I. Korinth 14 - Dakota Wowapi Wakan Kin

¹ Wacantkiyapi kin he okipa po, qa taku wakanyan wicaqupi in hena cin po; tuka widukcanpi kte cin he iyotan.

² Tuwe ceji tokeca on ie cin he wicaśta kin takudan owicakiyake śni, tuka Wakantanka taku eciya; tuwedan naḣon śni kin heon: hececa eśta Woniya kin eciyatanhan taku woanaḣbe kin oyaka tuka.

³ Tuka tuwe wiyukcan oyake cin he wicaśta kin wowicakiyaka, on icaḣyapi qa wahokonkiyapi qa kicanptapi.

⁴ Tuwe ceji tokeca on ie cin he iye ksamiciya; tuka tuwe wiyukcan oyake cinhan he okodakiciye kin ksamwicaya ece.

⁵ Niyepi kin owasin ceji toktokeca on iyaapi kta wacin, tuka widukcanpi kte cin he iyotan wacin. Tuwe wiyukcan kin he tanka qa tuwe ceji tokeca on ie cin he ihukuya, ieska oyake śni kinhan, hecen okodakiciye kin icaḣyapi kta tuka.

⁶ Unkan nakaha mihunkawanji, ceji tokeca on iwaa en ciupi kinhan, he token oniciyapi kta he; yaotaninpi, qa wookaḣnige, qa wiyukcanpi, qa woonspe kin unmana eciyatanhan eciciyopi śni kinhan.

⁷ Unkan taku ni un śni kin hena, cotanka qa iś candowankiyapi kin hotanin kinhan, ho toktokeca śni kinhan, he taku on etanhan tukte e yajopi, qa takte e dowankiyapi kin sdonyapi kta he.

⁸ Maza yahotonpi tanka kin ho okonwanjidan śni yahotonpi kinhan, tuwe zuyapi kta e wiyeya icicage kta he.

⁹ He iyecen niś niyepi, ceji on wicoie okaḣniḣ waśteśte iyaapi śni kinhan, token on etanhan taku oyakapi kin he taku ee sdonyapi kta he; okaduza kin en iyaapi kta.

¹⁰ Maka kin akan ho ocaje tokeca kanakiya naceca, qa owasin taku kapi.

¹¹ Tuka miśno kin taku kapi kin sdonwaye śni kinhan, tuwe ie cin he Ikcewicaśta kin kecanmakin kta, qa mis eya tuwe ie cin he Ikcewicaśta kin heca wadake kta.

¹² Hecen wicoḣan wakan nina yacinpi kinhan, okodakiciye kin icaḣyapi kta e wadupipike kte cin he akita po.

¹³ Heon tuwe ceji tokeca on ie cinhan, he ieska oyake kta e icekiye kta.

¹⁴ Miye śaia cewakiye cinhan, minagi kin he cekiya; tuka mitawacin e qe takudan icaḣye śni.

¹⁵ Hecen toketu he. Miye minagi kin eciyatanhan cowakiye kta, qa nakua mitawaein kin eciyatanhan cewakiye kta; minagi kin on wadowan kta, qa nakun mitawacin kin on wadowan kta.

¹⁶ He hecece śni kinhan, ninagi on wopida eha eca, tuwe onspe śni en iyotanke cin he token, wopida ehe cin en, Amen eye kta he, taku ehe cin sdonye śni nakaeś.

¹⁷ Wopida tanyan eha, tuka iye kin okaḣnige śni.

¹⁸ Wakantanka mitawa wopida ewakiya ce, niyepi kin owasin sam iyeya ceji tokeca on iwaa ece.

¹⁹ Tuka okodakiciye kin en mitawacin kin eciyatanhan wicoie zaptanna iwae kta, on wicaśta tokeca onpsewicawakiye kte cin he iyotan waśte, qa ceji tokeca on wicoie kektopawinge wikcemna iwae kte cin he aoptetu.

