Olianyanpi kin 6 - Dakota Wowapi Wakan Kin

¹ Unkan anpetu kin hena en, waonspewicakiyapi kin wanna wicota aya qehan, Helenes Hebrew oyate kin wicabapi, anpetu otoiyohi wapamnipi kin en wiwazica wicayuhapi kin hena awicatonwanpi śni kin heon etanhian.

² Hehan akenonpapi kin waonspewicakiyapi kin owasin wicakicopi qa hewicakiyapi; Wakantanka oie kin unkayuśtanpi, qa wahna wotapi wiyeya eunhnakapi kte cin hecetu śni.

³ Heon hunkawanjin unniyanpi enitanhanpi wicaśta owotanna yawapi, qa Woniya Wakan wicoksape ko on ojupidan śakowin wicakaḣniga po, wicoḣan kin de yuhe wicunkiyapi kta.

⁴ Tuka unkiye qe cekiyapi qa wicoie oyakapi kin en ohinniyan ye unkic̣iyapi kta ce.

⁵ Unkan wicoie kin he oyate kin owasin iyokipipi; qa Stephanos, wicaśta wan wacinyanpi Woniya Wakan ko ojudan, kin he kaḣnigapi, qa Philip, qa Procoros, qa Nikanor, qa Timon, qa Parmenas, qa Nikolas Antiyoka ekta en opekiyapi qon.

⁶ Hena yewicaśipi kin wicacokaya ewicahdepi; unkan wocekiye eyapi, hehan nape on awicaputakapi.

⁷ Unkan Wakantanka oie kin icage c̣a Jerusalem en waonspewicakiyapi kin nina ota aya; qa wośna kagapi kin ota nakun wacinyanpi kin en opapi.

⁸ Unkan Stephanos wowacinye wowaśake ko on ojudan, taku on yuśinyayapi, qa wapetokeca tanka econ, oyate kin en.

⁹ Unkan wicaśta wanjikji omniciye tipi wan, Wicakiyuśkapi tawapi eciyapi kin hetanhan, qa Kurene qa Aleksandre wicaśta kin, qa Kilikia qa Asia etanhanpi, hena en inajinpi qa Stephanos kici hdokinicapi.

¹⁰ Tuka Woksape Woniya ko on ie cin he okihipi śni.

¹¹ Hehan wicaśta opewicatonpi, unkan hena e, Wicaśta kin de Moses qa Wakantanka nakun wicoie śica ewicakiya, naunḣonpi ce, eyapi.

¹² Hecen oyate kin, qa hunkawicayapi, wowapi kagapi ko iyowicapaśtakapi; unkan anatan hipi, qa yuzapi, qa omniciye kin en ahipi.

¹³ Qa oitonśni waayatanin kin heca najin wicakiyapi; hena iś heyapi; Wicaśta kin de tipi wakan kin de wicoope ko on taku śica eye cin ayaśtan śni.

¹⁴ Jesus Nazareth etanhan qon he tipi kin de ihangye c̣a, wicoḣan Moses unqupi qon hena yutokeca kta ce, eya naunḣonpi ce.

¹⁵ Unkan omniciye kin en iyotankapi kin owasin opaḣta yukanpi, qa ite kin he maḣpiya ohnihde wan ite kin iyececa wanyakapi.