Зебур 58 - Мукъаддес Китап

Къуртулыш дувасы

1 Баш чалгъыджы ичюн. Аль-ташхет. Давутнынъ миктамы. Шаул Давутны ольдюрмек ичюн, онынъ эвини козетмеге адам ёллагъан вакъытта язылгъан йыр .

¹ Баш чалгъыджы ичюн. Аль-ташхет. Давутнынъ миктамы. Шаул Давутны ольдюрмек ичюн, онынъ эвини козетмеге адам ёллагъан вакъытта язылгъан йыр.

² Мени душманларымдан къуртар, эй, Аллам! Манъа къаршы чыкъкъанлардан мени къорчала!

³ Къанунны бозгъанлардан мени къуртар, къан тёккен адамлардан мени къорчала.

⁴ Мына, олар сакъланып, джанымны алмагъа истейлер, кучьлюлер манъа къаршы топлашалар, мен исе джинает я да гуна япмадым, я РАББИ.

⁵ Мен къабаатсыз олсам да, манъа атылмагъа азырланалар. Манъа ярдым этмек ичюн тур да, бакъ!

⁶ Сен – Ордуларнынъ РАББИ-Таалясысынъ! Исраильнинъ Алласы, бутюн халкъларгъа джеза бермек ичюн тур, имансыз хаинлернинъ ич бирисини аджыма! Сэла

⁷ Акъшам олар къайтып, копек киби, увулдайлар, шеэрнинъ этрафыны айланып чыкъалар.

⁸ Оларнынъ агъызлары яман сёзлер айтып токътамай, дудакъларында исе къылычлар! Олар: «Ким эшитир экен?» – дейлер.

⁹ Сен исе, я РАББИ, оларнынъ устюнден куледжексинъ, бутюн халкъларны масхара этеджексинъ.

¹⁰ Къудрет – оларнынъ тарафындадыр. Мен исе Сенинъ джевабынъны беклерим; Аллам – меним сакълангъан ерим!

¹¹ Мени севген Аллам меним огюмде кете, О, манъа душманларыма къоркъусыз бакъмагъа ёл береджек.

¹² Оларны ольдюрме, ёкъса халкъым унутыр. Озь къудретинънен оларны дагъытып, оларны ашала, я Рабби, бизим Къорчалайыджымыз!

¹³ Агъызларындан чыкъкъан гуналы сёзлер ичюн, оларнынъ къаргъышлары ве яланлары ичюн, олар озь макътанчакълыгъынен тутулып къалсынлар.

¹⁴ Гъазапланып, оларны ёкъ эт, олар даа ёкъ олсун деп, ёкъ эт оларны! Олар бильсинлер: бутюн ер юзюнде Алла Якъупкъа падишалыкъ эте. Сэла

¹⁵ Акъшам олар къайтып, копек киби, увулдасынлар, шеэрнинъ этрафыны айланып чыкъсынлар.

¹⁶ Айлана-айлана аш къыдырсынлар, бутюн гедже ач олып отурсынлар.

¹⁷ Мен исе Сенинъ къудретинъ акъкъында йыр йырлайджагъым, саба эртеден Сенинъ севгинъ акъкъында къуванчнен къычыраджагъым. Сен мени къорчаладынъ, белялы кунюмде меним сакълангъан ерим эдинъ.

¹⁸ Эй, Къудретим, Санъа чалгъы чаладжагъым; Алла – меним къалем, мени севген Аллам!