Olianyanpi kin 5 - Dakota Wowapi Wakan Kin

¹ Tuka wicaśta wan Ananias eciyapi, tawicu Sapphira kici, maga wan wiyopekiya;

² Qa mazaska apa anakiḣbe, tawicu kin iś nakun sdotkiya; unkan apa ahi, qa yewicaśipi kin sihapi kin en ehnaka.

³ Tuka Inyan heciya; Ananias, tokeca e Woniya Wakan kin oiyaton kte śni e Satan nicante kin en ocowasin iyoḣpaya, qa maga iyopeyapi kin apa anayakiḣman he;

⁴ Nahaḣin ecen un qon he ehan yahduhe śni he; qa wiyopekiyapi kin he ehan nakun nitawa śni he. Tokeca nicante ekta hecen econ wacani he. Wicaśta akantu kin hee śni, tuka Wakantanka en iyatonśni ce.

⁵ Unkan Ananias hena oie kin naḣon qehan, hinḣpaye c̣a ṭa iyaya. Unkan tona hena taku kin naḣonpi kin owasin nina wikopapi.

⁶ Unkan kośka kin najinpi, qa opazuntapi, qa tankan ayapi, qa ḣapi.

⁷ He iyohakam wihiyayedan oape yamni, hehan tawicu kin taku econpi qon sdonye śni ecen tin hiyu.

⁸ Unkan Inyan heciya; Kana on maga iyopeyakiyapi he, omakiyaka wo. Unkan iś; Han, kana on, eya.

⁹ Unkan Inyan; Token on sakim Itancan Taniya kin iyutanyayapi kta ecen wacinduzapi he. Wanyaka wo, tona nihihna ḣapi kin hena sihapi kin tiyopa kin en najinpi, qa niye nakun tankan aniyanpi kta, eciya.

¹⁰ Hehan iś eya hecehnana iye siha kin ekta hinḣpaye c̣a ṭa iyaya. Unkan kośkapi qon en hiyupi, qa wanna ṭa e wanyakapi, hehan iś eya tankan ayapi, qa hihnaku kin kici ḣapi.

¹¹ Unkan okodakiciye kin ocowasin, qa tona hena taka kin naḣonpi owasin nina wikopapi.

¹² Unkan yewicaśipi kin napepi kin on oyate kin en wowinihan wicoḣan qa wowapetokeca ota econpi. Unkan owasin wicacante wanjidan yuha Solomon omanipi tawa kin ohna yukanpi.

¹³ Qa wicaśta tokeca tuwedan en owicapa okihi śni, tuka oyate kin wicakinihanpi.

¹⁴ Qa tona wicadapi kin sanpa ota Itancan kin en opapi, wica winyan ko wicota.

¹⁵ Hecen tona wicayazan kin hena tankan awicaupi, qa canku otoiyohi ohna, ohehdepi qa owinja ko akan ahiwicahnakapi, Inyan hen hiyaye cinhan hunḣ ohanzi wicaye kte cin heon.

¹⁶ Unkan, otonwe itan ihdukśan kin hena etanhan wicota Jerusalem en hipi, qa tona wayazanpi, tona taku wakan śica wicayuhnaśkinyanpi ko en awicahipi; unkan owasin asnipi.

¹⁷ Hehan wośna kagapi itancan kin najin hiyaye c̣a, tona om un kin, Saddukee wicowazi kin etanhanpi, hena winawizipi on ojupidan;

¹⁸ Qa nape on yewicaśipi kin iyawicahpayapi, qa wicakaśka tipi ikceka kin ohna ewicahnakapi.

¹⁹ Tuka Itancan taohnihde ye cin he hanyen wicakaśka tipi tiyopa kin yuzamni, qa tankan awicau qa heya;

²⁰ Hunktiya po, tipi wakan kin ohna inajinpi qa wiconi kin de wicoie kin owasin oyate kin owicakiyaka po.

²¹ He naḣonpi unkan hanḣenna ḣin tipi wakan kin timahen yapi, qa wowicakiyakapi. Hehan wośna kagapi itancan, qa tona om un kin hena witaya iheyapi, qa omniciye tanka kin mniciye wicaśi, Israel cinca hunkawicayapi kin owasin koya; unkan wicakaśka tipi kin ekta wicahuweye wicaśipi.

