Mateo 24 - Porciones del Nuevo Testamento

Jesúsba jaradꞌa Daizeze de ãrĩnaĩta

¹ Daizeze dedꞌa ewara maẽba Jesús wãne, izha jʉrʉkuadꞌabara orrasidꞌa de nʉmeta ũdubidꞌaita Daizeze dedꞌebemata.

² Mawũẽ mawũãsia: ¿Marãbara akʉ kꞌopanʉ ẽka naʉ̃ jõma? Mʉã wãrĩnu marãã jaraya, namarã mongꞌara abꞌari mongꞌara ʉ̃rʉ̃bidꞌa kꞌobꞌa ẽbaya ãrĩbʉdaba.

Sãwũãĩnebema ẽjũã jõĩ nawedꞌa

³ Olivo kꞌatumane Jesús jewedꞌa bꞌʉdꞌe izha jʉrʉkuadꞌabara orradꞌape dobꞌaʉa mawũãsidꞌa: ¿Daia jaradua, sõmbedꞌepe Daizeze deta mawũã ãrĩnaĩrã, sãwũãĩpe bʉ zeira, sãwũãĩpe ewari nʉmʉta jõĩrã?

⁴ Mawũãnaĩ Jesúsbara panaʉ̃ mawũãsia: Kĩrãkuita bꞌeaudua miõã zhi sewabidꞌa ẽbaita.

⁵ Nʉmʉne bio sewata mʉneba zebʉdabara mawũãnaña: Mʉrã zhãrã Ẽdrʉbia. Aramaʉ̃ne bio sewadꞌaya.

⁶ Marãbara zhõta ũrĩnaña namabidꞌa ãĩbidꞌa, maʉ̃nerã perarãũdua, maʉ̃ jõma mawũã berabꞌariibara, mawũãmina wadꞌi ẽbaya ewari nʉmʉta jõĩrã.

⁷ Drua tabꞌeta drua awʉrʉta tabꞌe bawara zhõnaña, nokꞌorãta nokꞌorã awʉrʉ bawara zhõnaña. Nʉmeña puata, jarrabata, ẽjũã ureta baridu maẽ.

⁸ Maʉ̃ jõma puata jẽdeba nʉmeña.

⁹ Marã chãbꞌaridꞌaya zuburia odꞌamarẽã, aramaʉ̃ne beakuadꞌaya, marã jõmaʉ̃ba juradꞌaya mʉ kꞌarea.

¹⁰ Mʉnebemata ĩjã bꞌebara maʉ̃ ewadera bioba ĩjã ẽã duaneña, mawũẽ zhiya zhi jidabidꞌaya, zhiya zhi juradꞌaya.

¹¹ Sewata Daizezeba bedꞌeata jarabibaridꞌe duanaĩta bio piradrʉdꞌaya, aramaʉ̃ne bio sewadꞌaya.

¹² Bia ẽãta eababʉrʉba bioba zhãrã kʉãgꞌadꞌa ẽbaya.

¹³ Mawũãmina izhi ewarita jõñeẽna mʉta pẽwã bꞌʉra ẽdrʉya.

¹⁴ Kꞌãwũã bedꞌea biata Daizezeta Nokꞌodꞌebemata jaradꞌaya ẽjũã jõmaʉ̃ maẽ, aramaʉ̃ne zhãrã jõmaʉ̃ba kꞌawuadꞌaya, mobebʉrʉ zeya ewari nʉmʉta jõĩrã.

¹⁵ Mawũẽ Daizeze dedꞌa jaidꞌebema ne mitiata nʉmʉbʉdata marãba ũdubʉdadꞌera, Daizezeba bedꞌeata jarabibariba Danielba jaradꞌata ũdudꞌaya. Mawũẽ zhi naʉ̃ lebʉrʉbara maʉ̃ sãwũãta kꞌawuarua.

¹⁶ Mobebaira Judeadꞌe bꞌera merũ wãẽbaudua kꞌatumaẽna.

¹⁷ De ʉ̃rʉ̃ kꞌobꞌʉra udꞌubꞌaepe edꞌa wãrãrũã kꞌãrẽ bʉzhi dedꞌabema jiraedaira.

