Lukas 23 - Dakota Wowapi Wakan Kin

¹ Unkan wicota kin owasin najin hiyayapi, qa Pilate kayapi.

² Hehan hinnakaha wiyaonpapi, qa heyapi; De oyate kin owicayuśice, c̣a Kesar wamnayanpi qupi kin he teḣinda iyeunyanpi; qa iye Messiya Wicaśtayatapi kin heca keic̣iya ce, eyapi.

³ Unkan Pilate wiwange c̣a heya; Juda Wicaśtayatapi kin he niye he. Unkan ayupte, c̣a, Niye ecen eha ce, eya.

⁴ Hehan Pilate wawayuśna itancanpi qa oyate kin hena hewicakiya; Wicaśta kin de on taku śica iyewaye śni ce.

⁵ Unkan hecen iyotan wohitipike c̣a heyapi; Oyate kin owodutatonwicaya ece, qa Galile etanhan Juda makoce kin owancaya dehan oiyahdeya waonspekiya ece.

⁶ Unkan Pilate Galile eyapi naḣon qehan, wicaśta kin he Galile wicaśta kin heca hecinhan he iwicawanga.

⁷ Unkan Herod taoyate kin hetanhan e Pilate sdonya, hehan Herod ekta iyayeya; he qe wanna Jerusalem en un.

⁸ Herod Jesus wanyake c̣ehan nina iyuśkin; taku ota on naḣon kin heon wanakajatanhan wanyaka cin; qa wowapetokeca wanji econ wanyake kta kecin.

⁹ Hehan iapi ota un wiwanga; tuka takudan ayupte śni.

¹⁰ Unkan wawayuśna itancanpi, qa wowapi kagapi kin, hena inajinpi, qa wohitiya wiyaonpapi.

¹¹ Unkan Herod ozuye wicaśta wicayuhe cin om takuda śni, qa iḣaha kuwa, qa śina wan ayucopi in kiye, c̣a ake Pilate ekta iyayeya.

¹² Unkan anpetu kin he en Herod Pilate kici kiciyuwaśtepi; he itokamya tokakiciyapi.

¹³ Unkan Pilate wawayuśna itancanpi, qa itancanwicakiyapi, qa oyate kin hena witaya wicakico qehan, hewicakiya;

¹⁴ Wicaśta kin de oyate kin owicayuśice cin wan iyecen mayakahipi; unkan iho nitokam Iwanmdaka, tuka taku iyayaonpapi kin hena on, taku śica wicaśta kin de en takudan iyewaye śni.

¹⁵ Qa nakun Herod hee kaeś, ekta aye ciśipi; unkan iho, ṭe kte cin iyecece cin takudan ecakiconpi śni.

¹⁶ Hecen wakapsinpsinte, c̣a wakimduśke kta ce, eya.

¹⁷ Wotapi kin he icunhan wicaśta wanji wicakiciyuśke kta e heon.

¹⁸ Unkan owasin okonwanjidan heya niyanpi; De tokan aya wo; qa Barabbas hee unkiciyuśka miye.

¹⁹ He qe otonwe kin en wokipajin kage, c̣a tinwicakte on, etanhan kaśka wicahnakapi tipi kin en ohnakapi.

²⁰ Pilate Jesus kiyuśke wacin kin heon ake iyecen ewicakiya.

²¹ Tuka howayapi qa heyapi; Icipaweḣ okatan wo, icipaweḣ okatan wo.

²² Unkan iyamni hewicakiya; Tokeca, tukte ecin taku śica econ he. On etanhan ṭe kte cin iyececa takudan iyewaye śni; hecen wakapsinpsinte, c̣a wakimduśke kta ce, eya.

²³ Unkan hotankakiya kitanpi, icipaweḣ okatanpi kta e hekapi. Unkan iye hopi kin, wawayuśna itancanpi kin om iyakapeyapi.

²⁴ Hecen token cinpi kin he iyecen Pilate kiconza.

²⁵ Qa tuwe cinpi kin wokipajin kage, c̣a tinwicakte qon, hee wicakiciyuśke; tuka iye tawacinpi kin en Jesus wicaqu.

²⁶ Unkan tokan yus ayapi qehan, Kurene wicaśta wan Simon eciyapi makoce kin eciyatanhan u kin he yuzapi, qa cansusbeca kin he Jesus ihakam qin kta e aiḣpeyapi.

²⁷ Unkan oyate kin wicota ḣinca winoḣinca ko iyahna yapi, qa waśihda aceyapi.

²⁸ Tuka Jesus ekta ihduhomni qa hewicakiya; Jerusalem cunwintkupi kin, miye amaceyapi śni po; tuka niyepi qa nicincapi kin aic̣iceya po.

²⁹ Iho, anpetu hiyohi kte cin hena en heyapi kta; Hokśin yuhapi śni, qa wicitpi tohinni cincaton śni, qa aze tohinni azinpi śni kin hena yawaśtepi ce.

