Зебур 93 - Мукъаддес Китап

Очь алгъан Алланы чагъырув

¹ Я РАББИ, очь алыджы Алла! Очь алыджы Алла, Озь нурунъда корюн!

² Котериль, ернинъ Къадысы, кибирли адамларнынъ джезасыны бер!

³ Я РАББИ, не вакъыткъадже ярамайлар тантана этеджеклер?

⁴ Олар ярамай сёзлерни къусалар, акъсызлыкъ япкъанларнынъ эписи макътаналар,

⁵ Я РАББИ, Сенинъ халкъынъны хорлайлар, Сенинъ мирасынъны азаплайлар,

⁶ тул къадынны ве ят халкълардан олгъанларны ольдюрелер, оксюзлернинъ джаныны алалар.

⁷ «РАББИ корьмез! Якъупнынъ Алласы бильмез», – дейлер.

⁸ Эй, тентек адамлар, акъылынъызны топланъыз! Не вакъыт акъылланаджакъсыз, ахмакълар?

⁹ Къулакъны япкъан эшитмезми? Козьни яраткъан корьмезми?

¹⁰ Халкъларны низамгъа къойгъан джезаламазмы? О, адамларгъа акъыл огрете!

¹¹ РАББИ инсанларнынъ фикирлерини, оларнынъ бош олгъаныны биле.

¹² Не де бахтлыдыр, Сен оны низамгъа чеккен ве Сен онъа къанунны огреткен адам, я РАББИ!

¹³ Бойледже оны яман куньлерден сакълар, ярамай адам ичюн чукъур къазылмагъандже.

¹⁴ РАББИ Озь халкъыны ред этмез, Озь мирасыны ташлап кетмез.

¹⁵ Укюм этюв кене адалетли олур, ве эписи догъру юреклилер онынъ пешинден бараджакъ.

¹⁶ Яманлыкъ япкъан адамлар алдында ким мени къорчалар? Акъсызлыкъ япкъанларнынъ огюнде ким мени акълар?

¹⁷ Эгер РАББИ ярдымджым олмаса эди, джаным чокътан сюкюнет дюньясында ятар эди.

¹⁸ «Аягъым тайды», – дегенимде, Сенинъ буюк севгинъ мени тутып турды, я РАББИ!

¹⁹ Ичимде къайгъыларым чокъ олгъанда, Сенинъ теселлинъ юрегиме зевкъ берди.

²⁰ Олюм кетириджилернинъ тахты Сенинъ янынъда олурмы? Олар низамнамелеринен беля кетирелер!

²¹ Олар топнен инсафлы адамгъа къаршы уджюм этелер ве къабаатсыз къанны ерге тёкелер.

²² Амма РАББИ меним къалем олды, Аллам – сыгъынагъымнынъ къаясы.

²³ Оларнынъ къанунсызлыгъыны озьлерининъ башларына кетирир, озьлерининъ яманлыкъларынен оларны къырып ташлар; РАББИ олгъан Алламыз оларны къырып ташлар.