Зебур 63 - Мукъаддес Китап

Гизли душманлардан къорчалагъан дува

¹ Баш чалгъыджы ичюн. Давутнынъ зебуры.

² Эй, Алла, дува окъугъанымда, сесимни эшит, душман къоркъусындан джанымны сакъла!

³ Хиянет адамларнынъ фитнесинден, яман адамларнынъ белясындан мени къорчала!

⁴ Олар тиллерини, къылыч киби, къайрайлар, аджджы сёзлери, атыладжакъ окъ киби, азыр.

⁵ Саф юрекли адамны гизлиден беклеп, ич къоркъмайып, апансыздан онъа окъ аталар.

⁶ Олар къара ниетлеринде къатты туралар, къапкъанларыны сакъламакъ ичюн анълашып: «Ишимизни ким кореджек?» – дейлер.

⁷ Олар яманлыкъны тюшюнелер, яхшы азырлангъан ишни битирелер. Адамнынъ ичи ве юреги терен ериндедир.

⁸ Амма Алла оларгъа окъ атып, апансыздан оларны яралайджакъ.

⁹ Озь тиллеринен озьлерини ураджакълар, оларны корьгенлер эписи къачаджакъ.

¹⁰ Бутюн адамларны къоркъу басаджакъ, олар Алланынъ ишини айтып береджек, Алланынъ япкъанлары акъкъында тюшюнеджеклер.

¹¹ Инсафлылар РАББИден къуваныр ве Онъа умют багъларлар; бутюн догъру юреклилер Оны макътайджакълар!