Olianyanpi kin 16 - Dakota Wowapi Wakan Kin

¹ Hehan Derbe qa Lustra ekta iyohi; unkan iho, waonspekiyapi kin wanji hen un, Timotheos eciyapi, Juda winoḣinca wicake cin he cinhintku, tuka atkuku kin e Helenes oyate kin etanhan.

² Hunkawanjin kiciyapi Lustra, qa Ikonium en yukanpi kin hena, he waśte e oyakapi.

³ Hetanhan Palos kici ya cin, qa Juda wicaśta hen unpi kin hena on, he icu qa bakiciḣdaya; atkuku kin Helenes heca e owasin sdonyapi.

⁴ Unkan otonwe iyaza yapi, qa yewicanśipi kin, kunka wicayapi ko, Jerusalem en yukanpi kin woahope kagapi qon hena tanyan yuhe wicaśipi.

⁵ Hecen okodakiciye kin wacinyanpi kin en wicayusutapi, qa anpetu otoiyohi nina yuota aya.

⁶ Unkan Phrugia qa Galatia makoce kin opta iyayapi, qa Asia en wicoie kin oyakapi kte cin Woniya Wakan kin teḣinda qchan;

⁷ Hehan Musia ekta ipi, qa hetanhan Bithunia ekta ye wacinpi, tuka Woniya kin iyowicaki śni.

⁸ Unkan Musia opta iyayapi qehan, Troas en iyohipi.

⁹ Unkan hanyen Palos wowanyake wan wanyaka; Wicaśta wan Makedonia etanhan taninyan inajin, qa cekiye c̣a, Makedonia en u, qa ounkiya po, eya.

¹⁰ Wowanyake kin do wanyake cin heon hinnakaha Makedonia heciya unyanpi kta e uncinpi, Itancan kin hena wotanin waśte kin owicunkiyakapi kta cin heon unkicopi e unhdukcanpi.

¹¹ Hecen Troas etanhan pacanan iyeunyanpi, qa Samotrake ekta owotanna unyanpi, qa hetanhan ihanḣanna Neapolis en unkipi.

¹² Qa hetanhan Philippi en unkipi, otonwe teca qa Makedonia makoce onśpa kin he en otonwe tokapa kin hee. Qa anpetu tonana otonwe kin he en unkanpi.

¹³ Unkan anpetu wakan hehan, otonwe kin etanhan inaunpapi, qa wakpa wan icahda wocekiye eyapi ece qon he en unkipi; hen unkiyotankapi, qa winoḣinca ece en mniciyapi kin hena owicunkiyapi.

¹⁴ Unkan winoḣinca wan, Ludia eciyapi, Thuatira otonwe kin etanhan, wokoyake duta ece wiyopeye cin heca, Wakantanka kokipeyahan un he naḣon yanka: unkan cante kin Itancan kin yuzamni, on Palos oie kin anagoptan.

¹⁵ Unkan tiyohnaka kin om baptem qupi qehan, hehan ceunkiyapi qa, Itancan kin on wicawaka kecanmayakinpi hecinhan, wati kin en tin upi, qa ohna yukan pe, eye c̣a ecen econ unkiyapi.

¹⁶ Hetanhan wocekiye eya unyanpi eca, wicinyanna wan itkounkipapi ece, he taku wakan woyaka ece kin yuhe c̣a, wakanyan wohdag un kin heon tawayapi kin taku ota wicakicamna.

¹⁷ He Palos unkiyepi ko unkihakam u, qa; Wicaśta kin dena Wakantanka tehan wankantuya un kin taokiye wicaye cin, wiconi canku kin unkokiyakapi kin hena eepi ce, eya hoyekiya.

¹⁸ Qa anpetu ota hecen econ. Tuka Palos nagiyeye cin heon hakikta qa, Jesus Messiya caje on winoḣinca kin de etanhan tankata inanpe ciśi, taku wakan kin eciya. Unkan wihijayedan oape kin he en tankan hiyu.