²² Tuka akicita kin wicakaśka tipi kin en hipi, qa iyewicayapi śni, hehan hośi hdapi;

²³ Qa heyapi; Awicakehan wicakaśka tipi kin sutaya onotakapi ecen iyeunyanpi, qa tiawanyag wicakiyapi kin tiyopa kin itokam najinpi; tuka unyuḣdokapi qehan, tuwedan en wanunyakapi śni.

²⁴ Unkan wośna kagapi itancan, qa tipi wakan en itancan kin, wośna kagapi kin hena koya, hena wicoie kin naḣonpi qehan, he toketu kta hecinhan iyukcanpi śni.

²⁵ Hehan wanji en hi qa; Iho, wicaśta wicakaśka tipi kin en ewicayahnakapi qon hena tipi wakan kin ohna inajinpi qa oyate kin waonspewicakiyapi ce, eya owicakiyaka.

²⁶ Hehan akicita tancan kin akicita ko ekta yapi qa iwaśtedan awicaupi, oyate kin inyan on wicakininpi kta e kokipapi heon etanhan.

²⁷ En awicahipi qa omniciye kin wicaookaya najin wicakiyapi; unkan wośna kagapi itancan kin wiwicawanga,

²⁸ Qa heya; Wicacaje kin de on wowicayakidakapi kte śni, nina unkeniciyapi śni he; unkan iho, woonspe nitawapi kin on Jerusalem ojudan yayapi, qa wicaśta kin de we kin en unkayaupi kta wacannipi.

²⁹ Hehan Inyen, yewicaśipi kin om, awicayupte c̣a heya; Wicaśta akantu hee śni, tuka Wakantanka hee e anaungoptanpi kta iyececa.

³⁰ Jesus yaktepi qa can akan otkeyayapi qon he atewicunyanpi ta Wakantankapi kin hduecetu:

³¹ Hee kin Wakantanka wankan ehdaku, iye nape etapa kin ekta Itancan qa Wanikiya un kta, Israel ihduecetupi qa woaḣtani kajujupi kin wicaqu kta e heon.

³² Unkan unkiye, iye on, wicoie kin hena unkoyakapi ece, qa Woniya Wakan tona Wakantanka anagoptanpi wicaqu kin, he iś eya hena yuotanin ece.

³³ He naḣonpi qehan canteptanyanpi, qa ṭewicayapi kta e akiiapi.

³⁴ Hehan Pharisee wan Gamaliel eciyapi, woope waonspekiya, qa oyate kin en okinihan, he omnic̣iye kin en najin, qa yewicaśipi kin cistiyedan tankan aye wicaśi:

³⁵ Qa hehan hewicakiya; Israel wicaśta, wicaśta kin dena taku ecawicakicon wacannipi kin he itonpa po.

³⁶ Anpetu kin dena itokam Thudas icaga, he taku wicaśta keiciya; unkan wicaśta opawinge topa ecetu ihakam yapi; tuka he iye ktepi, qa tona wicadapi qon owasin enanakiya iyewicayapi qa takuni śni aya.

³⁷ Qa he iyohakam Judas Galile etanhan, owicawapi anpetu kin he ehan inajin, qa oyate ota ihakam awicaya; he nakun ihangyapi, qa tona wicadapi qon owasin enanakiya eyaya.

³⁸ Heon nakaha heciciyapi; Wicaśta kin dena wiciḣeyata najinpi, qa awicayuśtan po; wokonze qa wicoḣan kin de wicaśta akantu kin etanhan hecinhan atakuni kte śni;

³⁹ Tuka Wakantanka eciyatanhan un kinahan; yujuju oyakihipi śni; okinni Wakantanka kici yeciza dukanpi kta naceca, eya.

⁴⁰ Unkan he anagoptanpi, qa yewicaśipi kin wicakipanpi, qa wicakapsinpsintapi qehan, Jesus caje kin on woyake śni wicaśipi, qa wicakiyuśkapi.

⁴¹ Unkan iye omniciye kin etanhan hdapi, qa Jesus caje kin on wowiśtece en awicaupi iyececa wicayawapi kin heon wiyuśkinpi.

⁴² Qa anpetu otoiyohi tipi wakan kin ohna, qa tipi iyaza wahokonwicakiyapi, qa Jesus Measiya oyakapi ayaśtanpi śni.