³⁰ Hehan hinnakana ḣe kin, Unkahinḣpaya po, qa paha kin, Unkaḣpa po, eciyapi ece e kta.

³¹ Qa can teca kin en deceneconpi kinhan, can śeca kin en token econpi kta he, eya.

³² Unkan wicaśta tokeca nonpa, oḣan śicapi kin, hena wicaktepi kta e kici awicayapi.

³³ Unkan tukten Wicapahu eciyapi kin wanna ehan ipi qehan, hen icipaweḣ okatanpi, qa nakun wicoḣan śica econpi qon hena, unma iye etapa eciyatanhan, qa unma kin iś catka tanhan.

³⁴ Hehan Jesus heya; Ate, wicakicicajuju wo; taku tokonpi kin sdonkiyapi śni ce. Unkan tawokoyake kin kicipamnipi, qa oeconna econpi.

³⁵ Unkan oyate kin opaḣta najin hiyeya: Qa itancanwicakiyapi kin iś eya hena om iḣaḣapi qa heyapi; Wicaśta tokeca niwicaya ece qon; iye atayedan niiciya eśta śni, Messiya Wakantanka hdaḣnige cin hee hecinhan.

³⁶ Unkan akicita kin iś eya iḣaḣapi, en au, qa miniskuya kipazopi;

³⁷ Qa heyapi; Juda wicaśtayatapi kin he niye hecinhan, niic̣iya wo.

³⁸ Unkan iwankam wowapi kin de, Helenes qa Roma qa Hebrew iapi henakiya en owapi; JUDA WICAŚTAYATAPI KIN HE DEE CE.

³⁹ Unkan oḣan śicapi en owicakatanpi qon wanji śicaya owakiye c̣a heya; Messiya he niye hecinhan niic̣iya wo, qa unkiś nakun.

⁴⁰ Tuka unma kin waayupte c̣a kiśice c̣a heya; Wakantanka koyakipe śni he; wicayacopi okonwanjidan kici en yaun:

⁴¹ Qa unkiye kin en he owotanna; taku econku eciyatanhan unkakipa ece; tuka iye qe taku śica takudan econ śni ce.

⁴² Unkan hehan Jesus heciya; Itancan, wokiconze nitawa kin en yaku kinhan, miksuya wo.

⁴³ Unkan Jesus heciya; Anpetu kin de en wowaśte makoce kin en mici yaun kta ce, awicakehan eciciya.

⁴⁴ Wanna wihiyayedan oape śakpe hehantu; unkan makoce kin owancaya aotpaza, napcinwanka apa hehanyan.

⁴⁵ Qa anpetu wi kin otpaza icu, qa tipi wakan kin en miniḣuha ozanzan hiyeye cin he cokaya okinaḣdeca.

⁴⁶ Unkan Jesus hotankakiya hoyekiye c̣ehan, hehan heya; Ate, ninape kin en minagi kin owehnaka ce. Unkan hecen eye c̣ehan ṭa iyaya.

⁴⁷ Unkan akicita opawinge wicayuhe cin he token econpi qon he wanyake c̣ehan, Wakantanka yaonihan, qa heya; Awicakehan wicaśta owotanna he de heca ce.

⁴⁸ Unkan oyate kin witaya he wanyag ahi qon, hena owasin token econpi qon hena wanyakapi qehan, maku kin ohnahna aicipapi, qa kihdapi.

⁴⁹ Unkan tona sdonyapi qon hena owasin itehan inajinpi, qa winoḣinca Galile etanhan ihakam upi qon hena taku kin dena wanyakapi.

⁵⁰ Unkan iho, wicaśta wan Joseph eciyapi, wahokonwicakiya ece kin heca, wicaśta waśte qa owotanna;

⁵¹ He iye kin wakiconzapi qa oḣanpi qon wicawicada śni: Arimathea, Juda totonwepi kin wanji hee etanhan; iś eya Wakantanka tokiconze kin he ape un.

⁵² He Pilate ekta ye c̣a Jesus tancan kin kida.

⁵³ Unkan kun eyaku, qa miniḣuha ska opazunte, c̣a imnija kaḣdokapi wicasta hnakapi wanen ohnaka; he itokam tuwedan en ohnakapi śni.

⁵⁴ Unkan anpetu en ihduwiyeyapi ece kin he hee, qa anpetu wakan kin wanna ikiyedan.

⁵⁵ Unkan winoḣinca Galile etanhan kici upi qon hena ihakam iyayapi, ohna hnakapi kin he, qa tancan kin token hnakapi kin hena wanyakapi.

⁵⁶ Qa hetanhan kihdapi, qa pejihuta waśtemna ihepi ko wiyeya ehnakapi. Hehan woahope kin eciyatanhan anpetu wakan kin okiḣpapi.