I. Timotheos 1 - Dakota Wowapi Wakan Kin

¹ Palos Jesus Messiya yeśi qon, Wakantanka Wanikiya unkitawapi, qa Jesus Messiya Itancan wapinunyanpi kin he toope kin eciyatanhan,

² Timotheos, wacinyanpi kin eciyatanhan micinkśi kin hee, wowaśte, wowaonśida, wookiye ko, Wakantanka Ateunyanpi, qa Jesus Messiya Itancan unkiyapi kin hena etanhan kiciun nunwe.

³ Makedonia ekta mde c̣ehan, Ephesus en owanji yanke ciśi, wanjikji woonspe tokecu oyakapi kte śni e iwahokonwicayakiye kte cin heon;

⁴ Qa hitunkakanpi, wicoicage owihanke śni oyakapi ko awacinpi kte śni; hena taku kin wiwangapi eceedan okihi, qa on Wakantanka wacinyanpi kin en icaḣyapi śni.

⁵ Wicacante ecedan, wicanagi waśte, qa wacinyanpi wicakapi kin etanhan wacantkiyapi kin he woahope ecetuyapi kin hee.

⁶ Tona he icunonpa yapi kin hena takuśniśni akinicapi kin en yeiciyapi.

⁷ Woope kin tokan onspewicakiyapi kta cinpi; tuka taku eyapi, qa taku waditagya oyakapi kin he iyukcanpi śni.

⁸ Woope kin he waśte sdonunyanpi, tuwe woope kin iyecen yuhe cinhan.

⁹ Qa he de sdonunyanpi, woope kin he wicaśta owotanna kicagapi śni, tuka tona woope opapi śni, qa anagoptanpi śni kin hena wicakicagapi, tona Taku Wakun ohodapi śni, qa waḣtanipi sa, wnonśidapi śni qa wayaśicapi, atkuku hunku kici wicakitepi kin, qa wicaśta wicakaṭapi kin hena,

¹⁰ Wawiciḣaḣapi econpi, waihuhupi sa, wicaśta wiyopewicaye cin hena, itonpiśni qa woope kicaksapi kin hena on woope kagapi ece; qa taku tokeca woonspe zani kin kaśeye cinhan he nakun:

¹¹ Wakantanka wacantkiya wotanin waśte wowitan yuhe maśi kin he eciyatanhan.

¹² Unkan Jesus Messiya Itancan unkiyapi he okihimaye c̣a, wacinyepica madake c̣a, wicoḣtani kin de en opemaye ciqon he wopida ewakiya ece.

¹³ He itokam waośtewahda, qa śicaya wicawakuwa, qa waḣanmic̣ida; tuka wicawada śni icunhan hena iyukcan śni ecamon kin heon onśimadapi.

¹⁴ Qa Itancan unkiyapi towaonśida kin he wacinyanpi qa wacantkiyapi Jesus Messiya en nina yuotapi.

¹⁵ Wicoie kin de wacinyepica, qa owancaya icupi kta iyececa, Jesus Messiya waḣtanipi sa niwicaye kta e on makata hi; hena en miye imayotan.

¹⁶ Tuka heon etanhan onśimadapi, hecen miye en tokaheya Jesus Messiya wawacinkta yuza tanka owasin hdutanin kta, wicani kta e on wicadapi kte cin hena waonspewicawakiye kta e heon.

¹⁷ Hecen Wicaśtayatapi owihanke wanica, ṭepica śni, qa wanyakepica śni un kin, Taku Wakan ecedan ksape cin hee, woyuonihan, wowitan ko, owihanke wanin kicihan nunwe.

¹⁸ Timotheos micinkśi, woope kin de cic̣u, niye on wokcanpi tokaheya ekta un qon hena eciyatanhan, hecen hena on ozuye waśte en akicita oyape kta;

¹⁹ Wowacinye qa wicanagi waśte sutaya yahduhe kte cin heon. Wanjikśi hena eḣpeyapi qa on wacinyanpi ekta kamden iyeic̣iyapi.

²⁰ Yumeneos qa Aleksander kici, hena hececapi, hena Satan waqu, waośtehdapi kte śni onspeic̣iciyapi kte cin heon.