II. Timotheos 1 - Dakota Wowapi Wakan Kin

¹ Palos, Wakantanka tawacin kin on, Jesus Messiya yeśi qon, Jesus Messiya wiconi iwahounyanpi qon he eciyatanhaq,

² Timotheos, hokśincantkiyapi mitawa kin, wowapi cicaga. Wowaonśida, wowaśte, wookiye ko, Wakantanka Ateyapi kin etanhan, qa Jesus Messiya Itancan unkiyapi kin etanhan.

³ Wakantanka, mihunkake kin etanhan nagi ska hduha ohowada kin, he wopida ewakiya, anpetu, hanyetu ko wocekiye epa eca, ayaśtan śni ciksuya waun;

⁴ Wanciyaka nina wacin, iśtamnihanpe ota aniu qon hena weksuya, hecen wowiyuśkin omajudan kta;

⁵ Tohan wowacinye anaḣbepica śni niye en niun kin he weksuye cinhan, he tokaheya nikunśi Lowis en un, qa nakun nihun Yunike en un, qa he niye en niun kin sdonwaya.

⁶ Heon etanhan kiksuyeeiye kta, Wakantanka taku nic̣u kin, nape aciputake cin eciyatanhan, he amnihenic̣iye kta.

⁷ Wakantanka wokokipe woniya kin unqupi śni; tuka wowaśake, wacantkiyapi, qa wacinksapapi woniya kin.

⁸ Hecen Itancan unkiyapi tawootanin kin on iśtece śni wo, qa nakun miye makaśkapi tawa waun kin; tuka Wakantanka towaśake kin eciyatanhan wotanin waśte en wokakije kin en okicipa wo:

⁹ He iye ni unyanpi, qa wicakicopi wakan kin on unkicopi, unkoḣanpi kin eciyatanhan śni, tuka iye tawacin, qa towaonśida, maka icage cin itokam Jesus Messiya on unqupi qon he eciyatanhan:

¹⁰ Tuka wanna hdutanin, Jesus Messiya Wanikiya unkitawapi taniniciye cin on, he wiconṭe ihangye c̣a, wotanin waśte kin en, wiconi qa ṭepica śni unpi kin iyoyanpa en au.

¹¹ Heon eyanpaha qa yeśipi kin heca makagapi, Ikcewicaśta wowicawakiyake kte cin heon.

¹² Qa he etanhan hena taku on iyotanhan iyewakiya; tuka imaśtece śni. Tuwe wacinwakiye cin he sdonwakiye c̣a, taku ehnake waśi kin hena anpetu wan u kte cin hehanyan miciyuha okihi sdonwaya.

¹³ Wicoie on zaniyan unpi naḣonciye ciqon, wowacinye, wowaśte ko, Jesus Messiya en un kin he ṭinsa yuza wo.

¹⁴ Woniya Wakan unkicipi un kin eciyatanhan, wicoḣan waśte nic̣upi qon he tanyan yuha wo.

¹⁵ Tona Asia en un kin owasin amayuśtanpi kin he sdonyaya; Phugellos qa Hermogenes he en opapi.

¹⁶ Onesiphoros tiyohnaka tawa kin Wakantanka onśikida nunwe; iye ota micanpte c̣a makaśkapi kin on iśtece śni.

¹⁷ Qa Roma ekta hi qehan, nina omade qa iyemayan.

¹⁸ He anpetu kin he en Itancan kin etanhan wowaonśida iyeye kta e Itancan okihikiya nunwe; Ephesos ekta taku tona on omakiye ciqon he tanyan sdonyaya.