Olianyanpi kin 10 - Dakota Wowapi Wakan Kin

¹ Unkan Kesareya en wicaśta wan Kornelioe eciyapi, akicita opawinge obe wanjidan, Italike eciyapi, kin he en itancan kin hee;

² Wicaśta wakinihan, qa Wakantanka kokipeyahan un, tiyohnaka kici; qa oyate kin nina cantewicakiya, qa ohinniyan Wakantanka cekiya un ece.

³ He qe anpetu wan en, napeinwanka apa hehantu, wowanyake wan en, Wakantanka taohnihde wan en hi, qa, Kornelios, eciye cin he taninyan wanyaka.

⁴ Unkan he opaḣta yanke c̣a inihan qa; Itancan taku he, eya. Unkan iś ito heciya; Wocekiye nitawa qa wacantkiya oyaḣande cin he Wakantanka itokam kiksuyapi.

⁵ Heon nakaha Joppa ekta wicaśta ye wicaśi, qa Simon Inyan eciyapi kin he kico wo.

⁶ Wicaśta wakpanyan wan Simon eciyapi ti kin miniwanca kahda han, he kici yanka. He token ecanon kte cin oniciyake kta ce.

⁷ Unkan maḣpiya ohnihde Kornelios okiye cin he wanna kihda, hehan tiawanyag wicakiye cin nom, qa akicita waśte ohinniyan tankiyadan wicahduhe cin wanjidan, hena wicakico;

⁸ Qa hena taku kin owasin owicakiyake c̣ehan, Joppa ekta ye wicaśi.

⁹ Unkan icimanipi, qa ihanḣanna wanna otonwe kin ikiyadan, hehan Inyan tipi kin akan wocekiye eya iyaya, wanna wiyotanhe cin hehantu.

¹⁰ Nina wotektehda, qa wote kta cin, tuka taku yutapi wiyeya ehnakapi kin he icunhan wokiksuye śni wan ahinḣpaya.

¹¹ Unkan maḣpiya kin yuzamnipi e wanyaka, qa heciyatanhan taku wan miniḣuha ska tanka iyececa, oise topa kin iciyakaśkapi he kutkiya u, qa maka kin ahe kiyapi.

¹² He ohna taku maka akan waḣutopa ocaje owasiri, qa woteca, qa watutka, qa maḣpiya okinyanpi kin.

¹³ Unkan wicaho wan tanin qa; Inyan, najin, qa kte, qa yuta wo, eciya.

¹⁴ Tuka iś; Itancan, hecetu śni, tohinni taku ikceka qa aśape cin wate śni ce, eya.

¹⁵ Unkan ake icinonpa wicaho kin tanin qa; Taku Wakantanka pakinte cin he ikceka eciye śni wo, eya.

¹⁶ Yamni akihde hecen econpi, qa hehan taku kin he maḣpiya kin ekta akiyahdapi.

¹⁷ Unkan Inyan wowanyake wanyake cin he taku kin iyukcan śni un, he icunhan, ito wicaśta Kornelios u wicaśi qon hena Simon ti kin akitapi, qa wanna tiyopa kin itokam en hinajinpi;

¹⁸ Qa panpi qa; Simon Inyan eciyapi den yanka he, eya iwicawangapi.

¹⁹ Wowanyake kin he Inyan awakicin un kin he icunhan, Woniya Wakan kin heciya; Wanyaka wo, wicaśta yamni onidepi.

²⁰ Heon najin qa kun hde c̣a, takudan ceṭunhda śni om ya wo, hena u wicawaśi ce, eya.

²¹ Hehan Inyan wicaśta Kornelios u wicaśi qon hena ekta kun wicai, qa; Tuwe ayakitapi kin he miye ce; taku on yahipi he, ewicakiya.

²² Unkan iś heyapi; Kornelios akicita opawinge wicayuhe cin, wicaśta owotanna, qa Wakantanka kokipeyahan un he Juda oyate kin iyuḣpa oyakapi, hee maḣpiya ohnihde wakan wan okiye c̣a, tuwe nihuwe u wicaśi, qa iye ti kin ohna nioie kin naḣon kta, keya ce, eyapi.

²³ Hehan tin u wicaśi qa won wicaya. Unkan ihanḣanna Inyan hena om hda, unkan Joppa etanhan hunkawanjinkiciyapi kin wanjikji opapi.

²⁴ Unkan ihanḣanna qehan Kesareya iyohipi. Unkan Kornelios tona takuwicaye c̣a koda wicaye cin hena wicakico, qa om ape yanka.

²⁵ Unkan Inyan en u, hehan Kornelios itkokim ye c̣a, siha kin en makata eḣpeiciye c̣a cekiya.

