Mattheos 15 - Dakota Wowapi Wakan Kin

¹ Hehan Jerusalem etanhan wewapi kagapi qa Pharisee kin Jesus en hipi qa heyapi;

² Tokeca waonspewicayakiye cin hunkawicayapi woope oyakapi qon acakśinpi he; qa aguyapi yutapi kte cinhan nape hdujajapi śni.

³ Unkan iye waayupte c̣a hewicakiya; Qa niś nakun tokeca woope odakapi kin on Wakantanka toope kin acayakśinpi he.

⁴ Wakantanka heya econ wicaśi; Niyate nihun kici wicahduonihan wo; nakun; Tuwe atkuku hunku kici wicayaśice cinhan wiconṭe on ṭe kta ce.

⁵ Tuka niye hehapi; Tuwe atkuku qa iś hunku kin heciye kta iyececa; Taku on ociciye kte cin he wanna wośnapi ce; qa hecen atkuku hunku kici wicahduonihan śni ece

⁶ Hecen woope odakapi kin on Wakantanka toope kin dutakunipiśni.

⁷ Wananic̣iḣmanpi, niyepi on Isaya tanyan woyake c̣a heye ciqon;

⁸ Oyate kin de i on mikiyedan upi, qa iha on mayaonihanpi; tuka cantepi kin hena mitehan unpi ece.

⁹ Wicaśta wicoope kagapi kin hena woope keya onspewicakiyapi, qa on mayuonihanpi kte cin he takudan okihi śni ece.

¹⁰ Hehan oyate kin wicakico qa hewicakiya; Naḣonpi qa okahniga po:

¹¹ Taku wicai kin ohna iyaye cin he wicaśta kin yuśape śni; tuka taku wicai kin etanhan hiyu kin he wicaśta yuśape cin ee.

¹² Hehan waonspewicakiye cin en hipi qa heciyapi; Wicoie kin de Pharisee kin naḣonpi qa śihdapi, he sdonyaya he.

¹³ Unkan waayupte c̣a heya; Taku ojupi kin, tona Ate maḣpiya ekta un kin oju śni kinhan, hena owasin yujunpi kta.

¹⁴ Awicayuśtan po; iśtagongapi iśtagongapi awicayapi kin hena hecapi. Unkan tuwe iśtagonga istagonga wan yus aye cin han, napin makoḣdoka en ohinḣpayapi kta.

¹⁵ Hehan Inyan ayupte c̣a heciya; Wiyacinpi kin de unkokiyaka miye.

¹⁶ Unkan Jesus heya; Niś nakun hinaḣin oyakaḣnigapi śni he.

¹⁷ Taku wicai kin ohna iyaye cin he wicatezi kin ekta i ece, qa hehan hetanhan tankan ehpeyapi ece; he hinaḣin oyakaḣnigapi śni he

¹⁸ Tuka taku wicai kin etanhan hiyu kin hena wicacante kin eeiyatanhan u ece; qa wicaśta yuśape cin hena ee.

¹⁹ Wicacante kin eciyatanhan wicotawacin śica hiyu ece; tinwicaktepi, wawiciḣaḣapi, wiinaḣmanpi, wamanonpi, woitonśni qa wicayaśicapi kin.

²⁰ Wicaśta yuśape cin dena ee; tuka nape hdujaja śni wotapi kin he wicaśta kin yuśape śni.

²¹ Hehan Jeans hetanhan tokan iyaye c̣a, Turos qa Sidon makoce ihdukśan wanke cin he ekta i.

²² Unkan iho, Kanan winoḣinca wan makoce kin hetanhan hiyu, qa hoyekiye qa heya; Itancan, Dawid Cinhintku, onśimada ye, micunkśi wakan śica yuhnaśkinyan, śicaya un.

²³ Tuka iye oie wanjidan ayupte śni. Unkan waonspewicakiye cin en hipi, cekiyapi qa heyapi; Hdeśi wo, unkihakam śicahowaya ece.

²⁴ Tuka iye waayupte c̣a he ya; Israel tiyohnaka taḣinca wanunyanpi nunnipi kin henana ekta umaśipi ce.

²⁵ Hehan winoḣinca qon en hi, makata eḣpeic̣iye c̣a heciya; Itancan, omakiya we.

²⁶ Tuka iye ayupte c̣a; Hokśiyopa aguyapi tawapi kin icupi qa śunka wicaqupi kin he hecetu śni ce, eya.

²⁷ Unkan iye; Han, Itancan; tuka śunka kin iye wicayuhapi wahna wotapi tawapi kin etanhan ośnaśna hinḣpaye cin hena etanhan yutapi ece, eya.

²⁸ Hehan Jesus ayupte c̣a heciya; Winoḣinca, wacinyaye cin he tanka; token yacin kin he enicicetu nunwe. Unkan wihiyayedan oape kin he hetanhan cunwintku kin asni.

²⁹ Unkan Jesus hetanhan iyaye c̣a Galile mde kin ikiyedan u; qa paha wan ekta iyaye c̣a akan iyotanka.

³⁰ Unkan wicaśta ota en hipi, tona huśtepi, iśtagongapi, ia okitpanipi, hu bawicaksapi, qa toktokeca ota en awicahipi, qa Jesus siha kin en ewicahnakapi; unkan asniwicaya.

³¹ Hecen wicota yuśinyayapi, ia okitpanipi qon hena iapi, hu bawicaksapi qon hena tokecapi śni, huśtepi qon hena manipi, qa iśtagongapi qon hena tonwanpi wanwicayakapi, heon etanhan; qa Israel Taku Wakan tawapi kin he yatanpi.

³² Hehan Jesus waonspewicakiye cin wicakico qa hewicakiya; Oyate kin onśiwicawakida, wanna yamni can taku yute śni mici unpi; qa wote śni hdewicawaśi kta tawatenwaye śni, okinni tahepi iḣpayapi kta.

³³ Unkan waonspewicakiye cin heciyapi; Makoce ḣewotahedan kin de en tokiyatanhan aguyapi iyenakeca unhapi qa oyate hinsko tanka inmawicunyanpi kta he.

³⁴ Unkan Jesus, hewicakiya; Aguyapi kagapi tona duhapi he. Unkan; Sakowin qa hoganstinna tonana nakun, eyapi.

³⁵ Unkan oyate kin makata iyotanke wicaśi;

³⁶ Qa aguyapi śakowin icu, hogan kin hena nakun, qa yawaśte, hehan kiyuśpaśpa qa waonspewicakiye cin wicaqu; unkan waonspewicakiye cin oyate kin wicaqupi.

³⁷ Unkan owasin yutapi qa imnanpi; qa oyaptapi kin hena pahipi, makanopiye śakowin ojudan.

³⁸ Wotapi kin hena wica ece kektopawinge topa, nakun winoḣinca śiceca koya.

³⁹ Hehan oyate kin hdewicaśi, qa wata wan en ope c̣a Magdala makoce kin en hi.