Olianyanpi kin 12 - Dakota Wowapi Wakan Kin

¹ Unkan hehan Herod wicaśtayatapi kin okodakiciye kin wicakiyuśe kta e nape yekiya;

² Qa Jakob Johannes cincu qon he mazasagye on kte.

³ Qa he Juda oyate kin iyokipipi e wanyake c̣ehan, Inyan nakun yuze kta aya: aguyapi on napoḣyapi codan anpetu kin he ehan.

⁴ Unkan he iyaḣpaye c̣ehan, wicakaśka tipi kin en ehnake c̣a akicita ake śakpe awanyag wicaśi, wośnapi kin enakiyapi kinhan oyate kin ekta tankan au kta kecin.

⁵ Hecen Inyan wicakaśka tipi kin ohna awanyakapi; unkan on okodakiciye kin Wakantanka nina cekiyapi.

⁶ Unkan Herod wanna tankan au kta hehan, hanyetu kin he en Inyan akicita nom, unnia itan anokatanhan iśtinma wanke c̣a, maza icicaḣiḣa nom on iyakaśkapi, qa tiawanyag kiyapi kin hena tiyopa kin itokam wicakaśka tipi kin awanyakapi.

⁷ Unkan inyun, Itancan taohnihdeye cin en hi, qa ojanjan wan wicakaśka tipi kin en iyoyanpa; unkan Inyan cuwi kin en ape c̣a najin kiye c̣a heya; Kohanna najin wo. Unkan maza icicaḣiḣa kin nape kin etanhan hinḣpaya.

⁸ Hehan maḣpiya ohnihde kin; Ipihdag kiton qa hanpokihan wo, eciya. Unkan iś ecen econ. Hehan; Śina hdowin qa miyahna u wo, eciya.

⁹ Hehan tankan ya; unkan iś eya ihakam ye c̣a, maḣpiya ohnihde taku ecakicon kin he wicakapi kin sdonye śni; tuka wowanyake wan wanyaka kecin.

¹⁰ Unkan wicakaśta tipi tokaheya qa iyokihe kin etanhan hinanpapi, hehan maza tiyopa kin en iyohipi, he otonwe kin ekta iyahde, he iye cinka wicakiyuḣdog iyaya. Unkan tankan yapi, qa canku wanjidan ihunnipi, hehan maḣpiya ohnihde kin eḣpeya kihda.

¹¹ Unkan Inyan kiksuya hinhda qa heya; Nakaha awicakehan Itancan kin ohnihde tawa kin u śi, qa Herod nape kin, Juda oyate apepi ko, owasin etanhan emahdaku e sdonwakiya ce.

¹² Unkan he awakicin qehan, Johannes Markos eciyapi kin, he hunku Mary ti kin ekta i, hen wicota mniciyapi, qa cekiya yukanpi.

¹³ Unkan Inyan tipi tiyopa kin kabubu yanke cin he icunhan, wicinyanna wan Rhoda eciyapi, he ekta wanaḣon i:

¹⁴ Qa Inyan ho kin iyekiye c̣ehan, wowiy uśkin on tiyopa yuḣdoke śni, tuka inyang hdicu qa, Inyan tiyopa kin itokam najin e oyaka.

¹⁵ Unkan, Niyuhnaśkinyanpi ce, eciyapi. Tuka iś hecen eya kitan. Hehan, Maḣpiya ohnihde tawa kin hee ce, eyapi.

¹⁶ Tuka Inyan katinyan tiyopa kin kabubu yanka. Unkan yuḣdokapi qa wanyakapi hehan yuśinyayapi.

¹⁷ Tuka inina yukanpi kta e namwicakicawin, qa token on Itancan kin wicakaśka tipi kin etanhan tankan hiyu kiye cin he owicakiyaka. Qa heya, Jakob qa hunkawanjinkiciyapi kin hena oie kin owicakiyaka po. Hehan tankan kinape c̣a tokan iyaya.

¹⁸ Unkan anpa kamdeze cin hehan Inyan toki iyaye cin he akicita kin nina aoqoyapi.

¹⁹ Unkan Herod akita, tuka iyeye śni hehan, tiawanyag wicakiyapi kin hena wiwicawange c̣a, wicaktepi kta e konza. Qa hehan Juda makoce kin etanhan apamahde iyaye c̣a Kesareya en ounyan.

²⁰ Unkan Herod Turos qa Sidon oyatepi kin wicakize wacin; tuka hena e wicocante wanjidan en hipi, qa Blastos wicaśtayatapi ohehdepi tipi tawa kin awanyake cin he yuwaśtepi qehan, wookiye dapi; iye tamakocepi kin wicaśtayatapi tawa kin on icaḣyapi kin heon etanhan.

²¹ Unkan anpetu wan cajeyatapi qon he en Herod wicaśtayatapi ihduze c̣a, woyaco oiyotanke kin akan kiyotanke c̣a, wowicakiyaka.

²² Hehan oyate kin hotankakiya hotaninpi qa; He wicaho śni, Wakantanka ho kin hee ce, eyapi.

²³ Unkan ihnuhanna Itancan taohnihde ye cin he kaśtaka Wakantanka wowitan qu śni kin heon etanhan. Unkan wamduśkadan yutapi qa hecen ṭa iyaya.

²⁴ Tuka Wakantanka oie kin icage c̣a tankaya aya.

²⁵ Unkan Barnabas Salos kici wawokiyapi qon hduśtanpi qehan, Jerusalem etanhan hdicupi, qa Johannes Markos eciyapi qon he yuha hdapi.