Olianyanpi kin 9 - Dakota Wowapi Wakan Kin

¹ Unkan Salos waaiapi tin wicaktepi ko Itancan waonspewicakiye cin awicapogan, wośna kagapi itancan kin en i;

² Qa Damaskos en omniciye tipi kin ekta wowapi da; hecen canku kin de ohna yakonpi kin tona iyewicaye kte cin, wica winyan ko, Jerusalem ekta kaśka awicahdi kta e heon.

³ Unkan icimani ye cin Damaskos ikiyedan ya; unkan ihnuhanna ojanjan wan maḣpiya eciyatanhan ihdukśan iyoyanpa.

⁴ Hehan makata hinḣpaye c̣ehan, wicaho wan naḣon, Salos, Salos, tokeca śicaya mayakuwa he, eciya.

⁵ Unkan iś; Itancan nituwe he, eya. Hehan Itancan kin iś; Jesus śicaya yakuwa kin he miye; can pesto kin nayaḣtake cin he teḣika ce, eya.

⁶ He cancan qa yuśinyaye ca; Itancan taku ecamon yacin he, eya. Unkan Itancan kin; Najin qa otonwe kin ekta ya wo, token ecanon kte cin oniciyakapi kta ce, eciya.

⁷ Unkan wicaśta om icimani kin yuśinyaya najinpi, wicaho kin naḣonpi tuka tuwedan wanjakapi śni.

⁸ Unkan Salos maka kin etanhan najin qa iśta kamdaya hehan, tuwedan wanyake śni; unkan nape on yus ayapi, qa Damaskos ekta aipi.

⁹ Unkan anpetu yamni wawanyake śni un; qa takudan yute śni qa yatke śni.

¹⁰ Unkan Damaskos en waonspekiyapi wan, Ananias eciyapi, he wowihanmde en Itancan kin; Ananias, eciya. Unkan iś; Itancan, de miye ce, eya.

¹¹ Hehan Itancan kin heciya; Najin qa canku wan Owotanna eciyapi kin he ekta ye c̣a Judas ti kin en Salos eciyapi, Tarsos etanhan he akita wo; wanna cekiya un;

¹² Qa wowihanmde wan en wicaśta wan Ananias eciyapi tin hiyu, qa tonwe kta e on nape on aputake cin he wanyaka ce.

¹³ Hehan Ananias ayupta; Itancan, wicota etanhan wicaśta kin he Jerusalem ekta, tona owotanna wicaduhe cin taku śica ecawicakicon kin hena nawaḣon;

¹⁴ Qa deciya nakun wośna kagapi kin eciyatanhan wowaśake yuha un, tona nicaje hoyekiyapi kin hena owasin wicakaśke kta ce, eya.

¹⁵ Tuka Itancan kin iś heciya; Hunktiya wo, wakśica wakaḣnige cin he wanji ee, micaje kin Ikcewicaśta, qa wicaśtayatapi kin Israel cinca ko itokam yuha un kta:

¹⁶ Qa micaje kin on taku token kakije kte cin he wakipazo kta ce, eya.

¹⁷ Hehan Ananias ye c̣a, tipi kin timahen iyaye c̣a, nape on aputake c̣a heya; Salos mihunkawanji, yatonwe ca Woniya Wakan on onijudan kta e Itancan kin u maśi; Jesus canku ohna yau kin en taninic̣iye ciqon hee.

¹⁸ Unkan ihnuhanna taku hoceśpu kin iyececa iśta kin etanhan hinḣpaya; unkan ecahankeya tonwe c̣a najin, qa baptem qupi.

¹⁹ Unkan taku yutapi icu qehan, waśaka aya. Unkan Salos anpetu tonana waonspewicakiyapi kin, Damaskos en yakonpi, hena om un.

²⁰ Qa kohanna omniciye tipi kin ohna Messiya he Wakantanka Cinhintku kin ee ce, eya oyaka.

²¹ Unkan tona naḣonpi kin owasin yuśinyayapi qa heyapi; Jerusalem ekta tona wicacaje kin de hoyekiyapi kin śicaya wicakuwa, qa nakaha wicakaśke c̣a, wośna kagapi kin ekta awicaye kta e on den hi kin he dee śni he.

