Lukas 1 - Dakota Wowapi Wakan Kin

¹ Taku tona ceṭunhdaśniyan wicaundapi kin hena wicota hdaheya oyag utapi;

² Tona otokahe ehantanhan iśta on wanyakapi qa wicoie oyakapi ece kin hena token unkokiyakapi qon he iyececa:

³ Heon etanhan miś eya, taku kin hena owasin otokahe ḣinca ehantanhan tanyan owakaḣnige cin on, Taku Wakan waśtedaka iyotan waśte, hena hdaheya wowapi cicage kta iyomakipi.

⁴ Hecen taku onspeniciyapi qon hena wicakapi e tanyan sdonyaye kta.

⁵ Herod Juda wicaśtayatapi taanpetu kin en wawayuśna wan Zacariyas eciyapi, Abia optaye kin hetanhan; qa tawicu kin iś Aaron cunwintkupi kin etanhan; unkan he Elisabeth eciyapi.

⁶ Hena sakim Wakantanka itokam owotanpidan, qa Itancan tawoahope qa wicoope tawa kin owasin omanipi, iyaonpepica śni unpi.

⁷ Unkan Elisabeth hokśin yuhe śni un, qa hecen cinca nicapi; unkan sakim wanna kanpi.

⁸ Unkan iye optaye kin ohna wośna wicoḣan kin Wakantanka itokam econ eca,

⁹ Tipi wakan Itancan tawa kin timahen iyaya ec̣a, waazintonpi econ śipi ece, wośna wicoḣan econpi kin eciyatanhan.

¹⁰ Unkan waazintonpi icunhan, oyate kin owasin itankan cekiya hiyeya.

¹¹ Unkan Itancan taohnihde wan en taninic̣iya, qa wahna azintonpi kin etapa tanhan hinajin.

¹² Unkan Zacariyas he wanyake c̣ehan, wacin iyokiśice c̣a wakokipe hinca.

¹³ Tuka ohnihde wakan kin heciya; Wakokipe śni wo, Zacariyas; wocekiye nitawa kin naḣonpi; qa nitawin Elisabeth hokśidan wan niciyuhe kta, unkan he Johannes eya caśyakiton kta.

¹⁴ Qa he on wowiyuśkin wopida ko duhe kta, qa tonpi kin on wicota iyuśkinpi kta.

¹⁵ Qa iye Itancan kin itokam tanka kta; qa miniśa miniwakan ko takudan yatke kte śni; qa hunku ikpi kin etanhan Woniya Wakan kin on ojudan kta.

¹⁶ Unkan iye Israel cinca kin wicota Itancan Wakantanka tawapi kin ekta wicayahomni kta.

¹⁷ Qa Elias toksape qa towaśake kin yuha itokam ye kta, qa atewicayapi cincawicayapi kin kici cante wicayuokonwanjidan, qa wanaḣonpi śni kin hena owotanna unpi wicoksape kin ekta wicayuhomni kta; qa oyate wan Itancan on ihduśtanpi kin wiyeya kicihnake kta e heon etanhan.

¹⁸ Unkan Zacariyas ohnihde wakan kin heciya; Wanna wimacaḣinca, qa mitawin wanna kan; hecen taku on de sdonwaye kta he.

¹⁹ Unkan ohnihde wakan kin waayupte c̣a heciya; Gabriel, Wakantanka itokam najin kin he miye; qa ociciye c̣a, wotanin waśte kin de sdonyeciciye kta e u maśipi.

²⁰ Unkan iho, mioie kin tohan iyehantu kinhan yuecetupi kte cin he wicayada śni kin he on, tohanyan yuecetupi śni kin hehanyan, ie śni, qa ia okitpani yaun kta ce.

²¹ Unkan oyate kin Zacariyas ape hiyeye, c̣a tehan tipi wakan kin ohna yanke cin on etanhan inihanpi.

²² Unkan tankan hdicu qehan, owicakiye kte cin okitpani: unkan namwicakicawin, qa ie śni un; on etanhan tipi wakan kin ohna taku wakan wanji wanyaka e iyukcanpi.

²³ Unkan wicoḣan econ ece kin anpetu kin wanna ihunnikiya, hehan iye ti kin ekta kihda.

²⁴ Unkan anpetu kin hena iyohakam tawicu Elisabeth hokśin itpihnaka; unkan wi zaptan hehanyan inaḣbe, c̣a heya;

²⁵ Anpetu kin en, Itancan kin wicaśta kin taku i en mahdepi qon he emiciyaku kta on ahimatonwe c̣ehan, decen ecamicon ce.