¹⁹ Unkan winoḣinca kin de yuhapi kin heepi, taku kamnanpi kte cin he akitakunipi śni kin he wanyakapi e etanhan, Palos Silas kici wicayuzapi, qa tipi hocoka kin ekta wicaśta tokahe wicakiyapi kin en awicayapi:

²⁰ Qa wicaśta itancan wicakiyapi kin en wicakaipi, qa heyapi, Wicaśta kin dena Juda wicaśta kin hecapi, otonwe unkitawapi kin nina nagiyeyapi;

²¹ Qa wicoḣan onspewicakiyapi kin hena e, Roma wicaśta heuncapi kin, unkicupi qa unkopapi kta e iyecece śni.

²² Unkan oyate kin owasin witaya takpe wicaupi; qa wicaśta itancan wicakiyapi kin wokoyake awicayupotapi, qa wicakapsinpsinte wicaśipi.

²³ Unkan ota awicapapi, hehan wicakaśka tipi kin en iyewicayapi, qa tipi awanyake cin sutaya wicayuhe śipi.

²⁴ He hecen econ śipi, unkan wicakaśka tipi temahentuya kin he en onawicataka, qa siha kin can on kaśkapi ece kin en sutaya kaśka wicahnaka.

²⁵ Unkan hanye cokaya hehan, Palos Silas kici Wakantanka cekiyapi, qa yatan dowanpi; unkan wicaśta wicakaśkapi kin he naḣonpi.

²⁶ Unkan ihnuhanna maka kin nina huhuzahan, qa tipi ahe cin hena yuhuhuzapi, qa tiyopa kin owasin kazamni iyaye c̣a, on pawicaḣtapi kin owasin mdecahan hinhda.

²⁷ Hececa, unkan wicakaśka tipi awanyag kiyapi kin kikta, qa tiyopa kin yuzamni han wanyaka, unkan wicaśta wicakaśkapi kin owasin kihdapi kecin, heon mazasagye ehdaku qa on ic̣ikte kta;

²⁸ Tuka Palos nina hoyekiye c̣a, Kiuniiciye śni wo, owasin den unkanpi ce, eya.

²⁹ Hehan petijanjan wan da, qa tin iyaye c̣a, cancan Palos Silas kici siha hdepi kin en eḣpeic̣iya;

³⁰ Qa tankan awicaye c̣a, Itancanpi wani kta e token ecamon kta he, ewicakiya.

³¹ Unkan, Jesus Messiya Itancan kin wacinyan wo, hecen nicinca om yani kta ce, eciyapi.

³² Qa Itancan oie kin okiyakapi, tona ti kin en yukanpi kin hena owasin koya.

³³ Unkan hanyetu kin wihiyayedan oape kin he en, iwicacu, qa oape kin wicakiyujaja, qa hehan baptem qupi, tiyohnaka owasin ko.

³⁴ Qa iye ti kin en awicaki qa won wicaya; qa tiyohnaka kin om wicada qa iyuśkin.

³⁵ Unkan wanna anpa qehan, itancan wicakiyapi kin akicita eyanpaha kin ekta ye wicaśipi, qa, Wicaśta kin hena wicakiyuśka wo, eyapi.

³⁶ Unkan wicakaśka tipi awanyake cin, hena oie kin Palos okiyake c̣a, Itancan wicakiyapi kin niciyuśkapi kta keya hośi hipi, heon etanhan tankan kinanpapi, qa wookiye hda po, eya.

³⁷ Tuka Palos hewicakiya, Roma wicaśta heuncapi, tuka unyacopi śni ecen taninyan unkapsinpsintapi, qa onatag eunhnakapi, qa hinnakaha anaḣbeya hde unśipi he: hiya, iye atayedan upi, qa tankan unkaupi kta, eya.

³⁸ Hehan akicita eyanpaha kin itancan wicakiyapi kin dena owicakiyakapi, unkan Roma wicaśta kin hecapi e naḣonpi kin heon inihanpi.

³⁹ Qa iye atayedan ekta ipi, qa cewicakiyapi, qa tankan awicaupi, qa otonwe kin etanhan hdapi kta icewicakiyapi.

⁴⁰ Unkan wicakaśka tipi kin etanhan tankata inanpapi, qa Ludia ti kin en ipi; qa hunkawanjin kiciyapi kin wanwicahdakapi, hehan wicakihnapi, qa etanhan tokan iyayapi.