²⁰ Mihunkawanji, wookahnige en hokśiyoqopa unpi śni po; tuka wicotawacin śice cin en hokśiyoqopa po, qa wookaḣnige kin en wicaśta tanka un po.

²¹ Woope kin en kaken kagapi; Ceji tokeca, iha tokeca ko on oyate kin de owicaweciye kta; tuka hececa eśta, namaḣonpi kte śni, Itancan kin eya.

²² Hecen ceji tokeca kin hena wowakta kin hee, tona wicadapi śni kin hena eepi śni, tuka tona wicadapi kin hena on wowapetokeca kin hee.

²³ Okodakiciye kin ocowasin witaya mniciyapi, qa owasin ceji tokeca on iapi kinhan, qa tona wacinton śni, wicada śni ko en hipi kinhan, winitkotkopika kecannicinpi kte śni he.

²⁴ Tuka owasin wiyukcanpi, qa tuwe wicada śni wacinton śni un kin tin hiyu kinhan, he owasin on onspekiyapi, qa owasin on yacopi kta.

²⁵ Qa hecen iye cante kin ekta taku anaḣbe cin yutaninpi kta; hehan makipusdiya eḣpeic̣iye c̣a Wakantanka ohoda kta, qa Wakantanka niyepi en nicipi un kin oyake kta.

²⁶ Heon mihunkawanji toketu he: Mniniciyapi eca niyepi otoiyohi odowan duhapi, qa woonspe duhapi, qa ceji tokeca, qa yaotaninpi wan, qa ieska oyakapi wan duhapi ece. Taku owasin waonspekiyapi kta e on econpi nunwe.

²⁷ Tuwe ceji ṭokeca on ie cinhan, wancadan wicaśta nomnom yamnimni, qa hena wanji itokto econpi kta, qa wanji ieska kiyapi kta.

²⁸ Tuka tuwe ieska kiyapi kte cin wanice cinhan, okodakiciye kin en inina yanke kta; iś iye oic̣iciye c̣a Wakantanka okiye kta.

²⁹ Qa wicaśta wokcan kin hena nomnom qa yamnimni oyakapi kta, qa unmanpi kin wiyukcan unpi kta.

³⁰ Qa tuwe ikiyedan iyotanke cin he taku wakanyan okiyakapi kinhan, tokaheya kin he inina yanke kta.

³¹ Owasin wanji itokto widukcanpi kin odakapi kta oyakihipi; hecen owasin onspekiyapi, qa owasin iwicakiyapi kta.

³² Qa wicaśta wokcanpi toksapepi kin wicaśta wokcanpi kin anawicakigoptanpi ece.

³³ Wakantanka kin he oqoapi kin kage śni, tuka wookiye kin he tawa, oyate wakan okodakiciye kin owasin en un kin iyececa.

³⁴ Unkan winoḣinca nitawapi kin okodakiciye kin ekta inina yankapi kta. Hena ie kta e iyowinyanpi śni, tuka anagoptan yukanpi kta, woope heye cin iyecen.

³⁵ Qa taku onspepi kta cinpi kinhan iye tipi ekta hihnakupi kin iwicawangapi kta. Okodakiciye kin en winoḣinca ie cin he wowiśtece.

³⁶ Tokeca, niyepi kin etanhan Wakantanka oie kin hinanpa he; qa niyepi niśnanpidan ekta nihipi he.

³⁷ Tuwe wicaśta wokcan, qa iś wicaśta wakan kin heca kecanic̣in kinhan, he taku wowapi en cicagapi kin hena Itancan tawoahope kin hee e yaotanin kta.

³⁸ Qa tuwe iyukcan śni un kinhan, he iyukcan śni un nunwe.

³⁹ Hecen mihunkawanji widukcanpi kte cin he akita po, qa ceji tokeca on iapi kte cin teḣindapi śni po.

⁴⁰ Qa taku owasin iyokipiya owotanna econpi nunwe.