Philippi 1 - Dakota Wowapi Wakan Kin

¹ Palos qa Timotheos, Jesus Messiya taokiyewicaye cin, topa Philippi ekta Jesus Messiya en owotanna un kin hena, qa waawanhdake cin hunka wicayapi ko, wowapi unnicagapi:

² Wakantanka Ateunyanpi, qa Jesus Messiya Itancan unkiyapi kin etanhan, wowaonśida, wookiye ko niyepi kin en nicipi un nunwe.

³ Ciksuyapi eca, Wakantanka mitawa wopida ewakiya ece.

⁴ Ohinniyan mitawocekiye otoiyohi en, niyepi owasin on iyuśkinyan cewakiya ece:

⁵ Anpetu tokaheya kin ehantanhan, han, qa dehanyan, wotanin waśte kin en kodayeciyapi kin heon.

⁶ Unkan he sdonwaya; tuwe tokaheya oḣan waśte nicicagapi kin he niciyuśtanpi kta, Jesus Messiya anpetu tawa kin hehanyan.

⁷ Hecen niyepi owasin wacin en ciyuzapi kte cin he hecetu, cante en mayaduzapi kin heon; makaśkapi kin, ga wotanin waśte omdake c̣a mdasuta kin he en, qa nakun wowaśte mitawa kin en niyepi owasin oyapapi ece.

⁸ Wakantanka sdonmayan, Jesus Messiya cante kin on owasin cantocikpanipi.

⁹ Qa he de icewakiya, waśte yadakapi kin he wosdonye wiyukcanpi ko owasin en, sanpa qa sanpa tankaya aye kta:

¹⁰ Kinhan, taku waśte kin hena idukcanpi kta, hecen okonwanjidan ḣicahe śni yaunpi kta, Messiya anpetu tawa kin en;

¹¹ Qa wicoowotanna waskuyeca kin on ojudan yaunpi nunwe, hena Jesus Messiya on Wakantanka woyatan qa wowitan tawa kin ee.

¹² Mihunkawanji, taku token ecamiconpi kin he on wotanin waśte kin sanpa otanin aye cin he sdonyayapi kta wacin.

¹³ Hecen wicaśtayatapi tahocoka kin ekta, qa owancaya Messiya on makaśkapi kin he otanin.

¹⁴ Qa Itancan kin en, hunkawanjin kiciyapi kin ota, miye makaśkapi kin on, sanpa nina waditakapi, qa kokipeśniyan wicoie kin taninyan oyakapi ece.

¹⁵ Hunḣ waakinicapi qa winawizipi kin on, qa hunḣ iś waśtedakapi kin on Messiya oyakapi ece.

¹⁶ Hena e waakinicapi kin on, wowicake eciyatanhan śni Messiya kin oyakapi, qa makaśkapi kin en wokakije kokijuya aupi kta kecinpi;

¹⁷ Qa unmapi kin iś waśtekidapi kin on etanhan, wotanin waśte mdusuta kta e on emahdepi kin sdonyapi.

¹⁸ Ecin to; toketu Kaśta, wohnaye on etanhan, qa iś awicakehan, unma tukte kakeś, oyakapi kin he on imduśkin, qa eeś nakun imduśkin kta.

¹⁹ Nitawocekiyepi, qa Jesus Messiya Taniya wawokiye cin on, he wiconi emicicetu kta sdonwaya.

²⁰ Qa nina awocanmi qa ape manka, hecen takudan on imaśtece kte śni, tuka ohinniyan waditagya waun kin he iyecen nakaha mitancan kin on Messiya yuonihanpi kte, wani qa mate kte cin unma tukte kaśta on etanhan.

²¹ Wani kin he Messiya ee, qa maṭe cinhan sanpa tanyan waun kta.

²² Wicaceḣpi kin en opeya wani kinhan, mioḣan waskuyeca kin hee, tuka unma tukte wacin nun tanin śni.

²³ Taku nom aoṭins mayanpi; ekta mde c̣a Messiya kici waun kte ḣinca, he iyotan waśte.

²⁴ Tuka wicaceḣpi kin en opeya waun kin he niyepi on wawokiyapi kin hee.

²⁵ Hecen wahdukcan, qa heon wani, qa niyepi owasin om waun kta sdonwakiya, sanpa inicagapi qa wacinyan iduśkinpi kte cin heon.

²⁶ Qa hecen akeś ekta ciupi kinhan miye on, Jesus Messiya en sanpa nina iduskinpi kta.

²⁷ Tuka Messiya tawootanin waśte kin eciyatanhan yanipi nunwe; hecen wanciyakapi wau kinhan, qa iś wau śni, unina tukte kaśta, nioḣanpi kin nawaḣon kta, wicotawacin wanjidan en sutaya yaunpi, qa wicanagi wanjidan yuha wotanin waśte kin wacinyan oyecipapi kin.

²⁸ Qa tona toka niyanpi kin hena on, ihnuhan taku ininihanpi kin: hee hena en wicotakuni śni au kta yuotanin, tuka heon niyepi kin en wiconi Wakantanka etanhan au kta otanin.

²⁹ Messiya he ayuco nic̣upi, iye wacinyayapi kte c̣a, nakun iye on kakiśniyanpi kte cin.

³⁰ Qa makakije cin wanmayadakapi qon, qa nakaha en mau nayaḣonpi kin, he iyecen wokakije duhapi kta.