²⁶ Unkan wi iśakpe kin en, Gabriel ohnihde wakan kin Wakantanka etanhan u śipi; Galile ekta, otonwe wan Nazareth eciyapi kin hetu;

²⁷ Wikośka wan wicaśta wan Joseph eciyapi, Dawid wicowazi tawa kin etanhan, yuze kte cin he ekta; unkan wikośka kin Mary eciyapi.

²⁸ Unkan ohnihde wakan kin he en hi qa heciya; Wiyuśkin wo, waśteya yaun kin; Itancan kin niciun, winoḣinca owicapeya niye niyawaśtepi ce.

²⁹ Unkan he wanyake c̣ehan, oie kin on inihan, qa okiyapi kin de taku kta hecinhan he awacin un.

³⁰ Unkan ohnihde wakan kin heciya; Mary, wikope śni wo; Wakantanka ekta wowaśte iyeyaya.

³¹ Qa iho, hokśin itpiyahnake c̣a hokśidan wan yaton kta, qa Jesus eya caśyakiton kta.

³² Iye tanka kta, qa Iyotan Wankantu kin Cinhintku kin eciyapi kta; qa atkuku Dawid tohe kin Wakantanka Itancan kin hduhekiye kta.

³³ Qa Jakob ti kin he ohinniyan idake kta; qa wokiconze tawa kin okiciwihanke kte śni ce, eya.

³⁴ Hehan Mary ohnihde wakan kin heciya; Wicaśta sdonye śni waun kin heon, de token on iyecetu kta he.

³⁵ Unkan ohnihde wakan kin waayupte c̣a heciya; Woniya Wakan kin en niu kta, qa Iyotan Wankantu towaśake kin aohanziniye kta, qa hecen taku wakan wan yaton kte cin he Wakantanka Cinhintku kin eciyapi kta.

³⁶ Unkan inyun, Elisabeth ic̣epanśiyaye cin, he wakanka tuka iś eya wanna hokśin itpihnaka ce, qa hokśin yuhe sni eciyapi qon, he wanna wi kin de iśakpe.

³⁷ Wakantanka ekta taku okihipica śni wanica ce.

³⁸ Unkan Mary heya; Itancan ookiyemaye cin wanmayaka we; nioie kin iyecen ecamiconpi nunwe. Hehan ohnihde kin eḣpeya kihda.

³⁹ Unkan anpetu kin hena en Mary inajin, qa koyaḣanna ḣośki makoce kin, Juda otonwe wan ekta iyaya:

⁴⁰ Qa Zacariyas ti kin en tin iyaye, c̣a Elisabeth okiya.

⁴¹ Unkan Elisabeth Mary ia naḣon qehan, itpi mahen hokśiyoqopa kin śkehanhan; hehan Elisabeth Woniya Wakan kin ojudan:

⁴² Qa hotankakiya hotanin, qa heya; Winoḣinca opeya niye niyawaśtepi, qa niitpi kin etanhan icage kte cin he yawaśtepi ce.

⁴³ Qa Itancan mitawa hunku kin ekta mahi kte cin de token kapi he.

⁴⁴ Inyun, iyae cin noge iyoḣpemaye c̣ehan, hecehnana miitpi mahen hokśiyoqopa kin wowiyuśkin on śkehanhan.

⁴⁵ Unkan tuwe wicada qon he yawaśtepi: Itancan kin taku eciye ciqon hena ecen yuśtanpi kta ce, eya.

⁴⁶ Unkan Mary heya; Minagi kin Itancan kin yatan;

⁴⁷ Qa mitaniya kin he Wakantanka Wanikiya mitawa kin on iyuśkin ece.

⁴⁸ Taokiye kuya un kin ekta ahimatonwan on etanhan inyun, detanhan wicoicage kin owasin yawaśtepi emakiyapi kta ce.

⁴⁹ Tuwe waśake cin he taku ḣinca ecamicon; unkan caje kin wakan ce.

⁵⁰ Tona kokipapi kin hena wicoicage qa wicoicage kin onśiwicakida ece.

⁵¹ Iye isto kin on wowaśake hdutanin; witantanpi kin hena taku cante mahen wacinyuzapi kin en wicayuomdeca.

