Зебур 84 - Мукъаддес Китап

Исраильге мераметлик дувасы

¹ Баш чалгъыджы ичюн. Къорах огъулларынынъ зебуры.

² Я РАББИ, Сен Озь топрагъынъа мерамет косьтердинъ, Якъупны эсирликтен къайтардынъ,

³ халкъынънынъ къабаатыны багъышладынъ, бутюн гуналарыны ёкъ эттинъ! Сэла

⁴ Бутюн гъазабынъны ичинъе сакълап, янаяткъан ачувынъдан вазгечтинъ.

⁵ Эй, Алла, бизим Къуртарыджымыз, кене бизни Озюнъе къайтар, бизге къаршы афакъанынъны тындыр!

⁶ Бизге эбедиен гъазапланаджакъсынъмы? Несильден несильге гъазабынъны сачаджакъсынъмы?

⁷ Халкъынъ Сенден къувансын деп, бизни гъайрыдан джанландырмазсынъмы?

⁸ Я РАББИ, бизге севгинъни косьтер, къуртарувынъны бизге багъышла!

⁹ РАББИ олгъан Алла не айтаджагъына мен къулакъ асарым. О, Озь халкъынен ве азизлеринен барышыкъ тюзер, амма олар кене ахмакълыкъкъа къайтмасынлар.

¹⁰ Акъикъатен, Алладан къоркъкъанларгъа къуртулыш пек якъындыр, бизим топрагъымызда шурети битмесин!

¹¹ Севгинен акъикъат корюшелер, догърулыкъ ве аманлыкъ опюшелер!

¹² Акъикъат ерден чыкъар, догърулыкъ коктен бакъар,

¹³ РАББИ эйилик ёллар, ве топрагъымыз мейва берер.

¹⁴ Адалет Онынъ алдында юрер, адымларына ёлны косьтерир.