Jakob 1 - Dakota Wowapi Wakan Kin

¹ Jakob, Wakantanka taokiye, qa Jesus Messiya Itancan tawa kin he, wicowazi akenonpapi enanakiya eyaye cin hena wowapi wicakicaga; wookiye.

² Mihunkawanji, taku wawiyutanyan un kin ota ayakipapi kinhan, he wowiyuśkin ocowasin hdawa po:

³ Wacinyayapi iyutanpi kin he wacintankapi kaga e sdonyayapi.

⁴ Tuka wacintankapi kin he toḣan kin tanyan hduśtan kte; hecen niyuśtanpi qa ocowasin yaunpi kta, qa takudan iyonitpanipi kte śni.

⁵ Niyepi etanhan tuwe woksape nice cinhan, Wakantanka kida kta, iye owasin iyukic̣uya wicaqu ece, qa iyopewicaye śni; unkan qupi kta.

⁶ Tuka takudan ceṭunhda śni wacinyan kida kta; tuwe waceṭunhda kin he miniwanca taja kin iyececa, tateyanpa kaśkanśkan qa kaḣoya eḣpeye cin.

⁷ Wicaśta kin he Itancan kin etanhan taku icu kta kecin kta iyecece śni.

⁸ Wicaśta tawacin nonpa kin he tacanku owasin ohna kaktihanhan un ece.

⁹ Hunkawanjinkiciyapi waḣpanica kin yuwankan iyeyapi kinhan, heon iyuśkin kta.

¹⁰ Tuka wijica un kin yuwaḣpanicapi kinhan, on iyuśkin kta; peji ḣca kin he iyecen tokan aye kte cin heon.

¹¹ Anpetu wi kin hinanpe c̣a kata aya eca, wato kin śniśya ece, qa waḣca iḣpaye c̣a owanyake waśte kin he atakuni śni ece: he iyecen wicaśta wijica kin iye toḣan kin en awihnuni kta.

¹² Wicaśta iyutanyanpi kin he yawaśtepi ece; tohan tanyan yukcanpi kinhan, hehan wiconi wateśdake, Itancan kin tona waśtedakapi iwahowicaye ciqon, hee icu kta.

¹³ Tuwe iyutanyanpi kinhan, Wakantanka iyutanmayan ce, eye kte śni: Wakantanka taku śica on iyutanyanpi kta okihi śni, qa nakun tuwedan iyutanye śni.

¹⁴ Tuka wicaśta otoiyohi iye cantiheye śice cin on iyutanpi qa iyakapeyapi ece.

¹⁵ Hehan wocantiheye śice cin icage cinhan woaḣtani kaga; qa woaḣtani yuśtanpi eca, wiconṭe icaḣya ece.

¹⁶ Mihunkawanji waśte, ic̣ihnayanpi śni po.

¹⁷ Taku wicaqupi waśte qa yuśtanpi kin owasin wankantanhan un, qa iyoyanpa Ateyapi kin eciyatanhan kun u ece; iye qe tokeca śni, qa yuhomnipica śni ḣinca.

¹⁸ Iye tawacin kin eciyatanhan, wowicake oie kin on cinca unkagapi, hecen taku kage cin ehna unkiye waskuyeca tokaheya iyeuncecapi kta.

¹⁹ Heon etanhan, mihunkawanji waśte, wicaśta otoiyohi wanaḣon oḣanko kta, ie kapin kta, qa wacintanka kte:

²⁰ Wicaśta śinhdapi kin he Wakantanka toowotanna kin icaḣye śni.

²¹ Heon etanhan, wicowaḣteśni kin owasin, qa taku śica iyatahdepi kin eḣpeya po; qa wicoie ninagipi niye kta okihi kin he onśiic̣iya icu po.

²² Tuka wicoie kin ecen econ po, qa iye ic̣ihnayanpi, naḣonpi ecedan, unpi śni po.

²³ Tuwe wicoie naḣon eśta ecen econ śni kinhan, he wicaśta wan ihdiyomdasin on ite iwanihdake cin iyececa;

²⁴ Iwanihdake c̣a tankan iyaya, unkan hehan hinnakaha ite tokeca kin he akiktonja ece.

²⁵ Tuka tuwe wicoope on tawaic̣iyapi yuśtanpi kin he opaḣta yanke c̣a, en un kinhan, tuwe naḣon qa akiktonje cin heca śni, tuka wicoḣan econ kin heca, hee e taku econ kin en yawaśtepi kta.

²⁶ Tuwe niyepi kin etanhan woohodapi kin en opa se ececa hecinhan, qa ceji hdaśke śni, tuka iye cante ic̣ihnaye cinhan, he woohodapi ope cin he taku śni.

²⁷ Wakantanka qa Ateyapi kin itokam woohodapi opapi ecedan qa aśape śni kin he dee; Wamdenica qa wiwazica kakijapi eca en wicahipi, qa wicoicage kin en taku iyaonpepica śni ihduhapi kin hee.