Olianyanpi kin 3 - Dakota Wowapi Wakan Kin

¹ Unkan hehan Inyan qa Johannes kici, tipi wakan kin ekta kaitawankanhde yapi, napcinwanka ape cin, wocekiye eyapi ece kin hehantu.

² Unkan wicaśta wan tonpi kin ehantanhan huśte un kin he yuha ahipi, anpetu otoiyohi tipi wakan tiyopa wan, Waśte eciyapi kin he en ehdepi, tona tipi wakan tin yapi kte cin hena taku wicakida kte cin heon.

³ Hee Inyan Johannes kici tipi wakan kin timahen yapi kta wanwicayake c̣a, taku wicakida.

⁴ Unkan Inyan opaḣta, qa Johannes kici, qa, Ekta unkatonwan po, eya.

⁵ Taku okini kta kecin qa hecen anawicagoptan yanka.

⁶ Hehan Inyan; Mazaska mazaskazi ko takudan mduhe śni, tuka taku mduhe cin cic̣u kta, Jesus Messiya Nazareth etanhan, he caje on najin, qa mani wo, eciya.

⁷ Qa nape etapa kin en yuze c̣a najin kiya; unkan ihnuhanna siha iśkahu ko waśag hinhda.

⁸ Hehan iye kin psin iyaye c̣a najin, qa mani, qa om tipi wakan kin timahen iyaya, mani qa psipsica, qa Wakantanka idowan.

⁹ He mani qa Wakantanka idowan kin oyate kin iyuḣpa wanyakapi;

¹⁰ Qa wicaśta tipi wakan, tiyopa Waśte eciyapi, kin en hiyotanke c̣a taku da ece qon he dee sdonyapi; qa taku ecakiconpi kin on etanhan nina inihanpi, qa yuśinyayapi.

¹¹ Unkan, wicaśta huśte qon wanna okizi kin he Inyan Johannes kici wicayus najin, hena en oyate owasin kiwitaya inyang iheyapi, qa nina yuśinyayapi, omanipi Solomon tawa kin hetu.

¹² Unkan Inyan he wanyake c̣ehan, oyate kin hewicakiya; Israel wicaśta, tokeca he on niyuśinyayapi, qa tokeca opaunḣtapi nayajinpi he; unkiye wowaśake qa wowaśte unhduhapi kin heon wicaśta kin de mani unyanpi kecanunyakinpi seca.

¹³ Abraham, qa Isaak, qa Jakob Wakantanka tawapi; hunkake wicunyanpi Wakantanka tawapi kin he Cinhintku Jesus wanna hdutan; he niyepi e wicayaqupi, qa Pilate itokam yakipajinpi, he iye kiyuśke kte ḣinca tuka.

¹⁴ Tuka Wanji Wakan qa Owotanna un kin he niye yakipajinpi, qa wicakte sa wan kiyuśkapi yacinpi.

¹⁵ Qa Wiconi Itancan kin he yaktepi; he qe Wakantanka wicaṭe cin etanhan najinkiye cin unkiye unkoyakapi ece.

¹⁶ Qa iye caje kin, caje wicadapi kin heon, wicaśta kin de wandakapi qa sdonyayapi kin he yuwaśaka; han, iye wacinyanpi kin he wicaśta kin de tanyan okiziya, niyepi owasin en.

¹⁷ Unkan nakaha mihunkawanji, iyukcan śni hecanonpi, qa wicaśta itancan wicaduhapi kin hena nakun, he sdonwaya.

¹⁸ Tuka Wakantanka Messiya token kakije kte cin, wicaśta wokcan kin owasin i kin eciyatanhan, oyake ciqon hena he en hduecetu.

¹⁹ Heon ihduecetupi, qa ihduhomni po; hecen wayaḣtanipi kin nicicajujupi kta ce; tohan anpetu yuecetupi kin Itancan itohnake kin eciyatanhan u kinhan;

²⁰ Qa Jesus Messiya oniciyakapi qon he uśi kta.

²¹ He qe maḣpiya kin ekta eyakupi kta, taku owasin ekicetuyapi kta anpetu kin hehanyan, Wakantanka maka icage cin hetanhan wicaśta wokcan wakan wicahduhe cin owasin i kin eciyatanhan oyake ciqon hee.

²² Moses iye qe hunkakeyapi kin hewicakiya; Nihunkawanjipi kin etanhan wicaśta wokcan wanji, miye iyemaceca, Jehowa Wakantanka nitawapi kin icaḣniciciyapi kta; he taku eniciyapi kte cin owasin anayagoptanpi kta.

²³ Qa wicanagi otoiyohi, wicaśta wokcan kin he anagoptan śni kinhan, he oyate kin etanhan ihangyapi kta ce.

²⁴ Unkan wicaśta wokcan owasin, Samuel hetanhan, tona iyohakam woyakapi qon anpetu kin dena cajeyatapi.

²⁵ Wicaśta wokcan cincapi kin he niyepi, qa wicoun Wakantanka hunkake wicunyanpi wicakicage ciqon, he qe Abraham heciya; Unkan nicinca kin on etanhan wicowazi maka akan un kin owasin yawaśtepi kta ce.

²⁶ Wakantanka iye Cinhintku Jesus najinkiye c̣a niyawśśtepi kta e on niyepi tokaheya en u śi, otoiyohi wayaḣtanipi kin etanhan ihduhomni niyanpi kta e heon.