Olianyanpi kin 1 - Dakota Wowapi Wakan Kin

¹ Theophile, wicoie tokaheya wakage cin he en Jesus tokaheya taku econ qa waonspekiye cin omdaka;

² Tona wicakaḣnige c̣a yewicaśi qon hena Woniya Wakan kin eciyatanhan wahokonwicakiye cin iyohakam, anpetu wan en wankan eyakupi kin hehanyan.

³ Iye kakije cin iyohakam hena eqe en ni un taninic̣iya, woyuotanin ota on, anpetu wikcemna topa hehanyan wanyagic̣iya, qa Wakantanka tokiconze taku tawa kin cajehdata ece;

⁴ Qa mniciyapi kin en owicapeya un qehan, Jerusalem etanhan ye śni wicaśi, qa Ateyapi kin wahowicaye ciqon he apepi kta; He miye eciyatanhan nayaḣonpi ce;

⁵ Awicakehan Johannes mini on baptem wicaqu, tuka tokata anpetu tonana ihan, hehan Woniya Wakan on baptem nic̣upi kta ce, eya.

⁶ Unkan hena witaya yukanpi hehan, Itancan, wanna dehantu Israel oyate wokiconze kin piya wicayaqu kta he, eya iwangapi.

⁷ Unkan hewicakiya; Tohanyan qa tohantu kin, Ate iye towaśake kin en ekihnake cin hena sdonyayapi kta iyecece śni;

⁸ Tuka Woniya Wakan kin en nihipi kinhan, wowaśake duhapi kta; hehan Jerusalem en, qa Juda makoce kin owancaya, qa Samaria qa maka ihanke kin hehanyan mayadaotaninpi kta ce.

⁹ Unkan hena hecen eye c̣a, wanhdakapi icunhan, yuwankan icupi; qa wanyakapi kin etanhan maḣpiya śapa wan eyaku.

¹⁰ Unkan he wankan iyaye cin, maḣpiya ekta etonwan yukanpi kin he icunhan, iho, wicaśta nom ska ihduzapi en wicikiyadan najinpi;

¹¹ Qa, Galile wicaśta, tokeca e maḣpiya ekta etonwan nayajinpi he. Jesus e qe niyepi etanhan maḣpiya ekta eyakupi kin, he maḣpiya ekta wankan iyaya wandakapi kin he iyecen ake u kta, ewicakiyapi.

¹² Hehan Oliwe paha eciyapi kin hetanhan Jerusalem ekta icicawin hdapi; he Jerusalem ikiyedan, anpetu wakan oicimani wanji ecetu.

¹³ En hdipi qa wankan tipi wanji tin iyayapi qa hen iyukanpi, Inyan, qa Jakob, qa Johannes, qa Andrew, Philip, qa Thomas, Bartholomew, qa Mattheos, Jakob Alpheus cinhintku, qa Simon Zelotes, qa Judas Jakob sunkaku:

¹⁴ Hena owasin tawacin wanjidan wocekiye eyapi qa kida yukanpi, winoḣinc̣a kin hena om, qa Mary Jesus hunku, qa iye hunkawanjinwicaye cin hena koya.

¹⁵ Unkan anpetu kin hena en Inyan ookiye unpi kin wicacokaya najin, (wicacaje owasin opawinge sanpa wikcemna nom wicayawapi;)

¹⁶ Qa heya; Wicaśta hunkawanjinciyapi, Judas tona Jesus iyaḣpayapi qon en mdetahunka kin he on, ehanna Woniya Wakan, Dawid i kin eciyatanhan, ie ciqon, wowapi en kagapi kin, he ecetuyapi kta hunśte.

¹⁷ He iye unkiyopeyapi yawapi, qa wicoḣtani kin de en opa tuka.

¹⁸ Unkan wicaśta kin he woaḣtani iyunwin kin maga wan iyopekiye c̣a, ehna makata iḣpaya, unkan tancan kin kamdas iḣpaye c̣a, śupe kin owasin tankan hiyu.

¹⁹ Tona Jerusalem en yakonpi sa owasin he sdonyapi; qa heon maga kin he iye iapi kin eciyatanhan, Akeldama eciyapi, he We maga, eyapi.

²⁰ Odowan wowapi kin en kaken kagapi; He tukten ti qon ḣewoskan yanke c̣a, tuwedan ohna ti śni nunwe; qa, Awanhdakapi wicoḣan yuhe ciqon he tuwe tokeca icu kta.

²¹ Heon etanhan wicaśta kin dena ohinniyan om unyakonpi, Jesus Itancan kin unkopapi, ti mahen i, qa tankan ye cin,

²² Tokaheya Johannes baptem wicaqu qon hetanhan, anpetu kin en unkiyepi etanhan wankan eyakupi kin hehanyan, hena etanhan, piya ikicage cin, wanji unkiyopeyapi oyaka ece e kta, eya.

²³ Unkan nom najinwicakiyapi, Joseph Barsabas eciyapi, he, Owotanna, eya caśtonpi, qa Matthias.

²⁴ Hehan cekiyapi qa heyapi; Itancan niye wioacante owasin sdonya nanka, wicaśta kin dena unma tukte yakaḣnige cin he yutanin wo;

²⁵ Ookiye wicoḣan qa yewicaśipi kin de en ope kta, Judas iye oyanke tawa kin ekta hde kta e etanhan hinḣpaye cin he.

²⁶ Hehan woohiye eḣpekiyapi, unkan woohiye kin Matthias ahinḣpaya; qa hecen yewicaśipi akewanjipidan kin owicapeya yawapi.