¹⁸ Meã kꞌobꞌʉra deidꞌu zerãrũã bʉzhi wua jiraedaira.

¹⁹ Bꞌiogꞌoa bꞌera, wũãwũã judꞌebema erubꞌera zuburiadꞌaya maʉ̃ ewadera.

²⁰ Mawũẽ zhiwidꞌiudua marã mawũã merũbʉdadꞌera nʉma ẽbamarẽã kue ewarita miã ẽnaʉ̃bada ewarita.

²¹ Mobebaira kꞌãbãẽã zuburiatrʉ nʉmaña, ẽjũã osidꞌadꞌebemata idꞌibasiidꞌu mawũãrã ne ẽãta nʉmaña, miã tẽãbidꞌa mawũãrã nʉma ẽbaya.

²² Maʉ̃ ewarita Daizezeba kꞌakutua nʉmʉ ẽbʉrʉ miõta zokꞌai bꞌa ẽã. Mawũãmina izha zhi jʉrʉmata bꞌe kꞌarea maʉ̃ ewarira kꞌakutua nʉmʉña.

²³ Mawũẽ iabꞌaʉba zhãrã Ẽdrʉbita za bꞌʉa abʉrʉdꞌera, o zawa bꞌʉa abʉrʉdꞌera ĩjãrãũdua.

²⁴ Nʉmʉne zhãrã sewata zhãrã ẽdrʉbita duaneña, sewata Daizezeba bedꞌeata jarabibaridꞌe duaneña, ũdudꞌakꞌa zromata okuabʉdaba zhãrã sewadꞌaya, sewaita obꞌedꞌara Daizezeba zhi jʉrʉmata bꞌesidꞌa sewadꞌaya.

²⁵ Ya mʉãrã maʉ̃ta marãã jarabʉrʉa nawedꞌa.

²⁶ Mawũẽ drua drudrua tabꞌʉ maẽ zhãrã ẽdrʉbita bꞌʉa abʉdadꞌera akʉdꞌe wãrãũdua, o dedꞌa bꞌʉa abʉdadꞌera ĩjãrãũdua.

²⁷ Bata dajada pureabari kĩrãkꞌa mʉ Beubari Bape bꞌadꞌata zebʉrʉdꞌera dajada zeya.

²⁸ Ne beuma tabꞌʉra kꞌawuabada ãkꞌoso pouga nʉmʉba. (Mʉ zebʉrʉra aramaʉ̃ kĩrãkꞌa kꞌawuadꞌaya.)

Jesús zeidꞌebema

²⁹ Aramaʉ̃ta jari ewadera mawũã zuburia nʉmana tẽãne ʉ̃madaura pãrĩguya, jedꞌekꞌora ʉ̃na ẽbaya, chĩdaura bãjãneba jurzoaya, ne zarea zromarãta bãjãnebema pʉrʉderreadꞌaya.

³⁰ Mobebʉrʉ ũdudꞌakꞌata ũdubʉdata mʉ Beubari Bape bꞌadꞌata bãjãneba uruta ũdudꞌaya, mawũã ũdubʉdaba druadꞌe zhãrã bꞌera jõma peraba jẽgadꞌaya. Maʉ̃nerã mʉ Beubari Bape bꞌadꞌara bãjãneba jãrãrãne uruta ũdudꞌaya zarea bara kꞌãbãẽã kĩrãwãrẽã.

³¹ Mobebʉrʉ mʉãrã ángelerã mʉrẽrãta zokꞌaya trompeta jĩgua zadꞌamarẽã, aramaʉ̃ne ãba jʉredꞌaya mʉã zhi jʉrʉmata baridu maẽ bꞌeta wawara bꞌeta.

³² Bakuru higueradꞌeba sãwũãta kꞌawuaudua: Zhi jĩwĩnita wikubʉrʉdꞌera marãbara kꞌawuabada poagꞌa kꞌaita bata.

³³ Aramaʉ̃ kĩrãkꞌa mʉã jara nʉmʉta arimaẽ berabꞌari bʉsadꞌewata marãba ũdubʉdadꞌera kꞌawuaudua mʉrã zebodꞌota.

