Olianyanpi kin 18 - Dakota Wowapi Wakan Kin

¹ Hena iyohakam Palos Athenas ayuśton, qa Korinth ekta i:

² Qa hen Juda wicaśta wan iyeya, Akula eciyapi, Pontos en tonpi, qa aśkatudan Italia etanhan hiyu, tawicu Priskila kici; Kladios Juda wicaśta kin owasin Roma ayuśtan wicaśi kin heon etanhan. Unkan hena en wicahi;

³ Qa kici wicoḣtani okonwanjidan, heon om un, qa om ḣtani, wakeya kagapi kin hecapi.

⁴ Qa anpetu wakan eca omniciye tipi kin ohna wowicakiyaka ece, qa Juda oyate Helenes ko cinwicakiya.

⁵ Unkan Silas qa Timotheos Makedonia etanhan hiyupi qa en hipi qehan, Palos nagi kin ekta iyopaśtag ic̣iye c̣a, Jesus he Messiya kin ee ce, Juda oyate kin owicakiyaka.

⁶ Unkan hena e wakipajinpi, qa śicaya iapi kin, hehan Palos wokoyake aihdatata, qa hewicakiya, Niwe kin nipapi kin akan niunpi nunwe, miye mabapica śni waun, detanhan Ikcewicaśta kin ekta mde kta ce.

⁷ Unkan hetanhan tankan ye c̣a, wicaśta wan Wakantanka ohoda, Justos eciyapi he ti kin omniciye tipi kin ikiyadan han; unkan tipi kin he en tin iyaya.

⁸ Unkan Krispos, omniciye tipi kin en itancan kin, he Itancan kin wacinyan, tiyohnaka owasin om; qa Korinth oyate kin wicota naḣonpi qehan wicadapi, unkan baptein wicaqupi.

⁹ Unkan hehan hanyen wowihamde en, Itancan kin Palos heciya, Ihnuhan taku koyakipe cin, tuka nina ie c̣a, inina yanke śni wo.

¹⁰ Miye cicica, qa tuwedan kiuniniye kta e iyaniḣpaye kte śni; otonwe kin de ohna oyate ota wicamduha ce, eya.

¹¹ Unkan hen wi ake śahdogan hehanyan iyotanke c̣a, Wakantanka oie kin onspewicakiya.

¹² Unkan Galiyo Akeya makoce kin en itancan un kin, hehan Juda oyate witaya Palos takpe ipi, qa woyaco oiyotanke kin en ahipi;

¹³ Qa, Woahope kin eciyatanhan śni Wakantanka cekiyapi kta e wicaśta kin onspewicakiye cin he dee ce, eyapi.

¹⁴ Unkan Palos i hdukawa kta, hehan Galiyo Juda oyate kin hewicakiya; Juda wicaśta kin, de taku śica econpi, qa is wicaśtaśniyan oḣanyanpi kin hee unkanś, naciḣonpi kta iyececa tuka:

¹⁵ Tuka wicoie, qa wicacaje, qa woope nitawapi on wiwangapi kin heca hecinhan, niś ito ekta etonwan po; taku hececa on wimdukcan kte śni ce.

¹⁶ Hehan woyaco oiyotanke kin etanhan kaḣam iyewicaya.

¹⁷ Unkan Helenes wicaśta kin owasin Sosthenes, omniciye tipi kin en itancan kin he, icupi, qa woyaco oiyotanke kin itokam apapi. Tuka Galiyo hena taku kin ekta ewacin śni yanka.

¹⁸ Unkan he iyohakam Palos anpetu ota hen yanke c̣ehan, hunkawanjin kiciyapi kin awicayuśtan, qa Suria ektakiya watom iyaya, Priskila Akula kici opapi Kenkreya ekta paha kin bakiśda, hecen ic̣iconza kin heon.

¹⁹ Hehan Ephesos ekta iyohi, qa hen eḣpewicaya; tuka iye kin omniciye tipi kin en tin iyaye c̣a, Juda oyate kin om wohdaka.

²⁰ Unkan en tehan owanji yanke kta e cinpi eśta wicada śni:

²¹ Tuka napewicayuze c̣a, Jerusalem ekta wośnapi u kte cin he en owape kta, tuka Wakantanka iyokipi kinhan, ake en cihdipi kta ce, eya. Hehan Ephesos etanhan watom iyaya.

²² Qa Kesareya en huta ekta ihunni, qa ḣen ihe c̣a okodakiciye kin napewicayuze c̣ehan, Antiyoka ekta apamahde iyaya.

²³ Qa anpetu ota hen un kin, hehan Galatia qa Phrugia makoce kin owancaya ye c̣a, waonspewicakiyapi kin owasin waśag wicakiya.

²⁴ Unkan Juda wicaśta wan, Apolos eciyapi, Aleksandrea en tonpi, wicaśta wayapike c̣a wowapi wakan on waśaka, he Ephesos ekta hi.

²⁵ Wicaśta kin he Itancan tacanku kin onspe, qa nagi kata, heon ninana ie c̣a, Itancan taku tawa kin onspewicakiya, Johannes baptem tawa kin hecedan sdonya tuka.

²⁶ Hee omniciye tipi kin ohna waditagya ia; unkan Akula qa Priskila naḣonpi qehan, he icupi, qa Wakantanka tacanku kin sanpa tanyan okiyakapi.

²⁷ Unkan Akeya ekta ye wacin, hehan hunkawanjin kiciyapi kin heciya wowapi wicakicagapi, qa he iyowinkiyapi kta e iwahokonwicakiyapi. He heciya i, qa tona wowaonśida kin on wicadapi qon hena nina owicakiya;

²⁸ Qa Juda oyate kin omniciye en nina awacin wicaye c̣a, wowapi wakan kin eciyatanhan Jesus he Messiya kin ee e yatanin.