Johannes 10 - Dakota Wowapi Wakan Kin

¹ Wowicake, wowicake eciyatanhan heciciyapi; Tuwe taḣinca tipi tiyopa ohna tin iyaye śni, tiyopa icunonpa tanhan ti iyoḣpaye cin he wabotice c̣a wamanon kin heca.

² Tuka tuwe e tiyopa eciyatanhan tin iyaye cin nee taḣinca tawa wicaye cin ee.

³ Qa iye tiyopa awanyake cin tiyopa kiciyugan ece, unkan taḣinca kin he ho kin naḣonpi ece; taḣinca tawa kin otoiyohi cajeyan wicakico, qa tankan wicahdoya ece.

⁴ Unkan taḣinca tawa kin tankan awicau eca, wicitokam ya ece; unkan taḣinca kin iś ihakam yapi ece, ho kin iyekiyapi nakaeś.

⁵ Qa tuwe tokeca kinhan he ihakam yapi kte śni, tuka nakicipapi kta; tuwe tokeca ho kin iyekiyapi śni, heon etanhan.

⁶ Wiyacinpi kin de Jesus ecen ewicakiya; tuka taku owicakiyake cin hena okaḣnigapi śni.

⁷ Hehan ake Jesus hewicakiya; Wowicake, wowicake on heciciyapi, Taḣinca tipi tiyopa kin he miye ce.

⁸ Tona mitokam hipi kin hena owasin waboticapi qa wamanonpi kin hecapi; tuka taḣinca kin anawicagoptanpi śni.

⁹ Tiyopa kin he miye; tuwe miye eciyatanhan ti iyoḣpaye cinhan ni kta; qa mahen ye c̣a tankata inanpa eca wato tanyan iyeye kta.

¹⁰ Wabotice cin he wamanonpi, tin wicaktepi, waihangyapi henakiya on hi ece; tuka wiconi yuhapi kta, qa takudan icakije śni unpi kta e heon miye wahi.

¹¹ Waawanhdake waśte kin he miye. Waawanhdake waśte kin he taḣinca kin on wiconi tawa eḣpekiya.

¹² Tuka tuwe odotapi un, qa waawanhdake kin ee śni, qa taḣinca tawa śni kin he śunktokeca an u wanyaka eca, taḣinca kin eḣpewicaye c̣a najica ece; unkan śunktokeca iyawicaḣpaye c̣a ihangwicaya ece.

¹³ Odotapi un kin he wodetapi un, qa taḣinca kin ihawicakta śni, heon etanhan napa ece.

¹⁴ Waawanhdake waśte kin he miye, qa taḣinca mitawa kin hena sdonwicawakiya, qa mitawa kin iś nakun sdonmakiyapi ece.

¹⁵ Ate token sdonmakiye cin he iyecen miś Ate sdonwakiya; qa taḣinca kin hena on wiconi mitawa kin eḣpewakiya.

¹⁶ Qa taḣinca toktokeca nakun wicamduha, taḣinca tipi kin den un śni: hena nakun awicawahi kta, hecen miho kin naḣonpi kta; hetanhan taḣinca tipi wanjidan kta, qa waawanhdake wanjidan kta.

¹⁷ Wiconi mitawa eḣpewakiye c̣a, ake ewehdaku kte cin heon Ate waśte makidaka.

¹⁸ Tuwedan he maki kte śni; qa miye cinka he wicawaqu; he amduśtan kte cin owakihi, qa ewehdaku kte cin nakun owakihi; Ate hecen econ maśi ce, eya.

¹⁹ Akeś wicoie kin dona on Juda oyate kin akipam tawacinpi.

²⁰ De taku wakan śica yuha, qa he ihnaśkinyan, tokeca e nayaḣonpi he, wicota eyapi.

²¹ Tuka apa iś, Tuwe wakan śica yuhe cin decen oieye śni ece; taku wakan śice cin he iśta gongapi iśta wicakiyukawa okihi kta he, eyapi.

²² Wanna Jerusalem en yuwohduze tonpi omniciye kagapi ece qon hehantu; unkan waniyetu.

²³ Unkan icunhan tipi wakan ohna, Solomon ohanzi hdepi, tawa qon he en Jesus omani.

²⁴ Hehan Juda oyate itan ihdukśan himniciyapi qa heciyapi; Tohanyan wacin akipam yusunyakiyapi he; Messiya kin he niye hecinhan taninyan unkokiyaka po.

²⁵ Jesus awicayupta; Wanna ociciyakapi tuka wieamayadapi śni qon; Ate caje kin eciyatanhan wicoḣan ecamon kin hena omayake cin ee.

²⁶ Taḣinca tawa wicawaye cin he oyapapi śni, he etanhan wicamayadapi śni, eciciyapi qon he iyececa.

²⁷ Taḣinca mitawa kin miho kin naḣonpi, qa hena sdonwicawakiya, qa mihakam unpi.

²⁸ Qa owihanke wanin wiconi wicawaqu; qa icimana owihankepi kte śni, qa minape kin etanhan tuwedan wicayuśpe kte śni.

²⁹ Ate hena maqu kin he taku owasin sam iyeya tanka; qa Ate nape kin etanhan tuwedan wicayuśpa okihi śni.

³⁰ Miye, qa Atewaye cin unwanjipidan, eya.

³¹ Hehan Juda oyate ake inyan icupi, on kininpi kta e heconpi.

³² Unkan Jesus awicayupta; Ate eciyatanhan wicoḣan waśte ota cicipazopi; hena tukte wanji on nakaha inyan on mayakininpi kta he, eya.

³³ Juda oyate ayuptapi qa heyapi; Wicoḣan waśte on unnicininpi kte śni, tuka iapi śica on, qa winicaśta tuka Wakantanka nic̣icage cin heon etanhan.

³⁴ Jesus awicayupta; Taku wakan kin henicapi, eciciyapi ce, he woope nitawapi kin en hecen kagapi śni he.

³⁵ Hecen tona Wakantanka oie kin en wicahiyohi kin hena taku wakanpi ewicakiya hecinhan, qa wowapi wakan kin he yujujupica śni;

³⁶ Hecen tuwe Ateyapi kin hdnwakan qa makata u śi kin he, Wakantanka Cinhintku kin he miye ce, epe ciqon, heon, Taku śica eha ce, token eyakiyapi kta he.

³⁷ Ate oḣan kin hena ecen ecamon śni kinhan, wicamadapi śni po.

³⁸ Tuka hecen ecamon kinhan, miye wicamayadapi śni eśta, wicoḣan kin hena wicada po; hecen Atewaye cin micica, qa miye he weeica, heciyatanhan sdonyayapi qa wicayadapi kta ce, eya.

³⁹ Heon etanhan nakun ake ṭinsa yuze wacinpi; tuka napepi kin etanhan ihduśpa.

⁴⁰ Qa ake hetanhan Jordan wakpa kin he en, Johannes baptem wicaqu ece qon he en i, qa en ounyan.

⁴¹ Unkan wicota en hipi qa heyapi; Johannes takudan wapetogya ecen econ śni, tuka Johannes wicaśta kin de etanhan tona oyake cin owasin wowicake.

⁴² Unkan hen wicota wicadapi.