Markos 1 - Dakota Wowapi Wakan Kin

¹ Jesus Messiya Wakantanka Cinhintku kin Wotanin Waśte tawa tokaheya kin he dee.

² Wicaśta wokcanpi kin en owapi qon iyececa; Iho, niite kin itokam wahośi mitawa yewaśi kta, nitokam canku wiyeya enicihnake kta.

³ Wicaho wan ḣewotahedan hotanin kin hee, Itancan tacanku kin wiyeya ekicihnaka wo, ocanku owotanna kicaga wo.

⁴ Johannes ḣewotahedan baptem wicaqu, qa woaḣtani kajujupi kta, on iyopeic̣iyapi baptem wicaqupi kin he oyaka ece.

⁵ Unkan Juda makoce kin owancaya tanhan, qa nakun Jerusalem etanhan ekta yapi; unkan woaḣtani ohdaka, Jordan wakpa kin en, iye owasin baptem wicaqu.

⁶ Unkan Johannes kamel hin kin koyake c̣a teḣmiso wan ipiyagkiton; qa psipsicadan tuḣmaga canhanpi ahna yuta ece:

⁷ Qa woyake c̣a heya; Mihakam wanji mikapeya waśake cin he u ce, he patuś nawajin qa hankpan weciyuśdoke kta iyemicihantu śni.

⁸ Miś miye awicakehan mini on baptem cic̣upi; tuka iye qe Woniya Wakan kin on baptem nic̣upi kta ce.

⁹ Unkan anpetu kin hena icunhan, Galile en Nazareth etanhan Jesus u, qa Jordan en Johannes baptem qu.

¹⁰ Unkan mini kin etanhan itanwankanhde ku qehan, ecahankeya maḣpiya kin yuzamnipi qa Woniya Wakan kin wakiyedan kaḣya kuntkiya u qa en hiyahan, he wanyaka.

¹¹ Unkan maḣpiya eciyatanhan wicaho wan tanin, Micinkśi waśtewakidake c̣a tanyan iyomakipi kin he niye ce.

¹² Hehan ecahankeya Woniya kin ḣewoskan makoce kin ekta kaḣam aya.

¹³ Unkan anpetu wikcemna topa ḣewotahedan makoce kin en un; qa hen Satan iyutanyan; wamanica kin om un, unkan maḣpiya ohnihde kin okiyapi ece.

¹⁴ Unkan Johannes kaśka hnakapi qehan, Jesus Galile en hi, qa Wakantanka tokiconze wotanin waśte kin oyaka:

¹⁵ Qa heya; Wanna iyehantu, Wakantanka tokiconze kin kiyedan un; iyopeic̣iya po, qa wotanin waśte kin wicada po.

¹⁶ Unkan Galile mde kin icahda omani, hehan Simon wanyaka, qa iye sunkaku Andrew nakun, mde kin en ho wan iyohpeyapi; hena hopsicapi kin hecapi nakaeś.

¹⁷ Unkan Jesus hewicakiya; Miyahna u po, kinhan wicaśta wicadupsicapi kta cicagapi kta ce.

¹⁸ Unkan ecahankeya ho kin eḣpekiyapi, qa ihakam iyayapi.

¹⁹ Unkan hetanhan kitan ecinyan iyoopta ye c̣a, Jakob Zebede cinhintku, nakun sunkaku Johannes eciyapi, wanwicayaka; hena wata ohna ho kin piyapi.

²⁰ Unkan ecahankeya wicakico; unkan atkukupi Zebede, qa tona wowidake wicayuhe cin hena om, wata kin en eḣpewicayapi, qa ihakam iyayapi.

²¹ Hehan Kapernaum en yapi; unkan anpetu wakan icunhan omniciye tipi kin katinyan en ye c̣a, woyaka.

²² Unkan taku oyake cin on yuśinyayapi; wicaśta itancanyan waonspewicakiya, qa wowapi kagapi kin iyecece śni.

²³ Unkan omniciye tipi kin he ohna wicaśta wan woniya śica yuha; unkan he howaya,

²⁴ Qa heya; Unkayuśtan po; Jesus Nazareth etanhan, taku ecaunniconpi he; ihangunyayapi kta yahi he; nituwe kin sdonwaya, Taku Wakan Wanji Wakantanka tawa kin he niye.

²⁵ Hehan Jesus iyopeye c̣a heciya; Inina yanke c̣a, tankata hninanpa wo.

²⁶ Unkan woniya śice cin he wicaśta kin yuḣdece c̣a, hotankakiya hotanin, hehan tankan hinanpa.

²⁷ Unkan owasin inihanpi qa heya ikiciwangapi; De taku he; de woonspe teca kin tukte e he; woniya śice cin itancanyan owawicakiya, unkan anagoptanpi ece.

²⁸ Unkan hetanhan Galile makoce ihdukśan owancaya oḣan kin oyakapi.

²⁹ Unkan omniciye tipi kin etanhan hdicupi, hehan katinyan Simon qa Andrew tipi tawapi kin en yapi, Jakob qa Johannes nakun opapi.

³⁰ Tuka Simon tawicu hunku kin he tancan kata on wayazanka yanka; unkan he okiyakapi.

³¹ Hehan en hi, qa napata yuze c̣a najinkiya; unkan ecahankeya tancan kata ayuśtan, qa hehan owicakiya.

³² Wanna ḣtayetu, wi iyaya hehan, wayazankapi kin owasin yanke cin en awicahipi, tona wakanśica wicayuhnaśkinyan hena koya.

³³ Hecen otonwe kin ocowasin tiyopa kin en kata iheya.

³⁴ Unkan wowayazan toktokeca on wayazanpi kin ota asniwicaya, qa taku wakan śica ota nakun tankan hinanpe wicakiya; qa wakan śice cin hena ia iyowinwicakiye śni, hena iyekiyapi nakaeś.

³⁵ Unkan ihanḣanna, hinaḣin anpa itehan, hehan inajin, qa tankan inanpe c̣a, ḣewotahedan makoce wan ekta ye c̣a, hen wocekiye eya.

³⁶ Unkan Simon tona om un kin hena koya ihakam iyayapi.

³⁷ Qa iyeyapi hehan heciyapi; Owasin anicitapi ce.

³⁸ Unkan hewicakiya; Otonwe ikiyedan kin hena en unyanpi kta; hen nakun womdake kta; heon etanhan wahi ce, eya.

³⁹ Unkan Galile makoce kin owancaya, omniciye tipi kin ohna woyake c̣a, wakan śica hinape wicakiya ece.

⁴⁰ Unkan wicaśta wan lepros ececa, he en hi, qa cekiya, canpeśka makehde inajin qa heciya; Yacin kinhan ska mayakage kta oyakihi.

⁴¹ Unkan Jesus onśikida, nape ekta yekiye c̣a, yutan qa heciya; Wacin, ska un wo.

⁴² Unkan heye cin hecehnana, lepros ececa qon he ayuśtan, qa ska icaga.

⁴³ Hehan tanyan wahokonkiye c̣a hetanhan hdeśi;

⁴⁴ Qa heciya; Ihnuhan tuwe taku eyakiye cinhan; tuka hde c̣a, wośna kage cin he en hdutanin wo, qa niyuskapi kta on taku Moses econ wicaśi qon hena wayuśna wo, hecen iyepi ekta woyutanin kta.

⁴⁵ Tuka tankan hde c̣a, nina ohdake c̣a, owancaya yaotanin, hecen hetanhan Jesus otonwe kin en taninyan ye kta okihi śni, tuka tankan ḣewotahedan un ece: unkan owancaya tanhan yanke cin en hipi ece.