Olianyanpi kin 8 - Dakota Wowapi Wakan Kin

¹ Unkan he ṭe cin Salos iyowinkiya. Unkan anpetu kin he en okodakiciye Jerusalem en un kin śicaya wicakuwapi tanka. Qa owasin Juda makoce qa Samaria ekta enanakiya iyewicayapi, yewicaśipi kin henana yapi śni.

² Unkan wicaśta awacin unpi kin heca Stephanos yuba ayapi, qa nina akiceyapi.

³ Tuka Salos okodakiciye kin yutakuni śni wicakuwa, tipi iyaza tin iyaye c̣a, wica winyan ko wicayuze c̣a, wicakaśka tipi kin en iyewicaya.

⁴ Heon etanhan tona enanaki ya iyayapi qon hena owancaya iyayapi, qa wicoie kin oyakapi ece.

⁵ Hehan Philip Samaria otonwe kin ekta apamahde iyaye c̣a, Messiya owicakiyaka.

⁶ Unkan oyate kin Philip taku wapetokeca econ kin naḣonpi qa wanyakapi qehan, taku tona oyake cin cante wanjidan on unagoptanpi.

⁷ Taku wakan śica hotankakiya hotaninyan tona wicayuhnaśkinyanpi kin etanhan inanpapi, qa tona ṭaṭapike cin huśtepi ko ota okizipi.

⁸ Unkan otonwe kin he en wiyuśkinpi tanka.

⁹ Unkan wicaśta wan Simon eciyapi, otonwe kin he en wanakaja tanhan wapiyapi econ, qa Samaria oyate kin yuśinyewicaye c̣a, iye wicaśta tanka keic̣iya.

¹⁰ He owasin anagoptanpi, cistinpidan tankinkinyan ko, qa; Wakantanka towaśake tanka kin he dee ce, eyapi.

¹¹ Wanakaja tanhan wapiyapi econ kin on yuśinyewicaye cin heon he anagoptanpi.

¹² Tuka Wakantanka tokiconze kin, qa Jesus Messiya caje kin eciyatanhan taku Philip oyake cin hena wicadapi qehan baptem wicaqupi, wica winyan ko.

¹³ Qa Simon iś eya wicada, qa baptem qupi; hehan Philip kici un, qa wowakta taku wapetokeca tanka ko wanyake cin heon yuśinyaya.

¹⁴ Unkan Jerusalem ekta yewicaśipi kin, Samaria Wakantanka oie kin icupi kin he naḣonpi qehan, Inyan qa Johannes kici ekta ye wicaśipi.

¹⁵ Hena e ekta apamahde hipi, qa Woniya Wakan icupi kta heon wocekiye ewicakiciyapi.

¹⁶ He nahaḣin tuwedan ahinhe śni, Jesus Itancan caje kin on baptem wicaqupi kin hecedan.

¹⁷ Hehan nape on awicaputakapi, unkan Woniya Wakan kin icupi.

¹⁸ Unkan yewicaśipi kin nape on awicaputakapi kin he eciyatanhan Woniya Wakan wieaqupi kin he Simon wanyaka, hehan mazaska wicakahi;

¹⁹ Qa heya; Tuwe nape on awaputake cinhan he Woniya Wakan icu kta e wowaśake kin he maqu po.

²⁰ Tuka Inyan heciya; Mazaska nitawa kin niye kici atakuni śni nunwe. Taku Wakantanka wicaqu ece kin he mazaska on opetonpi kta kecanni kin heon etanhan.

²¹ Wicoie kin de en oyape śni qa takudan nitawa śni; Wakantanka itokamya nicante kin owotanna śni.

²² Heon etanhan taku śice cin de on iyopeic̣iye c̣a, Wakantanka cekiya wo, nicante taku awacin kin nicicajujupi nun ce.

²³ Nahanḣin pizi pa ḣinca, qa woaḣtani icaśke kin en yaun e wanmdaka ce.

²⁴ Hehan Simon ayupte c̣a heya; Taku ehapi kin takudan mahiyahde kte śni heon niś ito miye on Itancan kin cekiya po.

²⁵ Unkan wanna yaotaninpi, qa Itancan oie kin oyakapi qehan, Jerusalem ekta icicawin hdapi, qa Samaria otonwe ota kin en wotanin waśte kin oyakapi.

²⁶ Unkan Itancan taohnihde ye cin Philip okiye c̣a heciya; Najin qa itokaḣkiya, canku wan Jerusalem hetanhan iyaye c̣a Gaza en iyoḣpaye cin he en i wo, he ḣewoskan kin ee.

²⁷ Hehan iye najin, qa iyaya. Unkan iho, Ethiopa wicaśta wan yunokos heca, Ethiopa wicaśtayatapi winoḣinca, Kandake eciyapi, he ihukuya wicaśta tanka, qa woyuha tawa kin, owasin kiciyuha un kin, he Jerusalem ekta cekiye kta e i.

²⁸ Qa he wanna hde c̣a canpahmihma ohna kiyotanke c̣a, Isaya wicaśta wokcan kin he yawa yanka.

²⁹ Unkan Woniya Wakan kin Philip heciya; Ekta ye c̣a canpahmihma kin de kici ya wo.

³⁰ Hehan Philip ekta inyang ye c̣a Isaya wicaśta wokcan kin yawa yanke cin he naḣon qa; Taku dawa kin he oyakaḣniga he, eciya.

³¹ Unkan; Tuwedan onspemakiye śni ecin token owakihi kta he, eye c̣a, Philip en u qa kici iyotanke kta, keya.

³² Wowapi yawa yanke cin iapi kin he dee; Taḣinca wan ktepi kte cin en aipi, qa tacincadan hin wicayuśda kin itokam inina yanke cin, he iyecen iś iye i hdukawa śni.

³³ Wicawaḣpanica en un qehan, yacopi kin he ekiciyakupi; qa wicoicage tawa kin tuwe oyake kta he; wiconi tawa kin maka kin etanhan ayapi ce.

³⁴ Hehan yunokos kin Philip ayupte c̣a heciya; Ceciciya ce, tuwe on wicaśta wokcan kin hena hecen eya he, iye ic̣ica qa iś wicaśta tokeca ka.

³⁵ Hehan Philip i hdukawa qa wowapi kin he etanhan ie c̣a Jesus e okiyaka.

³⁶ Unkan canku kin ohna hdapi, qa mini yuke cin wan iyohipi. Hehan yunokos kin; Mini wanyaka wo, baptem maqupi kta e taku teḣinda kta he, eya.

³⁷ Unkan Philip, Nicante kin ocowaein on wicayada kinhan enicicetu kta, eciya. Hehan iś ayupte c̣a; Jesus Messiya he Wakantanka Cinhintku kin ee wicawada ce, eya.

³⁸ Hehan canpahmihma kin owanji yanke śi; qa mini kin ekta kun iyayapi, Philip qa yunokos kin; unkan baptem qu.

³⁹ Unkan mini kin etanhan hdicupi qehan, Itancan Taniya kin Philip eyaku, qa yunokos kin ake wanyake śni; unkan canku kin ohna iyuśkinyan hda.

⁴⁰ Tuka Philip Azotos ekta iyekiyapi; qa otonwe kin owasin opta ye c̣a wotanin waśte kin oyaka, ecen Kesareya ekta iyohi.