nyɛ ma nyɛ, se mohu e kɛ ka a nɔuu maa je blɔ ha nyɛ nɛ nyɛɛ je mi hulɔ, konɛ nyɛ nyɛ nya nɛ nyɛɛ da.

¹⁴ Lɔ ɔ he ɔ, mamimɛ, nyɛɛ tu wɔ jami nya fo!

¹⁵ I kɛ nyɛ ngɛ munyu tue kaa a kɛ ni leli tuɔ munyu; nyɛ nitsɛmɛ nyɛ kɔ nɔ nɛ i ngɛ dee ɔ se.

¹⁶ Gbaami kplu ɔ nɛ wa gbaa a, anɛ pi waa kɛ Kristo kake peemi ngɛ e muɔ ɔ mi lo? Abolo nɛ wa kuɔ ɔ, anɛ pi waa kɛ Kristo kake peemi ngɛ e nɔmlɔ tso ɔ mi lo?

¹⁷ Ejakaa abolo kake ʼi, nɛ wɔ fuu ɔ, nɔmlɔ tso kake ji wɔ, ejakaa wɔ kulaa wa yeɔ abolo kake ɔ eko.

¹⁸ Nyɛɛ hyɛ he lo blɔfami Israel ɔ; anɛ nihi nɛ yeɔ bɔ sami ni ɔmɛ ɔ pi huɛ nɛ a kɛ bɔ sami latɛ ɔ ngɛ bɔe ɔ lo?

¹⁹ Lɛɛ kɛ i ngɛ tsɔɔe kɛɛ ɔ? Kaa amaga ji nɔ ko, aloo kaa amaga bɔ ji nɔ ko?

²⁰ Dɛbi, se mohu i ngɛ dee ke bɔ nɛ wɔ jali ɔmɛ saa a, mumi yayamihi a saa ngɔ haa se pi Mawu; se i sume kaa nyɛɛ kɛ mumi yayamihi bɔɔ huɛ.

²¹ Nyɛ be Nyɔmtsɛ ɔ kplu ɔ kɛ mumi yayamihi a kplu ɔ nyɛe maa nu si kake. Nyɛ be Nyɔmtsɛ ɔ okplɔɔ ɔ nɔ ni kɛ mumi yayamihi a nɔ ɔ nɔ ni nyɛe maa ye si kake.

²² Aloo Nyɔmtsɛ ɔ mi mi la wa ngɛ woe? Anɛ wa he wa pe lɛ lo?

²³ “Wa ngɛ nihi tsuo he blɔ,” se pi nihi tsuo nɛ hi. “Wa ngɛ nihi tsuo he blɔ,” se pi nihi tsuo nɛ haa nɔ nane nuu si.

²⁴ Nɔ ko nɔ ko nɛ ko plee ngɔ ha lɛ nitsɛ e he, se mohu nɔ tsuaa nɔ nɛ plee ngɔ ha e nyɛmi.

²⁵ Nɔ́ tsuaa nɔ́ nɛ a ngɛ juae ngɛ lo jua nɔ ɔ, nyɛɛ ye; se he ni lemi he ɔ, nyɛ ko bi mi;

²⁶ ejakaa “zugba a kɛ e mi ni ɔmɛ kulaa a, Nyɔmtsɛ ɔ nɔ ʼi.”

²⁷ Ke nihi nɛ he we yi ɔmɛ a ti nɔ ko kpee nyɛ ni yemi nɛ nyɛ suɔ kaa nyɛ maa ya a, nɔ́ tsuaa nɔ́ nɛ a kɛ maa ma nyɛ hɛ mi ɔ, nyɛɛ ye nɛ nyɛ ko bi mi, ngɛ he ni lemi he.

²⁸ Se ke nɔ ko de nyɛ ke: “Enɛ ɔ lɛɛ amaga bɔ sami nihi ʼi” ɔ, nyɛ ko ye ngɛ nɔ nɛ wo nyɛ tue nɔ ɔ kɛ he ni lemi he je.

²⁹ Se he ni lemi nɛ i ngɛ dee nɛ ɔ ɔ, pi mo nitsɛ o nɔ ɔ, se mohu nɔ kpa nɔ ɔ. Se mɛ he je nɔ kpa he ni lemi maa kojo ye he yemi ɔ?

³⁰ Ke sina i kɛ ye ɔ, mɛ he je a tuɔ ye he munyu yaya ngɛ nihi nɛ i na si ngɛ he ɔmɛ a he?

³¹ Lɔ ɔ he ɔ, ke ni nyɛ ngɛ yee jio, ni nyɛ ngɛ nue jio, aloo nɔ kpa ko nɛ nyɛ ngɛ pee jio, nyɛɛ pee kulaa kɛ wo Mawu hɛ mi nyami.

³² Nyɛ ko pee kpangmi ngɔ ha Yudafohi kɛ Helabihi kɛ Mawu asafo ɔ kulaa;

³³ kaa bɔ nɛ imi hu i suɔ kaa nihi kulaa mi ɔ ma sa nihi kulaa a hɛ mi, nɛ i hla we nɔ́ nɛ hi ha imi nitsɛ ye he, se mohu nɔ́ nɛ hi ha nihi fuu, konɛ a he a yiwami.