²² Tuka Salos sanpa waśaka icage c̣a Juda wicaśta Damaskos ekta yakonpi kin hena inina yanke wicakiye c̣a, He Messiya kin ee e yawicaka.

²³ Wanna anpetu ota hehan Juda oyate kin he ṭe yapi kta e akiiapi.

²⁴ Tuka hecen konzapi kin he Salos sdonya. Unkan ktepi kta e anpetu hanyetu ko otonwe tiyopa kin awanhdakapi.

²⁵ Hehan waonspewicakiyapi kin hanyen icupi, qa makanopiye wan ohna otonwe conkaśke kin etanhan kun iyeyapi.

²⁶ Unkan Salos Jerusalem en hdi qehan, waonspewicakiyapi kin om un kta cin; tuka owasin kokipapi, qa wanna waonspekiyapi kin heca e wicadapi śni.

²⁷ Tuka Barnabas he icu, qa yewicaśipi kin en ahi, qa token tapehi Itancan kin wanyake c̣a, he okiye c̣a, token Damaskos ekta Jesus caje kin on waditagya oyake cin hena owicakiyaka.

²⁸ Unkan Jerusalem ekta otu un, qa timahen u qa tankan ya ece; qa Jesus Itancan kin on waśagya woyaka.

²⁹ Qa Helenes oyate kin om hdokinica. Tuka hena eqe he ktepi kta akitapi.

³⁰ Hunkawanjin kiciyapi kin he sdonyapi, unkan Kesareya ekta aipi, qa Tarsos heciya hde śipi.

³¹ Hehan okodakiciye kin Juda makoce kin owancaya, qa Gelile, qa Samaria ekta wookiye yuhapi, qa icagapi; qa Itancan kin kokipeyahan manipi, qa Woniya Wakan wicakicanpte cin en unpi, qa hecen ihduotapi.

³² Unkan Inyan makoce kin owasin opta iyaye c̣ehan, Ludda ekta wicaśta owotanna yukanpi kin hena en wicahiyohi.

³³ Qa wicaśta wan Eneas eciyapi hen wanyaka; he waniyetu śahdogan makan wanka, ṭaṭaka ececa.

³⁴ Unkan Inyan; Eneas Jesus Messiya asniniyan, najin qa owinja hdatata wo, eciya. Unkan ihnuhanna najin hiyaya.

³⁵ Unkan tona Ludda qa Saron en yakonpi kin owasin he wanyakapi, qa Itancan kin ekta ihduhomnipi.

³⁶ Unkan Joppa ekta waonspekiyapi wan Tabitha eciyapi, he Tatokadan eyapi kin he kapi; winohinca kin he oḣan waśte qa taku wacantkiya econ kin ojudan:

³⁷ Unkan he anpetu kin hena en wayazanka, qa ṭa iyaya. He yujajapi qehan, wankan tipi wan ekta ehnakapi.

³⁸ Unkan Ludda Joppa ikiyedan, qa Inyan hen un kin waonspewicakiyapi kin naḣonpi qon, heon wicaśta nom ekta ye wicaśipi, qa ecadan en wicau kta e iwahoyapi.

³⁹ Hehan Inyan najin qa hena om hda. Ekta i, unkan wankan tipi kin en aipi, unkan wiwazica kin owasin en najinpi, qa ohde wokoyake ko, Tabitha ni un qehan, kage ciqon hena pazo yankapi, qa ceyapi ece.

⁴⁰ Tuka Inyan hena owasin tankan iyewicaye c̣a, canpeśka makehde inajin qa wocekiye eya, hehan tancan wanke cin ekta ihdamna qa; Tabitha, najin wo, eya. Unkan iśta kamdaye c̣a Inyan wanyake c̣ehan iyotanka.

⁴¹ Unkan nape yekiye c̣a najinkiya; qa wicaśta owotanna wiwazica ko wicakico qehan, he ni un e wicakipazo.

⁴² Unkan Joppa owancaya he otanin, qa wicota Itancan kin wacinyanpi.

⁴³ Unkan Inyan anpetu ota Joppa en, wicaśta wakpanyan wan Simon eciyapi, he kici yanka.