Philemon 1 - Dakota Wowapi Wakan Kin

¹ Palos, Jesus Messiya on, kaśka hnakapi kin he, qa Timotheos sunkaunyanpi kici, Philemon waśte unkidapi qa ounkiyapi ece kin,

² Qa nakun Apphia waśteundakapi kin, Arcippos kici amakicita kin he kici, qa yati ohna okodakiciye kin, witaya wowapi unnicagapi:

³ Wowaonśida, wookiye ko, Wakantanka Ateunyanpi, qa Jesus Messiya Itancan kin etanhan, nicipi un nunwe.

⁴ Wocekiye epa eca, ohinniyan ciksuye c̣a, on Wakantanka wopida ewakiya ece:

⁵ Jesus Itancan kin wacinyaye c̣a waśte yadaka, nakun tona owotanna un kin owasin, he nawaḣon kin heon;

⁶ Hecen wacinyaye cin owicayaqu kin he sanpa waśaka aye kta, on taku waśte owasin, Jesus Messiya eciyatanhan, unkiyepi en un kin he yutaninpi kta.

⁷ Mihunkawanji, wacanyakiye cin heon nina unkiyuśkinpi, qa unkicanptapi, tona owotanna un kin hena cantepi kin iyuśkinwicayaye cin heon etanhan.

⁸ Qa heon taku iyokipi kin Messiya en itancanyan econ ciśi kta owakihi:

⁹ Tuka wacantkiyapi kin eciyatanhan ceciciya ce, Palos he miye, wanna wimacaḣinca, qa nakaha Jesus Messiya on kaśka mahnakapi waun.

¹⁰ Hecen Onesimos micinkśi, makaśkapi kin icunhan micinca wakage cin hee on ceciciya.

¹¹ He ehanna takudan nicamna śni, tuka nakaha miye omakiye c̣a nakun niye oniciya okihi. He nakaha hde waśi.

¹² Niye he iyowinkiya wo, minagi kin hee kaeś iyececa.

¹³ He yuha waun kta wacin, wotanin waśte kin on etanhan makaśkapi icunhan niye eekiya omakiye kte cin heon.

¹⁴ Tuka token yacin kin sdonye śni waun takudan ecamon kte śni; taku waśte econ niśipi kin he iyecen ecanon kte śni, tuka niye cinka econ wacani kta he wacin.

¹⁵ He iye anpetu tonana aniyuśtan, ake ohinniyan yahduhe kta heon etanhan hecon naceca.

¹⁶ Wanna wowidake unpi kin iyecece śni, tuka wowidake kin ikapeya waśte, hunkawanjinkiciyapi waśtekidapi kin iyecen; miś hecen wacin wakiyuze cin, niye iyotan hecen wacin yakiduze kta, wicaceḣpi qa Itancan kin nakun eciyatanhan hunkawanjinyaye kta.

¹⁷ Kodayapi iyecen mayaduha hecinhan, he miye iyecen ake ehdaku wo.

¹⁸ Taku icakiśniye c̣a, taku iyohiniciciye śni hecinhan, he miciyawa wo.

¹⁹ Palos he miye, minape kin on de owawa, he miye wakajuju kta. Qa taku miyecicajuju śni, niye atayedan ocowasin yaun kin he caje mdate śni.

²⁰ Han, mihunkawanji, Itancan kin en niye on imduśkin kta; Itancan kin en micante kin iyuśkinmayan wo.

²¹ Waanayagoptan kta imdukcan, heon wowapi cicaga; qa epe cin sam iyeya ecanon kta sdonwaya.

²² Tipi tukten manke kte cin he nakun wiyeya emicihnaka wo; wocekiye ehapi kin on etanhan niyepi on makiyuśkapi kta epca waun.

²³ Epaphras, Jesus Messiya on, kici makaśkapi kin he nape niyuza;

²⁴ Qa Markos, Aristarkos, Demas, qa Lukas miciḣtanipi kin hena nakun.

²⁵ Jesus Messiya Itancan unkiyapi towaonśida kin ninagi kin kici un nunwe. Amen.