Lucas 1 - Porciones del Nuevo Testamento

Lucaba bꞌʉ diabuedꞌa Teófiloa

¹ Jesúsdꞌebema jara panʉrã bioba bꞌʉsidꞌa, maʉ̃ dazhirãne edꞌa wãrã zromata nʉmʉã.

² Maʉ̃ta dazhaa nebʉrʉdꞌapeadꞌabara jẽdeba ãzhi dabʉba ũdusidꞌa, aramaʉ̃ne duanesia maʉ̃ bedꞌeata jarabadata.

³ Mʉmaãbidꞌa bia zesia maʉ̃ jõma jẽdeba bia widꞌikape bꞌʉpe bʉma diabueita bʉ zhi zromata bꞌʉma Teófilo.

⁴ Aramaʉ̃ne bʉara bia kꞌawuaya maʉ̃ wãrãta bʉaa jaradꞌapeadꞌata.

Ángelba jaradꞌa Juan toita

⁵ Judea druadꞌe Herode reyta bꞌasidꞌera, bꞌasia sacerdote Zacaría abadata, Zacaríara sacerdoterã Abíaba jʉre bꞌadꞌadꞌebema basia. Zhi kĩma Aarónneba urudꞌebema basia, zhi trʉ̃ Elisawe basia.

⁶ Ũmewedꞌa biata panasia Daizeze kĩrãbita. Mawũẽ kꞌãrẽã jaradꞌai ne ẽã nimi basidꞌa jõma aribꞌae panʉba Daizezeba jara bꞌʉta.

⁷ Mawũãmina wũãwũã ne ẽã panasia Elisawe tokꞌata bꞌasi baera, ãzhira ũmewedꞌa ya jipa zõrãrãta panasia.

⁸ Ewari abꞌa Zacaríabara sacerdoteba kꞌãrẽ obarita onʉmasia Daizeze kĩrãbita, sacerdoterã izhi bawarabemaba obadata onʉmasia.

⁹ Mawũẽ sacerdoterãba okꞌawa bꞌeta obʉdadꞌera Daizeze dedꞌa edꞌa wãĩbara zesia kera incienso badꞌe.

¹⁰ Maʉ̃nerã kꞌabanata nʉmʉrã jõma ãĩ ewaradꞌe zhiwidꞌi duanasia kera incienso ba nʉmʉne.

¹¹ Maʉ̃ne zhi ũdubisia ángel Daizezedꞌeta, juwua araare edau nʉmasia altar maẽ kera incienso ba bada maẽ.

¹² Mawũã ũdui Zacaríara kꞌãbãẽã perasia.

¹³ Mawũãmina ángelbara mawũãsia: Zacaría perarãrũã, bʉ zhiwidꞌi bꞌʉra Daizezebara ũrĩsia. Mawũẽ bʉ kĩma Elisawebara wũãwũã zhũmakĩrãta toya, maʉ̃ bʉara trʉ̃ga bꞌʉdua Juanta.

¹⁴ Bʉra bʉsridꞌaya, sobiaya, zhãrã bio sobiadꞌaya izhi tobʉrʉ kꞌarea.

¹⁵ Izhira Daizeze kĩrãbita zhi zromata bꞌaya. Dokꞌa baya ituata miã ne oregueata. Jawurebiaba bira bꞌaya zhi papa bꞌitaedꞌawedꞌa.

¹⁶ Israel bꞌedꞌebema bioa wakusa pẽwãbigaya ãzhi Zhibari Daizezeta.

¹⁷ Izhira dazhirã Nokꞌo nawedꞌa zebʉrʉta Jawurebiaba Elíata zarea bꞌadꞌa kĩrãkꞌa bꞌaya. Aramaʉ̃ne soidꞌu ibiadꞌe babigaya zezerãta ãzhi warrarã bawara, Daizeze bedꞌeata aribꞌae ẽã bꞌeara aribꞌaebigaya biata bꞌedꞌe kĩrãkꞌa. Aramaʉ̃ne dazhirã Nokꞌo bia edaita bꞌeabiya.

¹⁸ Mawũãĩ Zacaríabara ángelea mawũãsia: ¿Maʉ̃ mʉãrã sãwũã bia kꞌawuaipe? Mʉrã zõrã, mʉ kĩmasidꞌa jipadꞌe zhõdra.

