Зебур 59 - Мукъаддес Китап

Исраильнинъ къуртулышы ичюн окъулгъан дува

¹ Баш чалгъыджы ичюн. «Шушан эдут» авасында. Давутнынъ миктамы. Огретюв ичюн.

² Давут Арам-Нахараим ве Арам-Цованен дженк эткенде, Ёав къайтып, 12 000 эдомлыны Туз вадийинде ургъаны акъкъында язылгъан йыр.

³ Эй, Алла, Сен бизлерни ташлап кеттинъ, сыраларымызны ярып къойдынъ, бизлерге гъазапландынъ. Бизге чевириль!

⁴ Сен ерни тепреттинъ, оны ярдынъ. Энди исе бозукъ ерлерини тедавийле, чюнки ер тепрене бере.

⁵ Сен Озь халкъынъа агъыр азаплар бердинъ, бизге серсемлетиджи шарапны ичирдинъ.

⁶ Сенден къоркъкъанлар огърунда Сен байракъ котердинъ, олар онынъ янына яйдан къуртулып къачсынлар! Сэла

⁷ Сенинъ севгенлеринъ къуртулсынлар! Сенинъ онъ къолунънен оларны къуртар! Джевап бер манъа!

⁸ Алла Озь азиз еринде деди: «Мен Шекемни тантана иле боледжегим, Сукъкъот вадийини ольчейджегим.

⁹ Гилад Меним, Менашше де Меним. Эфраим – башымдаки къале, Ехуда – падишалыкъ таягъым.

¹⁰ Моав – ювунгъан чанагъым; Эдом устюне чызмамнен басаджагъым. Фелестин топрагъында Мен гъалебе къазанып къычыраджагъым!»

¹¹ Ким мени пекитильген шеэрге кирсетеджек? Ким мени Эдомгъа озгъарып бараджакъ?

¹² Эй, Алла, Озюнъ бизни ташлап кетмединъми? Ордуларымызнен чыкъмайсынъ да, эй, Алла!

¹³ Белялардан бизге ярдым эт, чюнки инсаннынъ ярдымы боштыр.

¹⁴ Биз Алланен батырлыкъ япармыз, О, душманларымызны тар-мар этер!