Olianyanpi kin 7 - Dakota Wowapi Wakan Kin

¹ Hehan wośna kagapi itancan kin heya; Hena hecetu he.

² Unkan iye hehan heya; Wicaśta hunkawanjinciyapi, ateciyapi ko anamagoptan po. Wowitan Wakantanka kin, Abraham ateunyanpi Mesopotamia en ounye ciqon, Carran en ahiti kin he itokam, en ikpazo;

³ Qa heciya; Nita makoce qa nitakuye kin etanhan ya wo, qa makoce wan cicipazo kte cin he ekta u wo, eciya.

⁴ Hehan Kaldeya makoce kin etanhan hiyu qa Carran en ahi ti. Hen atkuku kin ta, unkan hetanhan makoce kin en nakaha oununyanpi kin den ahi ti.

⁵ Unkan tawa kte cin siha oahe kin hinskokeca qu śni, tuka he yuhe kta qa iyohakam cinca kin yuhapi kta e qu kta iwahoya; nahaḣin cinca wanica.

⁶ Unkan Wakantanka kaken eya; He cinca kin makoce tokeca en unhdaka unpi kta; unkan hen wowidake wicayuhapi, qa waniyetu opawinge topa hehanyan śioaya wicakuwapi kta.

⁷ Qa oyate kin hena wowidag wicayuhapi kte cin he wicamdaco kta; qa he iyohakam ctanhan hiyupi kta qa makoce kin den ohomadapi kta ce, Wakantanka eya.

⁸ Hehan bakiḣdayapi wicoope kin he qu. Unkan hecen Isaak cincaya, qa anpetu iśahdogan hehan bakiḣdaya. Isaak Jakob cincaya; qa Jakob hunkakewicayapi akenonpapi qon cincawicaya.

⁹ Unkan hunkakewicayapi qon Joseph inakiwizipi, qa Egupta ekta wiyopekiyapi. Tuka Wakantanka kici un;

¹⁰ Qa wokakije kin owasin etanhan ehdaku, qa Pharo Egupta wicaśtayatapi kin itokam wowaonśida woksape ko qu; unkan Egupta en wicaśta itancan kaga, qa iye ti kin ocowasin en.

¹¹ Hehan Egupta makoce Kanan ko owancaya wicaakiḣan, qa nina wicakakija; unkan hunkake wicunyanpi kin taku yutapi iyeyapi śni.

¹² Tuka hehan Egupta heciya wamnaheza yukan, Jakob naḣon, unkan hunkake wicunyanpi kin tokaheya ekta ye wicaśi.

¹³ Unkan inonpa hehan, Joseph hunkawanjinwicaye cin sdonkiyewicakiye, c̣a hehan Joseph otakuye kin Pharo en oyakapi.

¹⁴ Hehan Joseph atkuku kin wahoye c̣a kico, qa takuwicaye cin owasin nakun, wicanagi wikcemna śakowin sanpa zaptan.

¹⁵ Hecen Jakob Egupta ekta apamahde iyaye c̣a hen ṭa, iye qa nakun hunkake wicunyanpi kin:

¹⁶ Unkan Sucem ekta awicayapi, qa wicahnakapi wan, Abraham Sucem atkuku Emmor he cinca kin, mozaska on, opewicakicaton qon he en wicahnakapi.

¹⁷ Tuka anpetu wahoyapi, Wakantanka Abraham konza iwahoye ciqon he wanna kiyadan u, hehan oyate kin icage c̣a Egupta en ihduotapi.

¹⁸ Hehan wicaśtayatapi tokeca wan Joseph sdonye śni kin he icaga.

¹⁹ Unkan he qe takuwicunyanpi kin wicahnaye c̣a, hunkake wicunyanpi kin śicaya ecawicakicon, hecen hokśiyoqopa kin nipi kte śni e tankan eḣpewicakiyapi qon.

²⁰ He ehan Moses tonpi, he qe hokśiyopa owanyag waśte ḣinc̣a; unkan wi yamni hehanyan atkuku ti kin ohna icaḣkiyapi.

²¹ Qa tankan eḣpeyapi, hehan Pharo cunwintku kin eyaku, qa iye cinca kin hecen icaḣya.

