Зебур 90 - Мукъаддес Китап

Юдже Алланынъ дамы астында

¹ Юдже Алланынъ сыгъынагъында яшагъан адам Къудретли Алланынъ кольгесинде раатланыр!

² О, РАББИге айта: «О, меним сыгъынагъым ве къалем, О, меним Аллам; умютим Онда!»

³ О, сени авджы тузагъындан, ольдюриджи хасталыгъындан къуртарыр,

⁴ Озь къанатларынен сени япар, къанатлары астында хавфсыз алда олурсынъ; Онынъ акъикъаты санъа къалкъан ве къора олур!

⁵ Не гедженинъ дешетинден, не куньдюз учкъан окътан къоркъарсынъ,

⁶ не къаранлыкъта кезген вебадан, не де уйледе къыргъан юкъма хасталыгъындан.

⁷ Сенинъ янынъда бинъ адам йыкъылып, он бинъ адам онъ тарафынъда къырылса да, беля санъа якъынлашып оламаз.

⁸ Сен тек козьлеринънен бакъып, ярамайларгъа берильген джезаны кореджексинъ.

⁹ Сен: «РАББИ – сыгъынагъым», – дегенинъ, Юдже Алланы мескен деп сайлагъанынъ ичюн,

¹⁰ башынъа бирде-бир беля тюшмез, чадырынъа веба якъынлашмаз.

¹¹ О, сенинъ акъкъынъда Озь мелеклерине эмир этер, ве олар бутюн ёлларынъда сени къорчалар.

¹² Олар сени къолларында котерип кетерлер, аякъларынъ ташкъа сюрюнмез.

¹³ Арслан баласы ве зеэрли йыланларнынъ устюнден басып кечерсинъ, арслан ве аждерханы эзип ташларсынъ.

¹⁴ «Мени севгени ичюн, оны къуртараджагъым; Адымны бильгени ичюн, оны къорчалайджагъым.

¹⁵ Мени чагъыргъанда, оны эшитеджегим, къайгъылы кунюнде онен оладжагъым, оны къуртарып, шуретлейджегим.

¹⁶ Узун омюрнен оны тойдураджагъым ве онъа къуртарувымны косьтереджегим!»