Mattheos 1 - Dakota Wowapi Wakan Kin

¹ Jesus Messiya, Dawid cinhintku, Abraham cinhintku, oicage wowapi kin he dee.

² Abraham Isaak cincaya; qa Isaak Jakob cincaya; qa Jakob Judas qa hunkawanjitku ko cincawicaya:

³ Unkan Judas Phares qa Zara, Tamar etanhan, cincawicaya; qa Phares Esrom cincaya; qa Esrom Aram cincaya:

⁴ Qa Aram Aminadab cincaya; qa Aminadab Naasson cincaya; qa Naasson Salmon cincaya:

⁵ Qa Salmon, Racab etanhan, Booz cincaya; qa Booz, Ruth etanhan, Obed cincaya; qa Obed Jesse cincaya:

⁶ Qa Jesse Dawid wicaśtayatapi kin cincaya; qa Dawid wicaśtayatapi kin Solomon cincaya, Urias tawicu qon etanhan.

⁷ Qa Solomon Roboam cincaya; qa Roboam Abia cincaya; qa Abia Asa cincaya:

⁸ Qa Asa Josaphat cincaya; qa Josaphat Joram cincaya; qa Joram Ozias cincaya:

⁹ Qa Ozias Joatham cincaya; qa Joatham Akaz cincaya; qa Akaz Ezekias cincaya:

¹⁰ Qa Ezekias Manasses cincaya; qa Manasses Amon cincaya; qa Amon Josias cincaya:

¹¹ Qa Josias Jekonias cincaya; hunkawanjitku hena koya, Babulon ekta awicayapi qon he ehan.

¹² Unkan Babulon ekta awicaipi hehan Jekonias Salathial cincaya; qa Salathial Zorobabel cincaya:

¹³ Qa Zorobabel Abiud cincaya; qa Abiud Eliakim cincaya; qa Eliakim Azor cincaya:

¹⁴ Qa Azor Sadok cincaya; qa Sadok Akim cincaya; qa Akim Eliud cincaya:

¹⁵ Qa Eliud Eleazar cincaya; qa Eleazar Matthan cincaya; qa Matthan Jakob cincaya.

¹⁶ Unkan Jakob Joseph, Mary hihnaku kin, he cincaya; he etanhan Jesus Messiya eciyapi kin icaga.

¹⁷ Hecen wicoicage owasin, Abraham etanhan Dawid hehanyan, wicoicage ake topa; qa Dawid etanhan, Babulon ekta awicayapi qon hehanyan, wicoicage ake topa; qa Babulon ekta awicayapi etanhan, Messiya hehanyan, wicoicage ake topa.

¹⁸ Unkan Jesus Messiya icage cin he kaketu: Hunku Mary he Joseph yuze kta, tuka hinaḣin kici un śni, wanna Woniya Wakan kin on ihduśaka.

¹⁹ Unkan hihnaku Joseph he wicaśta owotanna, qa taninyan oyake kta tawaṭenye śni, heon naḣmana eḣpeye kta kecin.

²⁰ Tuka hena hecen awacin un qehan, iho, Itancan taohnihde wan wowihanmde en ihdutanin qa heya; Joseph, Dawid cinhintku, Mary winoḣinca nitawa kin he yahduze kta kokipe śni wo, taku itpihnake cin he Woniya Wakan kin etanhan.

²¹ He cinca ton kta, unkan Jesus eya caśyaton kta; iye taoyate kin waḣtanipi kin etanhan niwicaye kta, heon etanhan.

²² Unkan dena owasin hecen econpi, Itancan oie, wicaśta wokcan oyake ciqon he yuecetupi kta; he hecen eya;

²³ Iho, witanśna un wan ihduśake c̣a cinca ton kta; unkan Emmanuel eya caśtonpi kta; Wakantanka unkicipi un, eyapi kin he kapi.

²⁴ Unkan Joseph iśtinma etanhan kikta, hehan Itancan taohnihde token econśi qon he ecen econ, qa tawicu hduza.

²⁵ Tuka cinca tokapa cinca ton śni hehanyan sdonye śni; unkan Jesus eya caśkiton.