1 Korintobi 1 - Somi He Ɔ

¹ Paulo, Yesu Kristo bɔfo nɛ a tsɛ ngɛ Mawu suɔmi nya a, kɛ wa nyɛmi Sostene

² ngma ya ha Mawu asafo nɛ ngɛ Korinto ɔ, nihi nɛ a tsukɔ a he ngɛ Kristo Yesu mi nɛ ji ni klɔuklɔuhi nɛ a tsɛ mɛ kɛ nihi kula nɛ tsɛɛ waa kɛ mɛ tsuo Nyɔmtsɛ Yesu Kristo biɛ ngɛ he tsuaa he ɔ:

³ Dloomi kɛ hejɔmi nɛ je wa tsɛ Mawu ɔ kɛ Nyɔmtsɛ Yesu Kristo dɛ mi ɔ ha nyɛ.

Gbaami ngɛ Kristo mi

⁴ I naa ye Mawu ɔ si daa nɛ ɔ ngɛ nyɛ nyɛ he, ngɛ Mawu dloomi nɛ a ngɔ ha nyɛ ngɛ Kristo Yesu mi ɔ he,

⁵ kaa nihi kulaa mi ɔ, a ha nyɛ plɔke ngɛ e mi, ngɛ munyu tsuaa munyu kɛ ni lemi tsuaa ni lemi blɔfami.

⁶ Kaa bɔ nɛ a ma Kristo he odase ɔ nɔ mi ngɛ nyɛ mi,

⁷ nɛ e piɛ́ nyɛ dloomi ke nɔ ko, nyɛ nɛ nyɛ hyɛɛ wa Nyɔmtsɛ Yesu Kristo kpojemi ɔ blɔ ɔ,

⁸ lɛ nɔuu e ma wlua nyɛ kɛ maa ya nyagbe konɛ piami ko ko hi nyɛ he ngɛ wa Nyɔmtsɛ Yesu Kristo ligbi ɔ nɔ.

⁹ Anɔkualetsɛ ji Mawu, nɔ nɛ tsɛ nyɛ kɛ ba e bi Yesu Kristo, wa Nyɔmtsɛ ɔ hue bɔmi ɔ mi ɔ.

Migbami ngɛ asafo ɔ mi

¹⁰ Se, mamimɛ, i kpa nyɛ pɛɛ ngɛ wa Nyɔmtsɛ Yesu Kristo biɛ mi, kaa nyɛ nya nɛ pee kake nɛ mi gbami ko ba nyɛ kpɛti, se mohu nyɛ kulaa nyɛ yi mi kɛ nyɛ juɛmi nɛ pee kake.

¹¹ Ejakaa mamimɛ, Kloe we mi bi ɔmɛ ba wo ye tue nɔ ke pɛ ngɛ nyɛ kpɛti.

¹² Nɔ́ nɛ i ngɛ dee nɛ ɔ ji kaa nyɛ ti nɔ tsuaa nɔ deɔ ke: “Ami lɛɛ, Paulo nɔ ji mi; ami lɛɛ, Apolo nɔ ji mi; ami lɛɛ, Kefa nɔ ji mi, ami lɛɛ Kristo nɔ ji mi.”

¹³ Anɛ a gba Kristo mi lo? Anɛ Paulo a sɛu ha nyɛ ɔ lo? Aloo Paulo biɛ mi a baptisi nyɛ ngɔ wo ɔ lo?

¹⁴ I naa Mawu si kaa i baptisi we nyɛ ti nɔ ko, kaa ja Krispo kɛ Gaio

¹⁵ konɛ nɔ ko ko de ke i baptisi nihi ngɔ wo imi nitsɛ ye biɛ mi.

¹⁶ Nɛ i baptisi Stefana we ɔ se nɛ ɔ ɔ, i li kaa i baptisi nɔ ko piɛ he hu lo.

¹⁷ Ejakaa Kristo tsɔ we mi baptisimi, se mohu sane kpakpa a fiɛmi, nɛ pi ngɛ ni lemi munyuhi a mi tete, kone Kristo seumi tso ɔ nɛ ko pee yaka.

Kristo ji Mawu hewami kɛ e nilemi

¹⁸ Ejakaa seumi tso ɔ he sane ɔ ji kuasiahi a sane ha nihi nɛ hɛ mi kpataa a, se wɔ nihi nɛ a heɔ wa yi wami ɔ, e ji Mawu he wami ha wɔ.

¹⁹ Ejakaa fa ngma ke: “Ma puɛ ni leli a ni lemi, Nɛ ga leli a ga a hu ma ha e pee yaka.”

²⁰ Jije ni lelɔ ngɛ? Jije womi mi lelɔ ngɛ? Jije je nɛ ɔ mi sanemi hlalɔ ngɛ? Anɛ Mawu ha we nɛ je ɔ mi ni lemi ɔ nɛ plɛ kuasiahi a sane lo?

²¹ Se akɛnɛ je ɔ gui Mawu ni lemi ɔ nɔ nɛ e kɛ e ni lemi ɔ nɛ le Mawu he je ɔ, e sa Mawu hɛ mi kaa e kɛ kuasiahi a sane ɔ nɛ a ngɛ fiɛe ɔ nɛ he nihi nɛ heɔ ye ɔ a yi wami.

²² Ejakaa Yudafo ɔmɛ ɔ, okadihi a si a biɔ, nɛ Helabi hu hlaa ni lemi

²³ se wɔɔ lɛɛ, Kristo nɛ a sɛu ɔ wa fiɛɔ, nɔ nɛ plɛ kpangmi ha Yudafohi kɛ kuasiahi a sane ha majemajeli ɔmɛ;

²⁴ se nihi nɛ a tsɛ mɛ ɔ tsuo, Yudafohi jio, Helabihi jio, Kristo nɛ ji Mawu he wami kɛ Mawu ni lemi ɔ wa fiɛɔ ngɔ haa mɛ.

²⁵ Ejakaa Mawu kuasiahi a sane ɔ mi ngɛ ni lemi pe nimli a ni lemi, nɛ Mawu gbɔjɔmi ɔ he wa pe nimli a he wami.

²⁶ Mamimɛ, nyɛɛ hyɛ kaa nyɛ tsɛmi ɔ, tsa pi he lo blɔfami ni leli fuu nɛ a tsɛ, tsa pi he wali fuu, tsa pi odehehi fuu.

²⁷ Se mohu je nɛ ɔ mi kuaisa amɛ Mawu hla, kone e kɛ gbe ni leli ɔmɛ zo. Nɛ je nɛ ɔ mi gbɔjɔmi ni ɔmɛ hu Mawu hla konɛ e kɛ gbe nihi nɛ he wa amɛ zo.

²⁸ Nɛ je nɛ ɔ mi nihi nɛ a bui kɛ nihi nɛ a gbe he guɛ ɔ Mawu hla, kɛ nihi nɛ pi nɔ́ ko nɔ́ ko ɔ tete, konɛ e ha nihi nɛ ji nɔ́ ko ɔmɛ nɛ pee yaka;

²⁹ benɛ pee nɛ he lo ko he lo ko ko fia ngɛ e hɛ mi.

³⁰ Se Mawu lɛ pee nɛ nyɛ ngɛ Kristo Yesu mi, nɔ nɛ plɛ ni lemi nɛ je Mawu ngɔ kɛ dami kɛ he tsukɔmi kɛ kpɔmi ha wɔ ɔ,

³¹ konɛ: “Nɔ nɛ ngɛ fiae ɔ, e fia ngɔ fɔ Nyɔmtsɛ ɔ nɔ,” kaa bɔ nɛ a ngma a.