²² Unkan Moses Egupta oyate wicokeape kin owasin onspekiyapi, qa wicoie, wicoḣan ko on waśaka.

²³ Unkan wanna waniyetu wikcemna topa, hehan hunkawanjitku Israel cinca kin wanwicahdag ye kta wacinyuza.

²⁴ Qa wanji śicaya ecakiconpi kin he wanhdake c̣ehan, okiye c̣a śicaya ecakiconpi qon he tokicic̣on, qa Egupta wicaśta kin kaśtaka.

²⁵ Hunkawanjitku kin, iye nape kin on Wakantanka wiconi wicaqu kte cin he iyukcanpi kta kecin, tuka okaḣnigapi śni.

²⁶ Ihanḣanna hehan ake kicizapi kin en taninic̣iye c̣a wookiye wicakicage kta wacin qa heya; Wicaśta hunkawanjin yeciyapi, tokeca śicaya ecayeciconpi he.

²⁷ Tuka tuwe takodaku kin śicaya ecakicon kin he paha iyeye c̣a, Tuwe unkiyepi en wicaśta itancan qa wayaco nicaga he.

²⁸ Egupta wicaśta ḣtanihan yakte qon he iyecen mayakte kta he, eya.

²⁹ Wicoie kin de on Moses nape c̣a Madiyan makoce kin en ḣewotahedan un, qa hen hokśidan nom cinca wicaya.

³⁰ Unkan wanna waniyetu wikcemna topa ihunniyan, hehan ḣewoskan makoce kin en Sina Paha kin hetu, can yuḣaḣa wan ohna peta ide kin en, Itancan taohnihde wan taninic̣iya.

³¹ Unkan Moses he wanyake c̣ehan, wowanyake kin on yuśinyaya; qa tanyan wanyake kta e on kiyedan ya, hehan Itancan ho kin en tanin;

³² Qa, Nihunkake Wakantanka tawapi kin he miye; Abraham ta Wakantanka, Isaak ta Wakantanka, qa Jakob ta Wakantanka kin, eya. Unkan Moses cancan qa ekta etonwan okihi śni.

³³ Unkan Itancan kin heciya; Nitahanpe kin hduśdoka wo, tukten nayajin kin he maka wakan ce.

³⁴ Ekta ewatonwe c̣a, Egupta en mitaoyate token kakijapi kin he wanmdake c̣a comnihdazipi kin nawaḣon, qa wicawakiyuśke kta e on kun hibu; unkan nakaha u wo, Egupta ekta ye ciśi kta.

³⁵ Moses aktapi śni qa; Tuwe wicaśta itancan qa wayaco nicaga he, eciyapi qon he Wakantanka wicaśta itancan wanikiya ko kage c̣a ye śi, maḣipiya ohnihde can yuḣaḣa kin en taninic̣iye cin he nape kin on.

³⁶ Unkan hee tankan awicau, qa taku on yuśinyayapi wapetokeca ko, Egupta makoce kin en, Mde śa ekta, qa ḣewoskan makoce kin etu, waniyetu wikcemna topa hehanyan econ.

³⁷ Moses Israel cinca kin; Hunkawanjin wicayayapi etanhan wicaśta wokcan wan miye iyemaceca, Itancan Wankantanka nitawapi kin icaḣniciciyapi kta, he anayagoptanpi kta ce, ewicakiye ciqon he dee.

³⁸ Qa ḣewoskan makoce kin ekta okodakiciye kin kici un qon hee, Sina paha kin etu, maḣpiya ohnihde kin okiye c̣a nakun hunkake wicunyanpi kin; qa be wiconi oie kin unqupi kta e icu.

³⁹ Unkan hee kin hunkake wicunyanpi kin anagoptonpi cinpi śni, tuka ḣeyata iyeyapi, qa cantepi kin en Egupta ekta hdapi.

⁴⁰ Qa Aaron heciyapi; Taku wakan unkitokam yapi kte cin unkicaga po; Moses Egupta makoce kin etanhan unkaupi qon he tokiya iyaya sdonunyanpi śni ce.

