Зебур 48 - Мукъаддес Китап

Зенгинликке умют багълагъан адам акъылсыздыр

¹ Баш чалгъыджы ичюн. Къорах огъулларынынъ зебуры.

² Бунъа къулакъ асынъыз, эй, бутюн халкълар! Эй, дюньяда яшагъанларнынъ эписи, буны эшитинъиз!

³ Эй, бутюн яратылгъан инсаниет, акъайларнынъ огъуллары, эм фукъаре, эм зенгин!

⁴ Агъзымдан акъыллы сёзлер чыкъаджакъ, юрегимнинъ тюшюнджелери бильги береджек.

⁵ Мен кинаели икяеге къулакъ асаджагъым, сырымны сантырнен анълатаджагъым.

⁶ Мени къувалагъанлар эр тарафтан мени сарып алгъанда, белялы куньлерде не ичюн къоркъаджагъым?

⁷ Олар озь кучюне ишанып, байлыкъларынынъ чокълугъындан къопаялар.

⁸ Ич бир адам башкъасыны къуртаралмаз, о ичюн Аллагъа бахшыш бермез.

⁹ Джан сатын алгъан фияты буюктир, адам бунъа ич иришип оламаз.

¹⁰ Ич бир адам эбедий яшамаз, эр бир инсан мезар юзюни корер.

¹¹ Эр кес коре ки, атта акъыллы адамлар да олелер, ахмакъ ве акъылсыз адамлар да гъайып олып, озь байлыгъыны башкъаларгъа къалдыралар.

¹² Олар бойле тюшюнелер: «Бизим эвлеримиз эбедийдир, яшагъан еримиз несильден несильге кечеджек». Олар яшагъан ерлерине озь адларыны берелер.

¹³ Амма адамнынъ шурети кече, о, айвангъа ошап, ёкъ олып кете.

¹⁴ Оларнынъ бу ёлу – акъылсызлыкътыр, амма оларнынъ артларындан кеткенлер оларнынъ айткъанларыны къабул этер. Сэла

¹⁵ Олар, къойлар киби, олюлер дюньясына азырлангъан, ве олюм оларнынъ чобаны оладжакъ. Сабадан исе догъру яшагъанлар оларгъа падишалыкъ этеджеклер. Оларнынъ кучьлери ирип кетеджек, олюлер дюньясы оларнынъ эви оладжакъ.

¹⁶ Амма Алла меним джанымны олюлер дюньясындан къуртараджакъ. О, мытлакъа мени къабул этеджек. Сэла

¹⁷ Бириси зенгинлешкенде, я да онынъ эвининъ шурети чокълашкъанда, къоркъма.

¹⁸ О ольгенде, озюнен ич бир шейни алып оламаз, онынъ шурети онынъ артындан бармаз.

¹⁹ Адам яшагъанда, озь джанына яхшы шейлер бере. Эгер озюнъе яхшылыкъ япсанъ, адамлар сени макътар.

²⁰ Амма бойле адам озь бабаларына къошулыр, оларнен берабер ярыкъны ич бир вакъыт корьмез.

²¹ Сайгъылы, лякин акъылдан эксик адам айванларгъа ошап, ёкъ олып кетер.