Olianyanpi kin 4 - Dakota Wowapi Wakan Kin

¹ Unkan hena hecen oyate kin ewicakiyapi kin icunhan, wośna kagapi, qa tipi wakan en itancan kin, Saddukee ko en wicahipi;

² Oyate kin waonspewicakiyapi, qa Jesus eciyatanhan wiconte etanhan woekicetu kin he oyakapi kin heon śihdapi;

³ Qa nape on iyawicaḣpayapi, qa wicakaśka tipi kin en iyewicayapi, ihanḣanna kte cin hehanyan; wanna ḣtayetu nakaeś.

⁴ Tuka wicoie naḣonpi qon hena wicota wicadapi; unkan wicaśta kektopawinge zaptan ecetu.

⁵ Unkan ihanḣanna hehan, wicaśta itancanpi, hunkawicayapi kin, wowapi kagapi ko;

⁶ Qa Annas wośna kagapi itancan, qa Kaiaphas, qa Johannes, qa Aleksandros, qa tona wośna kagapi itancan takuwicaye cin hena koya Jerusalem en mniciyapi.

⁷ Unkan wicacokaya ewicahdepi, qa wiwicawangapi; Taku wowaśake, qa tuwe caje kin on hecanonpi he, cyapi.

⁸ Hehan Inyan Woniya Wakan on ojudan, hecen ewicakiya; Oyate en wicaśta itancanpi, qa Israel hunkawicayapi kin;

⁹ Anpetu kin de wicaśta huśte qon tanyan ecakiconpi, qa token on okizi kin, he on wiunyanungapi hecinhan;

¹⁰ Niyepi owasin, qa Israel oyate kin owasin de sdonya po, Jesus Messiya Nazareth etanhan, icipaweḣ oyakatanpi qon, Wakantanka wicaṭe cin etanhan ekicetuye cin, he caje on wicaśta kin de nitokam okizi najin.

¹¹ Inyan kin de ticagapi yaunpi kin ayaktapi śni, tuka he oise en itancan kin ee.

¹² Qa tuwe tokeca eciyatanhan wanikiyapi kin yuke śni; qa wicacaje tokeca maḣpiya kin ihukuya wicaśta wicaqupi, on unnipi kte cin wanica ce.

¹³ Unkan Inyan qa Johannes waditakapi kin he wanyakapi, qa taku ota onspeic̣iciyapi śni qa wicaśta ikceka kin hecapi e sdonyapi qehan, nina yuśinyayapi, qa hena Jesus kici unpi qon he iwicayukcanpi.

¹⁴ Qa wicaśta okiziyapi qon he wiciyopeya najin wanyakapi; unkan taku awicayuptapi kte cin takudan yuhapi śni.

¹⁵ Tuka omniciye kin etanhan tankan ye wicaśipi, hehan he akiiapi;

¹⁶ Qa iyakitedan hekiciyapi; Wicaśta kin dena token ecawicunkiconpi kta hwo; wowapetokeca tanka kin de econpi kin he tona Jerusalem en yakonpi kin owasin sdonyapi, qa anaunḣmanpi kta unkokihipi śni.

¹⁷ Tuka he oyate kin en anaptapi kta e heon nina wakokipe wicunkicagapi kta, qa caje kin de on tohinni wicaśta wowicakiyakapi kte śni, unkeyapi kta ce.

¹⁸ Unkan hehan wicakicopi, qa Jesus caje kin on takudan ie śni, qa waonspekiye śni wicaśipi.

¹⁹ Tuka Inyan Johannes kici awicayuptapi qa heyapi; Wakantanka itokam, niyepi anaunnigoptanpi kta, qa iś Wakantanka anaungoptanpi kta, unma tukte owotanna kin, niś iyukcan po.

²⁰ Taku sdonunyanpi qa naunḣonpi qon hena oyake śni unyakonpi kta e unkokihipi śni.

²¹ Hehan ake wakokipe wicakicagapi tamwicakiyopi, qa hde wicaśipi, taku on taku iyawicaonpapi kta takudan iyeyapi śni, oyate kin on etanhan; taku econpi kin heon owasin Wakantanka yatanpi.

²² Wicaśta wookizi wowapetokeca kin he en econpi qon he wanna waniyetu wikcemna topa sam iyeya.

²³ Unkan kihdewicayapi, hehan iye takodawicayapi kin ekta hdapi, qa wośna kagapi, hunkawicayapi kin ko, taku token ewicakiyapi qon owasin ohdakapi.

²⁴ Unkan hena naḣonpi qehan, witaya Wakantanka hoyekiyapi qa heyapi; Itancan Wakanṭanka he niye, maḣpiya, maka, miniwanca qa taku ohnaka ko owasin yakaga.

²⁵ Dawid nitaokiye kin i kin eciyatanhan kaken ehe cin; Tokeca e Ikcewicaśta kin oqoyapi, qa oyate kin taku ecinśniyan yukcanpi he.

²⁶ Maka wicaśtayatapi kin najin hiyaye c̣a, wicaśta itancanpi kin witaya mniciyapi, Itancan kin en, qa Sdakiye ciqon he nakun.

²⁷ Awicakehan Jesus Nicinkśi wakan sdayakiye ciqon he en, Herod, qa Pontiyos Pilate, Ikcewicaśta, Israel oyate ko mniciyapi;

²⁸ Ehanna taku, ninape nitawacin ko on, econ yakonze ciqon, he ecen econpi kta heon etanhan.

²⁹ Unkan nakaha, Itancan, token wakokipe unkicagapi kta tamunkiyapi kin he wanyaka wo; qa nitaokiye kin nioie nina waditagya oyakapi kta e wicaqu wo;

³⁰ Wawokiziya on ninape kin yahdugate cin heon; qa Jesus Nicinkśi wakan caje kin on taku wapetokeca, qa on yuśinyayapi kte cin hena econpi kta.

³¹ Unkan wocekiye eyapi, hehan tukten witaya yukanpi kin he yuhuhuzapi, qa owasin Woniya Wakan kin on ojupidan, qa Wakantanka oie kin waditagya oyakapi.

³² unkan wicota wicadapi kin hena wicacante wanjidan wicanagi wanjidan ko yuhapi; qa taku tonpi kin tuwedan, De mitawa ce, eye śni; tuka taku owasin witaya yuhapi.

³³ Unkan yewicaśipi kin hena wowaśake tanka on Jesus Itancan piya ikicage cin he oyakapi; unkan wowaśte tanka owasin en un.

³⁴ Unkan hena tuwedan takudan icakije śni unpi: tuka tona maga, qa tipi yuhapi qon hena wiyopekiyapi, qa taku wiyopeyapi kin on taku icupi kin he ahipi,

³⁵ Qa yewicaśipi kin siha hdepi kin en ehnakapi: unkan wicaśta otoiyohi taku token cinpi kin hecen pamni wicaqupi ece.

³⁶ Unkan Joses, he yewicaśipi kin Barnabas, eya cajeyatapi qon, Wicakicanpte cinhintku kin, eyapi kin he kapi, Lewi wicowazi qa Kupros makoce kin etanhan;

³⁷ Hee makoce onśpa hduhe cin wiyopekiye c̣a mazaska kin hdohi, qa yewicaśipi siha hdepi kin en ehnaka.