I. Inyan 5 - Dakota Wowapi Wakan Kin

¹ Miye hunkayapi kin hemaca, qa Messiya kakije ciqon wanmdake c̣a, wowitan yutaninpi kte cin he en owapa, tona hunkayapi yaunpi kin ceciciyapi ce;

² Wakantanka optaye tawa ehna yaunpi kin he wonwicaya po; econ niciyapi kin iyecece śni, tuka iyokipiya awanwicadakapi kta; woyuha śica kin on etanhan śni, tuka tawacin waśte on ecanonpi kta:

³ Wakantanka taku tawa ḣince cin en itancanpi kin iyenicecapi kte śni, tuka optaye kin en waonspekiya yaunpi kta.

⁴ Hecen Waawanhdake Itancan kin tohan ihdutanin kinhan, hehan wowitan wateśdake wan śnije kte śni kin he iyacupi kta.

⁵ Nakun, tona aśkatudan yaunpi kin, hunkawicayapi kin anawicagoptan po: Han, owasin otoiyohi anakicigoptan po, qa wowaḣbadan koyaka po. Tona waḣanic̣idapi kin hena Wakantanka wicakipajin, tuka tona onśikiḣanpi kin hena wowaonśida wicaqu ece.

⁶ Heon etanhan, Wakantanka nape waśake cin ihukuya onśikiḣan po; hecen tohan iyehantu kinhan yuwankan inicupi kta:

⁷ Wacin akipam duzapi kin owasin iye en aiḣpeya po; iye qe awanicinpi ece.

⁸ Witkopi śni po, waktaya un po; Wakanśica tokaniyanpi kin he mnaja hoton ece kin iyecen omani un, tuwe yapote kte cin he akita ece.

⁹ Sutaya wacinyayapi kin on he kipajin po; nihunkawanjipi maka akan unpi kin hena en wokakije kin dena iyececa yuśtanpi ece e sdonyayapi.

¹⁰ Tuka Wakantanka wowaonśida ocowasin hduhe cin, Jesus Messiya eciyatanhan, wowitan owihanke Wanica iye tawa kin en unkicopi kin he, tohan cistiyedan nicakijapi kinhan, niyuśtanpi kte, pahohośni enihnakapi, niyuwaśakapi, qa sutaya nihdepi nunwe.

¹¹ Iye qe wowitan qa wokiconze kin owihanke wanin tawa nunwe. Amen.

¹² Siluanos nihunkawanjipi wan wacinyepica wadake cin on wowapi ptecedan cicagapi; wahokonciciyapi qa wociciyakapi, Wakantanka towaśte wicakapi en nayajinpi kin he dee ce.

¹³ Babulon ekta tona om nicaḣnigapi kin hena nape niyuzapi, qa nakun Markos micinkśi kin.

¹⁴ Wacantkiyȧpi iiputakapikin on otoiyohi nape kiciyuza po. Tona Jesus Messiya en yaunpi kin owasin wookiye nicipi un nunwe. Amen.