²⁶ Tuka Inyan iś najin kiye c̣a; Najin wo, miś eya wimacaśta ce, eya.

²⁷ Qa kici wohdaka ecen tipi kin timahen i, qa wicota mniciyapi kin wanwicayaka.

²⁸ Hehan hewicakiya; Tuwe Juda wicaśta kin heca e oyate tokeca etanhan wan kici un, qa en hi kin he hecetu śni e sdonyayapi, tuka tuwedan wicaśta ikceka qa aśape cin ewakiye kte śni he Wakantanka sdonye makiya.

²⁹ Heon etanhan mahuwe ipi kin ecen waceṭunhda śni hibu, heon taku on miyecopi hecinhan he iciwangapi, eya.

³⁰ Unkan Kornelios heya; Wanna ehantanhan anpetu topa he ehan, qa nakaha oape kin dehantu, wote śni waun, qa napcinwanka ape cin hehan wati kin en cekiya waun; unkan wicaśta wan wokoyake wiyatpa koyake cin he en mahinajin;

³¹ Qa, Kornelios wocekiye nitawa kin he naḣonpi, qa taku wacantkiya ecanon kin he Wakantanka itokam kiksuyapi ce.

³² Heon Joppa ekta tuwe ye śi, qa Simon Inyan eciyapi kin he kico wo; he wicaśta wakpanyan wan, Simon eciyapi, ti kin miniwanca kahda he cin he ohna yanka. He hi kinhan taku eniciye kta ce, eya.

³³ Heon kohanna wahociya; qa yahi kin he tanyan ecanon. Heon nakaha unkiyepi kin owasin Wakantanka itokam unkanpi, taku Wakantanka eye niśi kin owasin naunḣonpi; kta ce

³⁴ Hehan Inyan i hdukawa qa heya; Awicakehan Wakantanka wicaśta itohnake kin iwanyake śni e imdukcan.

³⁵ Tuka oyate otoiyohi en, tuwe kokipeyahan un, qa owotanna oḣanye cin he waśtedaka ece.

³⁶ Jesus Messiya kin, owasin en Itancan kin hee, he eciyatanhan wicoie Israel cinca kin wookiye iwahowicayapi qon.

³⁷ Wicoie kin he sdonyayapi, Juda makoce kin owancaya oyakapi, Galile etanhan, Johannes baptem oyake cin hehan tanhan.

³⁸ Jesus Nazareth etanhan kin he Wakantanka sdakiya, Woniya Wakan wowaśake ko on; qa he qe taku waśte econ iyaya ece, qa tona taku wakan śica wicayuhnaśkinyan kin hena okiziwicaya ece, Wakantanka kici un kin heon.

³⁹ Qa taku Juda oyate tamakoce, qa Jerusalem ekta econ qon owasin unyaotaninpi ece. He iye kin ktepi, qa can wan akan otkeyapi qon.

⁴⁰ Tuka anpetu iciyamni qehan Wakantanka piya icaḣkiye c̣a, taninyan wicakipazo.

⁴¹ Oyate kin iyuḣpa śni, tuka tona otokaheya ekta Wakantanka wicakaḣnige ciqon hena en, waayataninpi kin unkiyepi, wiconṭe etanhan piya ikicage cin iyotiakam kici wauntapi qa waunyatkanpi ece.

⁴² Unkan oyate kin wahokonwicakiye unśipi qa nipi ṭapi ko en wayaco Wakantanka kage cin he iye ce, eya oyake unśipi.

⁴³ He wicaśta wokcan kin owasin oyakapi; iye caje kin eciyatanhan tuwe wicada kinhan woaḣtani wokajuju kin yuhe kta ce.

⁴⁴ Wicoie kin dena Inyan ecen eye cin he icunhan, tona oie kin naḣonpi owasin Woniya Wakan kin awicahinḣpaya.

⁴⁵ Unkan bakiḣdayapi kin etanhanpi tona wicadapi qon, tona Inyan kici hipi kin hena yuśinyayapi, Woniya Wakan wicaqupi ece kin he Ikcewicaśta iyepi kaeś awicakaśtanpi kin heon etanhan.

⁴⁶ Wicaceji tokeca on iapi, qa Wakantanka yatanpi kin he naḣonpi. Hehan Inyan waayupte c̣a;

⁴⁷ Tuwe mini teḣinda okihi, qa hena baptem wicaqupi kte śni he; hena eqe unkiyepi kin iyecen Woniya Wakan kin icupi ce, eya.

⁴⁸ Hehan Itancan caje kin on baptem wicaqu wicaśi. Hehan anpetu ota en yanke kta e icekiyapi.