¹⁹ Mawũãĩ ángelbara panaʉ̃ mawũãsia: Mʉrã Gabriel Daizeze kĩrãbita bꞌʉta izha bʉ ũme bedꞌeadꞌe zokꞌasia naʉ̃ bedꞌea biata jaradꞌe.

²⁰ Mawũãmina mʉ bedꞌeata bʉa ĩjã ẽãneba bʉra bedꞌea ze ẽã bꞌeya, bʉra aramaʉ̃ne bedꞌea bꞌe ẽbaya maʉ̃ta arimeã berabꞌarii ewariedꞌa.

²¹ Zhãrãbara Zacaríara jʉ̃ã bꞌeta krĩchasidꞌa kꞌãrẽba dããrãbata Daizeze dedꞌa kera ba bada maẽ.

²² Ãĩ zebʉrʉdꞌera ãzhaa bedꞌea bꞌe ẽbasia, mawũẽ kꞌawuasidꞌa Daizezeba edꞌa ne ũdubibʉrʉta. Juwuaba ne jarakꞌasia, aramaʉ̃ne bedꞌea bꞌe ẽã bꞌesia.

²³ Izha kꞌãrẽ onʉmʉ ewarita aribꞌaebʉrʉdꞌera Zacaríara dedꞌaa wãsia.

²⁴ Maʉ̃ tẽã bꞌiogꞌoasia zhi kĩma Elisawe. Mawũẽ jedꞌekꞌo juesoma dedꞌa bꞌʉta mawũã bꞌasia:

²⁵ Mʉrã Daizezeba kꞌãwũã obʉrʉa, mʉrã tokꞌaba pera bꞌadꞌata adu-a bꞌidꞌapʉa zhãrãne edꞌa.

Ángelba jaradꞌa Jesús toita

²⁶ Elisawe bꞌiogꞌoa bꞌʉta jedꞌekꞌo seis babʉrʉdꞌera ángel Gabriel Daizezeba zokꞌasia Galilea druadꞌebema pʉwʉrʉidꞌu Nazaret abadaidꞌu.

²⁷ Zokꞌasia wũẽrã zhi aduagꞌaita bꞌʉma, José ũme zhi edaita bedꞌea panʉma, Joséra rey Davidꞌeba uruta bꞌasia. Wũẽrã zhi aduagꞌai trʉ̃rã María basia.

²⁸ Ángel izhi bꞌʉ maẽ edꞌa wãpe mawũãsia: ¡Kʉa, bʉra Daizezeba bia edabʉrʉa! Daizeze bʉ ũme bꞌʉa, bʉra bia edabʉrʉa wũẽrãrã bꞌedꞌebemata.

²⁹ Izha ũdubʉrʉdꞌera perasia mawũã jarabʉrʉba, mawũẽ krĩchasia kꞌãrẽã mawũã bedꞌeabʉrʉta.

³⁰ Mawũẽ ángelbara mawũãsia: María perarãrũã, bʉra Daizezeba bia edabʉrʉa.

³¹ Kꞌõbebʉrʉ bʉra bꞌiogꞌoape zhũmakĩrãta toya. Maʉ̃ bʉara trʉ̃ga bꞌʉdua Jesústa.

³² Izhira zhi zroma baya, izhira Ʉ̃trebema Warra adꞌaya. Daizezebara Reyta bꞌʉya David bꞌadꞌa kĩrãkꞌa, zõrã izhi uruta bꞌadꞌa kĩrãkꞌa.

³³ Jacobodꞌeba uruta bꞌe ʉ̃rʉ̃ jipa Reyta bꞌaya, mawũẽ izhita Reyta bꞌʉra jõ ẽbaya.

³⁴ Mawũãĩ Maríabara ángelea mawũãsia: ¿Sãwũã mawũãpe? Mʉrã wadꞌi zhũmakĩrã ũdukꞌawa ẽã.

³⁵ Mawũãĩ ángelbara panaʉ̃ mawũãsia: Jawurebiata bʉ ʉ̃rʉ̃ zebʉrʉba bʉra Ʉ̃trebema zareaba ãnabꞌariya, aramaʉ̃ne wũãwũã toira Daizezedꞌeba Daizeze Warra adꞌaya.

³⁶ Bʉ ʉre Elisawesidꞌa bꞌiogꞌoa bꞌʉa, tokꞌata bꞌʉa abadapeadꞌara zhõdramina zhũmakĩrãta abꞌʉta jedꞌekꞌo seis babʉrʉa.