⁵² Waśakśakapi kin oyanke etanhan kun hdicuwicaye c̣a, kuya unpi qon hena wankan wapa awicaya.

⁵³ Wotektehdapi kin hena taku waśteśte on imnahanwicaye, ca wijicapi kin iś cokakadan tokan yewicasi.

⁵⁴ Iye towaonśida kiksuye cin on taokiyeye cin Israel he iciya ece.

⁵⁵ Hunkakewicunyanpi owicakiye ciqon iyececa, Abraham iye cinca kin om, owihanke wanica.

⁵⁶ Unkan wi yamni ecetu hehanyan Mary Elisabeth kici un, qa hehan iye ti ekta kihda.

⁵⁷ Elisabeth cinca ton kte cin wanna iyehantu; unkan hokśidan wan ton.

⁵⁸ Unkan ikiyedan unpi kin hena, ic̣epanwicaye cin koya, Itancan kin nina onśikida naḣonpi; hecen kici iyuśkinpi.

⁵⁹ Unkan anpetu iśahdogan qehan, hokśiyoqopa kin baḣdayapi kta on hipi; unkan atkuku Zacariyas caje kin he icajekiyapi.

⁶⁰ Unkan hunku kin waayupte c̣a heya, Hiya; tuka Johannes eciyapi kta.

⁶¹ Unkan heciyapi; Takuwicayaye cin tuwedan hecen eciyapi śni ce.

⁶² Unkan atkuku kin iś token eya cajeyate kta hecinhan, he iyuteya iwangapi.

⁶³ Unkan iś wowapi akan kagapi wan da, qa; Johannes he caje kin ee ce, eya owa. Unkan owasin inihanpi.

⁶⁴ Unkan hecehnana i kin yukawapi, qa ceji kin kiyuśkapi; unkan ie, c̣a Wakantanka yatan.

⁶⁵ Unkan okśan tipi kin owasin wikopapi: unkan iapi kin dena owasin Juda hośki kin owancaya yaotaninpi.

⁶⁶ Unkan tona naḣonpi kin owasin cante mahen awacin unpi, qa heyapi; De taku hokśiyoqopa kta he. Unkan Wakantanka nape kin he kici un.

⁶⁷ Hehan atkuku Zacariyas Woniya Wakan ojudan, qa wokcan qa heya;

⁶⁸ Itancan Wakantanka Israel tawa kin he taoyate kin wanna wicahiyohi, qa opewicakiton, on etanhan yawaśtepi nunwe:

⁶⁹ Taokiye Dawid ti kin en wanikiyapi he wan yuwankan eunkicihdepi ce:

⁷⁰ Maka kin tokaheya icage cin ehantanhan, wicaśta wokcan wakan tawa ipi kin eciyatanhan, oie kiton kin hena iyecetu:

⁷¹ Hecen tokaunyanpi qa unkiyuśepi kin hena napepi kin etanhan niunkiyapi kta;

⁷² Wowaonśida hunkakewicunyanpi cajewicakiyate ciqon, he ecen econ kta, qa wokiyapi wakan tawa kin he kiksuye kte;

⁷³ Abraham ateunyanpi kin he taku wakanyan eciye ciqon he hee kta ce;

⁷⁴ Decen ionśiunkidapi kta, tona tokaunyanpi nape kin etanhan unkiyuśpapi kinhan, wokokipe codan ohoundapi kta,

⁷⁵ Iye itokam, wicoowotanna qa wicoecetu kin en, tohanyan unnipi kin hehanyan.

⁷⁶ Qa niye, hokśiyoqopa, Wicasta wokcan Iyotan Wankantu tawa kin eniciyapi kta; Itancan tacanku kin wiyeya yecage kta on ite kin itokam de kta;

⁷⁷ Taoyate woaḣtani wicakicicajujupi kin eciyatanhan wanikiyapi sdonyapi kte cin he wicayaqu kta;

⁷⁸ Wakantanka unkitawapi canteunkiyapi kin heon etanhan; qa heon wankan tanhan anpao kin hiyounhipi ce;

⁷⁹ Hecen otpaza qa wiconṭe ohanzi kin ehna iyotankapi kin hena iyoyamwicaye kta; qa unsihapi kin wookiye canku kin ohna unkayapi kta ce, eya.

⁸⁰ Unkan hokśiyopa kin icage, c̣a tawacin kin waśaka aya; unkan Israel en taninic̣iye kte cin hehanyan, makoskan en ece un.