I. Korinth 1 - Dakota Wowapi Wakan Kin

¹ Palos Wakantanka tawacin kin eciyatanhan, Jesus yewicaśi kin heca e kaḣnigapi kin he, qa Sosthenes hunkawanjinunyanpi kici,

² Wakantanka taokodakiciye Korinth ekta un qa Jesus Messiya on ecepidan kta, wakan wicakaḣnigapi kin hena eepi, qa tona makoce otoiyohi en Jesus Messiya iś iyepi kin Itancan kiyapi, qa unkiś eya Itancan unkiyapi caje kin hoyeyakiyapi kin wowapi unnicagapi.

³ Wowaonśida, wookiye ko, Wakantanka Ateunyanpi, qa Jesus Messiya Itancan kin etanhan niyepi en nicipi un nunwe.

⁴ Ohinniyan niyepi kin on Wakantanka mitawa wopida ewakiya, Wakantanka towaonśida Jesus Messiya eciyatanhan nic̣upi kin heon;

⁵ Taku henana owasin on, iye en, wijica nicagapi, wicoie owasin qa wosdonye owasin on.

⁶ Hecen niyepi kin en Messiya tawoyaatanin kin yusutapi.

⁷ Qa hecen wowaśte wanjidan aokpaniyan yaunpi śni, qa Jesus Messiya Itancan unkiyapi ihdutanin kte cin he ape dukanpi.

⁸ He owihanketa hehanyan iyanionpepica śni niyusutapi kta, Jesus Messiya Itancan unkiyapi taanpetu kin etu.

⁹ Wakantanka wacinyepica, iye Cinhintku Jesus Messiya Itancan unkiyapi kin takodakiciyapi tawa kin en nicopi.

¹⁰ Mihunkawanji, Jesus Messiya Itancan unkiyapi cajeyan ceciciyapi ce; owasin okonwanjidan oie yetonpi, qa yuomdecapi wanin yaunpi kta, qa wicotawacin eca wanjidan wiyukcanpi ko wanjidan tanyan onspe yaunpi kte.

¹¹ Mihunkawanji, Kloe etanhanpi kin hena omakiyakapi, niyepi kin en woakinica yuke cin he.

¹² Hecen kaken epe; Niyepi otoiyohi, Palos opeya waun, qa, Apolos opeya waun, qa, Inyan opeya waun, qa Messiya opeya waun ce, ehapi ece.

¹³ Messiya yukinukan ehnakapi he; niyepi kin on Palos cansusbeca kin en okatanpi he; qa iś Palos caje on baptem nic̣upi he.

¹⁴ Wakantanka wopida ewakiya, enitanhanpi tuwedan baptem waqu śni, tuka Krispos qa Gayos heniyoza:

¹⁵ Tuwedan, miye inicaje on baptem wicawaqu, keye kte śni heon.

¹⁶ Qa nakun Stephanas tiyohnaka kin baptem wicawaqu, qa tuwe tokeca baptem waqu kinhan sdonwaye śni.

¹⁷ Baptem wicawaqu kta e on Messiya ye maśi śni, tuka wotanin waśte omdake kte cin heon; wicoksape iapi kin ohna śni, okinni Messiya cansusbeca tawa kin taku śni yapi kta.

¹⁸ Cansusbeca oyakapi kin he tona ihdutakunipi śni kin en witkotkoya iapi kin hee, tuka unkiyepi tona ni unyanpi kin en Wakantanka towaśake kin hee.

¹⁹ Kaken wowapi en kagapi; Tona wacin ksapa woksape tawa kin taku śni waye kta, qa tona okaḣnigapi kin hena wookaḣnige tawa kin mdutakuni kte śni ce.

²⁰ Wacin ksape cin tokiya un he; wowapi kage cin heca tokiya un he; wiconi kin de en wiyukcan kin tokiya un he; Wakantanka wicoicage kin de wicoksape kin yuwitkotko śni he.

²¹ Hecen Wakantanka toksape kin on, wicoicage kin de wicoksape eciyatanhan Wakantanka sdonyapi śni qehan, wowahokonkiye wowitkotkoke cin on, tona wacinyanpi kinhan hena ni wicaye kta Wakantanka iyokipi.

²² Juda oyate kin wowapetokeca dapi, qa Helenes oyate kin wicoksape akitapi ece.

²³ Tuka unkiyepi kin Messiya cansusbeca en okatanpi kin he unkoyakapi; he Juda wicaśta kin ekta wonahnaye qa Helenes wicaśta kin ekta witkotkoya iapi kin hee.

²⁴ Tuka tona wicakaḣnigapi, Juda qa Helenes wicaśta kin hena ekta, Messiya Wakantanka towaśake qa Wakantanka toksape kin hee.

²⁵ Wakantanka taku tawa witkotkoke cin he wicaśta kin isanpa woksape; qa Wakantanka towaśake śni kin he wicaśta kin isanpa wowaśake.

²⁶ Mihunkawanji, nicopi kin he wandakapi, wicaceḣpi eciyatanhan wacin ksapa ota śni, waśaka ota śni, qa wicaśta okinihan ota śni.

²⁷ Tuka wicoicage kin en taku witkotkoke cin he Wakantanka kaḣniga, on taku ksape cin wiśten ye kta; qa wicoicage kin en taku waśake śni kin hena Wakantanka kaḣniga, on taku waśake cin wiśten ye kta.

²⁸ Qa taku wicoicage kin en okinihan śni un kin he Wakantanka kaḣniga, qa taku un śni kin hena ko, on taku un kin yutakuni kte śni.

²⁹ Hecen iye itokam wicaceḣpi owasin ihdatan kte śni

³⁰ Tuka iye eciyatanhan Jesus Messiya en unyakonpi; he unkiyepi on Wakantanka eciyatanhan woksape, qa woowotanna, qa woyuecedan, qa wokajuju ikicaga.

³¹ Hecen wowapi qon iyececa; Tuwe iwinkta kinhan Itancan kin on iwinkta kta.