³⁷ Kꞌãrẽ obꞌe ẽãrã ne ẽã Daizezeitara.

³⁸ Mawũãĩ Maríabara mawũãsia: Mʉrã nezokꞌa Daizezedꞌea, mʉrã izhikꞌawua mawũã oya bʉa jarabʉrʉ kĩrãkꞌa. Mobebʉrʉ ángel wãsia izhi maẽbara.

Maríaba akʉdꞌe wãna Elisawe

³⁹ Maʉ̃ ewade María ĩñabasia kꞌatumaẽna wãsia pʉwʉrʉ Judá druadꞌe tabꞌʉma.

⁴⁰ Mobe Zacaría dedꞌa deidꞌu wãpe: Kʉa asia Elisawea.

⁴¹ Maríaba: Kʉa abʉrʉta Elisaweba ũrĩbʉrʉdꞌera, izhi wũãwũã bꞌitaedꞌa pirasia, aramaʉ̃ne Elisawe birasia Jawurebiaba.

⁴² Mawũẽ nemi jĩgua mawũãsia: Bʉra Daizezeba bia edabʉrʉa wũẽrãrã bꞌedꞌebemata, bia edabʉrʉa bʉzha abꞌʉsidꞌa bꞌitaedꞌa.

⁴³ ¿Mʉtrʉ kꞌaipe kꞌãwũã mʉ Nokꞌo papaba mʉ akʉdꞌe zebʉrʉra?

⁴⁴ Bʉa: Kʉa abʉrʉta mʉã ũrĩbʉrʉdꞌera wũãwũã sobiaba pirabʉrʉa mʉ bꞌitaedꞌa.

⁴⁵ Sobiarua bʉara ĩjãbʉrʉba izha jaradꞌara aribꞌaeita Daizezebara.

⁴⁶ Maríabara mawũãsia: Mʉĩtara zhi zroma Daizezera.

⁴⁷ Mʉrã sobia bꞌʉa Daizeze mʉ Ẽdrʉbi ũme.

⁴⁸ Mʉta akʉbʉrʉa mʉ izhi nezokꞌara zhi zroma ẽãta, mawũẽ idꞌidꞌeba mʉrã sobia bꞌʉa adꞌaya zhãrã jõmaʉ̃ba.

⁴⁹ Mawũã jaradꞌaya bia zromata obʉrʉba Daizeze zhi zromaba. Izhira biata bꞌʉa.

⁵⁰ Izhara ewariza sozuburia bꞌʉa izhi wawia bꞌera.

⁵¹ Izhi zareaba kꞌãrẽ obꞌʉdꞌeba jãrãzoabisia sodꞌeba zhi zromata krĩcha bꞌera.

⁵² Ãzhi buguedꞌeba ãĩ bꞌʉkuasia zhi zromata bꞌera, mobe zhi zromata bꞌʉkuasia zhi zromarã ẽãta.

⁵³ Jarra bꞌera ne biata dedꞌekasia, waya bara bꞌera buegasia kꞌãrẽ ne ẽã.

⁵⁴ Kꞌarebasia Israel bꞌe izhi nezokꞌarãta, aramaʉ̃ne bude basia izha sozuburiaita jaradꞌata.

⁵⁵ Mawũã sozuburiaita jarasia dazhirã zhibarirã bꞌeadꞌata, Abrahamta, zhi warrarãta ewariza.

⁵⁶ María Elisawe ũme bꞌesia jedꞌekꞌo ũbea, maʉ̃ tẽã jẽrũya wãsia dedꞌaa.

Juan Burukꞌoemiã todꞌa

⁵⁷ Elisawe toi ewarita arabasidꞌera tosia zhũmakĩrãta.

⁵⁸ Maʉ̃ta ũrĩsidꞌa zhãrã izhi kꞌaita bꞌeba, dewara zhi mebẽrãba, mawũã Daizezeba kꞌãbãẽã sozuburiabʉrʉba sobiasidꞌa izhi bawara.

⁵⁹ Ewari ocho babʉrʉdꞌe zesidꞌa warra zakera kꞌakua eta kꞌõbidꞌaita. Maʉ̃ne zhi zeze trʉ̃ne trʉ̃ jara Zacaría asidꞌa.

⁶⁰ Mawũãmina zhi papaba mawũãsia: Mawũã ẽã, kꞌãʉ̃ trʉ̃ Juan baya.

