Olianyanpi kin 23 - Dakota Wowapi Wakan Kin

¹ Unkan Palos omniciye kin opawicuḣta yanke c̣a, Wicaśta hunkawanjin ciyapi, Wakantanka itokam mitawacin oc̣owasin waśte, anpetu kin dehan wani, eya.

² Unkan Ananias wośna kagapi itancan kin, tona ikiyadan najinpi kin Palos i kin ohna ape wicaśi.

³ Hehan Palos heciya, Conkaśke skayapi kin, Wakantanka anipe kta ce; wicoope kin eciyatanhan mayadaco kta e yahidotanka tuka wicoope kaśeya amape wicayasi.

⁴ Unkan tona en najinpi kin, Wakantanka wawayuśna itancan tawa kin he śicaya owayakiya he, eyapi.

⁵ Unkan Palos, Hunkawanjinciyapi, he wawayuśna itancan kin ee sdonwaye śni, eya; Wowapien kaken kagapi, Nitaoyate kin en wicaśta itancan kin daśice kte śni ce.

⁶ Tuka apa Saddukee, qa apa iś Pharisee kin hecapi e Palos iyukean qehan, hehan omniciye kin en hotankakiya heya; Pharisee kin hemaca, qa nakun Pharisee cinhintku kin, qa wicaṭe cin piya ikicagapi kte cin ape waun kin heon etanhan nakaha mayacopi ce.

⁷ Unkan hecen eye c̣ehan, Pharisee Saddukee kin om hdokinicapi, qa omniciye kin akipam iyeyapi.

⁸ Piya ikicagapi kin wanica, qa maḣpiya ohnihde, wanagi ko wanica ce, Saddukee kin eyapi ece; tuka Pharisee kin, Napin yukan ce, eyapi ece.

⁹ Hecen nina owodutaton, qa wowapi kagapi Pharisee etanhanpi kin hena inajinpi, qa wicakigepi, qa heyapi, Wicaśta kin de en taku śica takudan iyeunyanpi śni; tuka wanagi, qa maḣpiya ohnihde wan taku okiyake cin he hecetu kinhan, Wakantanka kici unkicizapi kte śni.

¹⁰ Nina hdokimcapi, unkan Palos yuśpaśpa icupi kta e akicita tancan tanka kin kokipe c̣a, heon akicita kin kun ye wicaśi, hena wicacokaya tanhan icupi, qa conkaśke kin mahen akupi kta.

¹¹ Unkan he iḣtayetu, hehan Itancan kin en hinajin qa, Palos cante waśte wo, Jerusalem en mayadaotanin kin he iyecen Roma ekta mayadaotanin kta ce, eciya.

¹² Unkan anpa kamdeze cin, hehan Juda wicaśta wanjikji okodakiciye wan kagapi, qa witaya ic̣iconzapi, takudan yutapi kte śni, qa takudan yatkanpi kte śni, Palos ktepi śni kin hehanyan kta, keyapi.

¹³ Wakiconzapi kin hena wicaśta wikcemna topa aktonpi.

¹⁴ Unkan hena wawayuśna tankapi, qa hunka wicayapi ko en wicayapi, qa heyapi; Palos unktepi śni kin hehanyan, takudan untapi kte śni e wokonze on unkiconzapi.

¹⁵ Heon etanhan hanḣanna, niye omniciye kin owasin om akicita tancan tanka kin he au yaśipi kta, taku sanpa atayedan inungapi kta seca e heon; qa unkiś he ikiyadan aupi śni, hehan unktepi kta e wiyeya unkanpi kta ce, eyapi.

¹⁶ Unkan hena naḣmana iyape yukanpi kin he Palos tonśkaku kin naḣon qehan, hehan ekta ye c̣a conkaśke kin timahen i, qa Palos okiyaka.

¹⁷ Hehan Palos akicita tancan wanji kico qa, Kośka kin de akicita tancan tanka kin ekta aya wo, taku okiyake kta ce, eya.

¹⁸ Unkan heon he icu, qa akicita tancan tanka kin ekta ai qa, Palos kaśkapi un kin he mico, qa kośka kin de cicahi kta e econ maśi, taku oniciyake kta keya ce, eya.

¹⁹ Hehan akicita tancan tanka he nape yuze c̣a kiciśnana icunom iyaye c̣a, Taku omayakidake kta he, eya iwanga.

²⁰ Unkan, Heyakecinhan Juda wicaśta kin omniciye kin en Palos au niśipi kta wanna konzapi, taku sanpa atayedan iwangapi kta seca e heon heyapi.

²¹ Tuka niś awicayupte śni wo. Wicaśta wikcemna tom aktonpi kin wokonze on wakiconzapi, Palos ktepi śni hehanyan takudan yutapi kte śni qa takudan yatkanpi kte śni, hena nakaha wiyeya yukanpi qa niś awicadupte kte cin he ape yukanpi, eya.

²² Hehan akicita tancan tanka kośka qon hdicu ye c̣a, Hena omayakidake cin he tuwedan sdonye ye śni wo, eciya.

²³ Qa hehan akicita tancan nom wicakico qa, Akicita opawinge nom taku owasin on wicayuwiyeya po, qa nakun śuktanka akan yotankapi kin wikcemna śakowin, qa wahukeza yuhapi kin opawinge nom, hanyetu kin oape iyamni, hehan Kesarea ekta yapi kta ce.

²⁴ Nakun śuktanka wiyeya ehnaka po, Palos akan yankekiyapi kta, qa Phelika wicaśta itancan yanke cin he en tanyan aipi kta, ewicakiya.

²⁵ Hehan wowapi wan kaken kaga:

²⁶ Kladios Lusias, Phelika wicaśta itancan iyotan waśte kin wowapi kicaga ce. Wookiye.

²⁷ Wicaśta kin de Juda wicaśta kin icupi, qa wanna ktepi kta hehan akicita hduha en wai, qa etanhan iwacu, he Roma wicaśta kin heca e nawaḣon kin heon.

²⁸ Qa taku iyaonpapi kin he tanyan sdonwaye kta wacin, heon iye omniciye yuhapi kin en awai;

²⁹ Qa iye wicoope hduhapi kin eciyatanhan wiwangapi kin iyaonpapi wanmdaka, tuka taku on ktepi, qa kaśkapi kta e iyaonpapi kin takudan iyewaye śni.

³⁰ Qa wicaśta kin de Juda wicaśta naḣmana iyape yukanpi kin he omakiyakapi qehan, kohanna niye ekta aye wicawaśi, qa tona taku en aupi kte cin hena hecen iyaonpeya eniciye wicawaśi. Tanyan yaun nun we.

³¹ Hehan akicita iś econ wicaśi qon iyecen Palos hanyen icupi, qa Antipatris en aipi;

³² Qa hanḣanna hehan śuktanka akan yotankapi kin hena hetanhan ayapi kta e eḣpewicayapi, qa conkaśke kin ekta hdicupi.

³³ Unkan hena iś Kesarea ekta ipi, qa wicaśta itancan wowapi qon qupi qehan, hehan Palos itokam ehdepi.

³⁴ Unkan iye he yawa, qa makoce kin tukte e etanhan un hecinhan wiwanga; qa Kilikia etanhan un kin he sdonya;

³⁵ Hehan, Tohan tona taku iyanionpapi kin hena nakun hipi kinhan, hehan miś eya naciḣen kta ce, eya; qa Herod woyaco tipi tawa qon he ohna awanyag wicaśi.