Olianyanpi kin 11 - Dakota Wowapi Wakan Kin

¹ Unkan yewicaśipi kin hunkawanjinkiciyapi ko, Juda makoce kin en yakonpi qon, Ikcewicaśta Wakantanka oie icupi kin he naḣonpi.

² Unkan Inyan Jerusalem en hdi kin, hehan tona bakiḣdayapi kin etanhanpi qon he kici akinicapi;

³ Qa heyapi, Wicaśta bakiḣdayapi śni kin heca en wicayai, qa om wayata ce.

⁴ Hehan Inyan wohdake c̣a owasin ecekcen owicakiyake c̣a heya;

⁵ Joppa otonwe kin en, wocekiye eya waun, unkan wokiksuye śni wan en taku wowanyake wanmdaka, taku wan miniḣuha ska tanka iyececa, oise topa kin iciyakaśkapi maḣpiya kin eciyatanhan kun aupi, qa miye ekta mahiyohi.

⁶ He opaḣta manke c̣a awacin waun, unkan maka akan taku wahutopa, qa wamanica, qa watutka, qa maḣpiya okinyanpi kin wanmdaka.

⁷ Unkan wicaho wan; Inyan najin, qa kte, qa yuta wo, emakiye cin he nawaḣon.

⁸ Tuka miś; Itancan hecetu śni, taku ikceka qa aśape cin tohinni mii kin ohna iyaye śni, epa.

⁹ Tuka maḣpiya kin eciyatanhan wicaho kin ake amayupta; Taku Wakantanka pakinte cin he ikceka eciye śni wo, cya.

¹⁰ Yamni akihde hecen econpi, qa hehan maḣpiya kin ekta owasin hdokiyahdapi.

¹¹ Unkan ito wicaśta yamni, Kesareya etanhan miye ekta mahiyu śipi qon, hena wanna tipi ohna waun kin itokam hinajinpi.

¹² Hehan Woniya Wakan kin iś; Takudan ceṭunwicahda śni hena om yahde kta ce, emakiya. Unkan hunkawanjinkiciyapi kin dena śakpe om imdamde c̣a wicaśta qon he ti kin en unkipi.

¹³ Hehan iye, token maḣpiya ohnihde wan iye ti kin en hinajin wanyake ciqon he unkokiyakapi; hee kin kaken eciya; Joppa ekta wicaśta ye wicaśi, qa Simon Inyan eciyapi kin he u śi wo.

¹⁴ He taku eniciye kte cin on yani kta, qa nakun tiyohnaka nitawa kin owasin, eya ce, eya.

¹⁵ Unkan miś tokaheya iwae cin, hehan Woniya Wakan kin awicahinḣpaya, tokag ehan unkiyepi kin en hi qon iyececa.

¹⁶ Hehan Itancan oie qon weksuya; Awicakehan Johannes mini on baptem wicaqu, tuka niyepi kin Woniya Wakan on baptem nic̣upi kta ce eye ciqon he.

¹⁷ Hecen unkiye Jesus Messiya Itancan kin wicaundapi, Wakantanka taku unqupi qon he iyecen wicaqu kinhan, miś matuwe he, Wakentanka anawapte kta owakihi he.

¹⁸ Hena oie kin naḣonpi unkan inina yukanpi qa Wakantanka yatanpi qa heyapi; Awicakehan Ikcewicaśta on nipi kta e ihduecetupi kin Wakantanka wicaqu ce.

¹⁹ Unkan Stephanos ṭe cin on śicaya wicakuwapi qon, heon enanakiya iyewicayapi kin hena Phenike, qa Kupros, qa Antiyoka ekta ipi, qa wicoie kin Juda oyate kin ecedan owicakiyakapi.

²⁰ Unkan hena wanjikji Kupros qa Kurene wicaśta kin heca, hena Antiyoka en hipi qehan, Helenes wicaśta kin wowicakiyakapi, qa Jesus Itancan kin oyakapi.

²¹ Unkan Itancan nape kin hena om un, qa wicota wicadapi, qa Itancan kin ekta ihduhomnipi.

²² Hena taku kin okodakiciye Jerusalem en un kin nogepi in en otanin, hehan Barnabas Antiyoka ekta i kta e ye śipi.

²³ He ekta i, unkan Wakantanka towaonśida kin wanyake c̣ehan iyuśkin, qa cante kin ocowasin on Itancan kin opapi kta e owasip iwahokonwicakiya.

²⁴ He wicaśta waśte, qa Woniya Wakan wacinyanpi ko on ojudan. Unkan wicota Itancan kin opapi.

²⁵ Hehan Barnabas Salos akite kta e Tarsos ekta iyaya. He iyeya, unkan Antiyoka en ahdi.

²⁶ Qa waniyetu mdoketu ahna, tipi wakan kin en mniciyapi, qa oyate ota waonspewicakiyapi; unkan Antiyoka ekta, waonspewicakiyapi kin tokaheya Kristian ewicakiyapi.

²⁷ Unkan anpetu kin hena en, wicaśta wokcan Jerusalem etanhan Antiyoka ekta hipi.

²⁸ Hena wanji, Agabos eciyapi kin he inajin, qa maka kin owancaya wicaakiḣan wan tanka u kta e Woniya Wakan kin eciyatanhan oyaka. Unkan he Kladios Kesar taanpetu kin en ecetu.

²⁹ Unkan hehan waonspewicakiyapi kin otoiyohi, token okihipi kin, hecen hunkawanjitkupi Juda makoce kin en yakonpi kin, wawokiyapi kin wicaqupi kta e konzapi.

³⁰ Hecen econpi, qa Barnabas Salos kici napepi kin on hunka wicayapi kin wicakai wicaśipi.