Hebrew 3 - Dakota Wowapi Wakan Kin

¹ Heon, mihunkawanji wakan, maḣpiya tanhan wicakico kin en oyapapi kin, wounhdakapi kin on Jesus Messiya yeśipi qa Wawayuśna Itancan kin he awacin po.

² Moses tipi ocowasin ohna owotanna un kin, he iyecen iye qe tuwe econ śi qon owotanna ecakicon.

³ Tuwe ticage cin he tipi kin sam iyeya yuonihanpi ece kin, he iyecen he qe Moses kapeya wowitan tanka yuha.

⁴ Tipi otoiyohi tuwe kaga; tuka tuwe taku owasin kage cin he Wakantanka ee.

⁵ Moses wowidake un kin heca, tipi tawa ocowasin ohna wacinyepica un, taku oyakapi kte cin hena yaotanin kte cin heon.

⁶ Tuka Messiya, iye ti kin ocowasin ohna, Cinhintkuyapi kin iyececa; tipi tawa kin he unkiyepi, waditagya wounhdakapi, qa wowiyuskinyan wacinunyanpi kin he owihanketa ṭinsa unhapi kinhan.

⁷ Heon etanhan, Woniya Wakankin kaken eya, Anpe dehan iye ho kin nayaḣonpi kta hecinhan;

⁸ Cante ihduteḣipi śni po, ḣepuza en, anpetu wawiyutanyan un kin en, wawakipajinpi qon iyecen;

⁹ Nihunkakepi iyutanmayanpi, qa mayukcanpi, qa waniyetu wikcemna topa hehanyan mioḣan kin wanyakapi ce.

¹⁰ Heon etanhan wicoicage kin he on iyomayake c̣a, hepa, Cantepi kin ekta ohinniyan nunipi, qa mitacanku kin sdonyapi śni ce.

¹¹ Hecen śinwahda qa, Okiḣpapi mitawa kin en yapi kte śni ce, eya wakonza.

¹² Mihunkawanji, wakta po, okinni cante wicada śni, qa śice cin en niunpi, on Wakantanka ni un kin aduśtanpi kta.

¹³ Tuka anpetu otoiyohi wahokonkiciciya po, anpe dehan eyapi kin hehanyan; okinni woaḣtani wohnaye kin on wanji tukte niyuteḣipi kta.

¹⁴ Tokaheya wicaundapi kin he owihanketa sutaya unhapi kinhan, Messiya en ounpapi.

¹⁵ Anpe dehan, iye ho kin nayaḣonpi kinhan, cante hduteḣipi śni po, wawakipajinpi qon en iyececa ce, eyapi kin hehanyan.

¹⁶ Tona naḣonpi qon hena kipajinpi he: tuka Moses tona Egupta etanhan awicau qon hena owasin śni he.

¹⁷ Tona waniyetu wikcemna topa hehanyan iyoyakeyapi qon hena tuwepi he; tona waḣtanipi, qa ḣepuza en tancan iḣpayapi qon hena eepi śni he.

¹⁸ Qa okiḣpapi tawa kin en yapi kte śni, konza kewicakiye ciqon hena tuwepi he; tona wicadapi śni qon hena eepi śni he.

¹⁹ Hecen wicadapi śni kin heon en yapi kta okihipi śni e wanunyakapi.