⁴¹ Unkan anpetu kin hena en ptejicadan wan kagapi, qa wakagapi kin he taku wakiyuśnapi, qa iye nape kagapi kin on wiyuśkinpi.

⁴² Hehan Wakantanka ihduhomni, qa maḣpiya ohnaka kin ohodapi kta e awicayuśtan; wicaśta wokcan tawowapi en kagapi kin he iyececa; Israel tikin woteca ktepi wośnapi ko, ḣewoskan makoce kin en, waniyetu wikcemna topa hehanyan mayaqupi he.

⁴³ Unkan ito Molok tawakeya kin, qa Remphan taku wakan yadapi wicanḣpi tawa kin he iyacupi; hena wakagapi kin itokam canpeśka makehde inayajinpi kta e yakagapi: Unkan ito Babulon akotanhan aciyapi kta ce.

⁴⁴ Hunkake wicunyanpi kin ḣewoskan makoce kin en waaya tanin wakeya kin yuhapi; tuwe Moses okiye c̣a, token wanyake cin he iyecen kage kta keciye ciqon, hee yuśtan qon iyececa.

⁴⁵ He hunkake wicunyanpi kin icupi, qa Joshua kici Ikecwicaśta tamakoce kin en ahipi, hena e Wakantanka hunkake wicunyanpi itepi kin etanhan ḣeyata iyaye wicaya, Dawid taanpetu kin hehanyan;

⁴⁶ He Wakantanka itokam wowaonśida iyeye c̣a, Jakob ta Wakantanka kin tipi wan iyekiciciye kta cin.

⁴⁷ Tuka Solomon tipi wan kicaga.

⁴⁸ Hececa tuka, Iyotan Wankan un kin tipi wicanape on kagapi kin ohna ti śni; wicaśta wokcan hecen eye ciqon;

⁴⁹ Maḣpiya kin he oiyotanke mitawa kin ee, qa maka kin he misiha oahe kin hee; ecin tukte tipi miyecagapi kta he, qa tukten ozimic̣iye kta he.

⁵⁰ Minape kin taku henana owasin kage śni he, Itancan kin eya ce.

⁵¹ Tahu nisutapi, qa cante noge ko baniciḣdayapi śni kin, ohinniyan Woniya Wakan kin yakipajinpi, nihunkakepi econpi qon he niye iyenicecapi.

⁵² Wicaśta wokcan kin tukte wanji e nihunkakepi kin śicaya kuwapi śni he. Wanji Owotanna un kin he u kte cin tona oyakapi qon hena wicaktepi; qa he qe niś niyepi wanna iyopeyayapi qa yaktepi.

⁵³ Maḣpiya ohnihde ahipi kin he eciyatanhan woope kin iyacupi, tuka tanyan yeciyuhapi śni ce, eya.

⁵⁴ Unkan hena taku kin naḣonpi hehan, cante kin ekta nina iyoyakapi, qa hi ahdakokokapi.

⁵⁵ Tuka iye Woniya Wakan kin ojudan maḣpiya ekta opaḣta yanke c̣a, Wakantanka towitan kin, qa Jesus Wakantanka etapa kin eciyatanhan najin e he wan yaka;

⁵⁶ Qa heya; Wanyaka po, maḣpiya kin yuzamnipi, qa Wicaśta Cinhintku kin Wakantanka etapa kin eciyatanhan najin e wanmdaka ce, eya.

⁵⁷ Hehan hotankakiya hotaninpi, qa nogepi kin ohmus hduzapi, qa tawacin wanjidan on iyaḣpayapi;

⁵⁸ Qa otonwe kin tankan eḣpeyapi, qa inyan on kininpi. Unkan waayataninpi kin wokoyake kin kośka wan, Salos eciyapi, he siha kin en ekihnakapi.

⁵⁹ Unkan Stephanos inyan on kininpi, he icunhan cekiye c̣a heya, Jesus Itancan, minagi kin ehdaku wo.

⁶⁰ Hehan canpeśka makehde inajin qa hotankakiya hoyekiya; Itancan woaḣtani kin de iyepi kin en awicau śni wo. Hena hecen eye c̣a hehan iśtinma iyaya.