Зебур 60 - Мукъаддес Китап

Рухкъа такъат берген дува

1 Баш чалгъыджы ичюн. Телли чалгъы алетлеринде. Давутнынъ зебуры .

¹ Баш чалгъыджы ичюн. Телли чалгъы алетлеринде. Давутнынъ зебуры.

² Эй, Алла, меним фигъанымны эшит, дувама дикъкъат эт!

³ Юрегим такъаттан кесильди, ернинъ четинден Сени чагъырам. Мен чыкъып оламагъан къаягъа мени алып чыкъ!

⁴ Сен меним сакъланмакъ ичюн ерим, душмангъа къаршы къавий бир къуллесинъ.

⁵ Сенинъ чадырынъда эбедиен яшайым, къанатларынъ кольгесинде хавфсызлыкъ тапайым. Сэла

⁶ Эй, Алла, меним адакъларымны Сен эшиттинъ, Адынъдан къоркъкъанларнынъ къысметини манъа бердинъ.

⁷ Падишанынъ куньлерине куньлер къош; онынъ омрю несильден несильге девам этсин!

⁸ О, Алланынъ огюнде эбедиен турсун, севгиге ве акъикъаткъа буюр, олар оны къорчаласын!

⁹ Мен Сенинъ Адынъа эбедиен йырлайджагъым, эр кунь адакъларымны беджереджегим!