³⁴ Mʉã wãrĩnu marãã jaraya, zhãrã bꞌera neba ẽwedꞌa mʉã jara nʉmʉrã jõma arimaẽ berabꞌariya.

³⁵ Bãjã, drua nebaya, mawũãmina mʉ bedꞌeara bari neba ẽã.

³⁶ Mawũãmina kꞌãrẽ ewade kꞌãrẽ ʉ̃madaudꞌe mawũã berabꞌariira miõba kꞌawua ẽã, miã ángelerã ʉ̃trebemarãbidꞌa kꞌawuadꞌa ẽã, miã mʉãbidꞌa kꞌawua ẽã, awuarabʉrʉ kꞌawua bꞌʉa mʉ Zezebʉrʉ.

³⁷ Noé ewade berabꞌaridꞌa kĩrãkꞌa berabꞌariya mʉ Beubari Bape bꞌadꞌata zebʉrʉdꞌera.

³⁸ Jari ewadera do birui nawedꞌara nekꞌokua, kꞌãrẽ dokua, miã kꞌãĩkua bꞌeasia Noé jãba zromane edꞌa jʉ̃drʉdꞌa ewariedꞌabai.

³⁹ Adu-a bꞌedꞌe do birupe jõma jogꞌakuasia. Mawũã bꞌeaya mʉ Beubari Bape bꞌadꞌata zebʉrʉdꞌebidꞌa.

⁴⁰ Maʉ̃nerã ũme meã traja panʉta abꞌa edeya, abꞌa ãmaẽña zhi aribꞌaema ẽãta.

⁴¹ Wũẽrãrã ũme nebꞌa panʉta abꞌa edeya, abꞌa ãmaẽña.

⁴² Maʉ̃ba dauba bꞌeaudua, marãbara kꞌawuadꞌa ẽbaera kꞌãrẽ ʉ̃madaudꞌe zeita mʉta marã Nokꞌora.

⁴³ Mʉã jaraita sãwũãta kꞌawuaudua, nezrʉgamiã kꞌãrẽ ʉ̃madaudꞌe zeita zhidekʉba kꞌawuara daukꞌãrã bꞌeya, aramaʉ̃ne nezrʉgabi ẽbaya izhi dedꞌara.

⁴⁴ Marãsidꞌa aramaʉ̃ kĩrãkꞌa kĩrãkuita bꞌeaudua, mʉ Beubari Bape bꞌadꞌara zei baera marãbara zeita krĩchadꞌa ẽãne.

Nezokꞌaba ne aribꞌae bꞌʉdꞌebema

⁴⁵ ¿Kꞌaipe nezokꞌata ne aribꞌae krĩchata erubꞌadꞌa kĩrãkꞌa nʉmaĩrã? Maʉ̃ izhi nokꞌobara izhi dedꞌa bꞌe ʉ̃rʉ̃ ãmaẽsia zhiko dedꞌekamarẽã nekꞌobada ʉ̃madaudꞌe.

⁴⁶ Nezokꞌa maʉ̃ sobiaya izhi nokꞌo zebʉrʉdꞌe maʉ̃ta aribꞌae nʉmʉta ũdu zera.

⁴⁷ Mʉã wãrĩnu marãã jaraya, mawũã bꞌʉra nebia izhidꞌeta nʉmʉ jõmaʉ̃ ʉ̃rʉ̃ bꞌʉya.

⁴⁸ Mawũãmina nezokꞌa maʉ̃ta bia ẽãba izhi sobitabaiba mʉ nokꞌo zeira dããrã baya ape,

⁴⁹ abꞌarika nezokꞌarãta puokua nʉmaĩbʉrʉ, mobe itua domiãrã bawara nekꞌo itua do nʉmaĩbʉrʉ,

⁵⁰ maʉ̃ nezokꞌa nokꞌora izha jʉ̃ã bꞌʉ ẽã ewade zeya izha kꞌawua ẽã ʉ̃madaudꞌe.

⁵¹ Mobe abꞌaedꞌa puoya, mobe bꞌʉya sewa bibaʉta bꞌe bawara. Mama tebʉdꞌe jẽgaya kidꞌa kꞌõsesea.