⁶¹ Mawũãĩ mawũãsidꞌa: ¿Kꞌãrẽã mawũã trʉ̃gaipe? Bʉ mebẽrã miõta ne ẽã trʉ̃ mawũã bꞌʉra.

⁶² Mobebʉrʉ juwuaba widꞌisidꞌa zhi zezea, sãwũã trʉ̃ga krĩña bꞌʉta.

⁶³ Mawũẽ izhara tabla zaketa juwuaba widꞌipe bꞌʉbʉrʉta mawũãsia: Kꞌãʉ̃ trʉ̃ Juan baya. Mawũãĩ jõmaʉ̃ba bia akʉdruasidꞌa.

⁶⁴ Maʉ̃ daucha ogꞌadrʉsia izhi nemirã, enatʉsia izhi kĩrãmesidꞌa, mawũẽ bedꞌeasia Daizezeta ibia jara.

⁶⁵ Mawũẽ jõma perasidꞌa izhi kꞌaita bꞌera. Aramaʉ̃ne Judea druadꞌe kꞌatuma nʉme maẽ trʉ̃poasia maʉ̃ jõma.

⁶⁶ Zhi ũrĩbʉdabara jõmaʉ̃ba ãzhi sobitabaiba mawũãsidꞌa: ¿Kꞌãrẽ zhi zromata bꞌaipe maʉ̃ wũãwũã? Aramaʉ̃ne Daizeze zareara nʉmasia izhi ũme.

Daizeze ibia jaradꞌa Zacaríaba

⁶⁷ Wũãwũã zeze Zacaríara birasia Jawurebiaba, mawũẽ mawũãsia:

⁶⁸ Ibia jaradꞌaya Daizeze Israel bꞌedꞌera, ẽdrʉbigadꞌe zebʉrʉa izhidꞌerãta.

⁶⁹ Dazhirãĩta zhi zromata piradrʉbibʉrʉa zhãrã Ẽdrʉbita, izhi nezokꞌa rey Davidꞌeba uruta.

⁷⁰ Kꞌãwũã oita jarasia izha bedꞌeata jarabibarirã idꞌeba, maʉ̃rã nawedꞌa bꞌeadꞌadꞌeba.

⁷¹ Kꞌarebakuaya asia dazhirã jura bꞌe juwuadꞌeba, dazhirã ũduama bꞌe juwuadꞌeba.

⁷² Sozuburiaya asia dazhirã zhibarirã bꞌeadꞌara, bude baya asia izha jaradꞌa aribꞌaeita.

⁷³ Maʉ̃ta jarasia Abrahanʉã dazhirã zezea.

⁷⁴ Dazhirã jura bꞌe juwuadꞌeba izha ẽdrʉbigabʉrʉdꞌera pera ẽã izha jara bꞌʉta odꞌaya asia.

⁷⁵ Jarasia kĩrãẽpa mawũã bꞌeabiita, zhãrã bawara sãwũã bꞌeai bꞌʉdꞌe bꞌeabiita, izhi kĩrãbita mawũã bꞌeabiita dazhi ewari jõma.

⁷⁶ Warra zake bʉra Ʉ̃trebemaba bedꞌeata jarabibaria adꞌaya. Bʉra dazhi Nokꞌo nawedꞌa nʉmaña bia ẽãrã ãmabʉdaba araa obʉdakꞌamarẽã izhi zei ota.

⁷⁷ Aramaʉ̃ne bʉara ẽdrʉdꞌaidꞌebemata kꞌawuabigaya izhidꞌeta bꞌea, izhara aramaʉ̃ne bedꞌea ne ẽã bꞌʉkuaya kꞌazhiruata biodꞌeba.

⁷⁸ Daizezebara zhãrã kꞌãbãẽã sozuburia bꞌʉba dazhirã Ẽdrʉbira ʉ̃treba zebiya ʉ̃madau ʉ̃na ʉ̃tʉ zebari kĩrãkꞌa.

⁷⁹ Aramaʉ̃ne pãrĩguadꞌe bꞌeta ʉ̃nabibʉrʉra ẽdrʉdꞌaita kꞌawuabigaya aduaita beuya bꞌea, dazhira aramaʉ̃ne erunʉmaña Daizeze ũme adu-a bꞌai odꞌe.

⁸⁰ Zacaría warra zarea warisia Jawurebiaba. Izhira drua drudrua tabꞌʉ maẽ bꞌasia miã ũrãgꞌaita zhi ũdubigadꞌa ewariidꞌu Israel bꞌea.