Зебур 36 - Мукъаддес Китап

Инсафлыгъа одеме Алеф

Давутнынъ зебуры .
Алеф

¹ Яманлыкъ япкъанлар ичюн къасевет этме, къанунны бозгъанларгъа сукъланма!

² Олар, от киби, тезден чалынаджакъ, ешиль осюмлик киби, солып кетеджеклер.

Беит

Беит

³ РАББИге ишанып, яхшылыкъ яп, ер юзюнде яшап, акъикъатны тут.

⁴ РАББИден зевкъ ал, ве О, санъа юрегинънинъ истеклерини берер.

Гимел

Гимел

⁵ Ёлунъны РАББИнинъ тарафына чевир, Онъа ишан, ве О, арекет этеджек.

⁶ О, сенинъ акъикъатынъны, ярыкъ киби, парылдатыр, догърулыгъынъны, уйле ярыгъы киби, япар.

Далет

Далет

⁷ РАББИнинъ огюнде индемейип отур, Онынъ джевабыны сабырнен бекле. Яманлыкъ япкъанлар ичюн къасевет этме.

Хе

Хе

⁸ Ачувынъны токътат, гъазабынъны ятыштыр, тарсыкъма – бу шей тек белягъа алып бара.

⁹ Яманлыкъ япкъанлар къырылып ташланаджакъ, РАББИден джевап беклегенлер исе ер юзюнинъ саиплери оладжакълар.

Вав

Вав

¹⁰ Бираздан сонъ ярамай адамлар ёкъ оладжакъ, онынъ ерине бакъсанъ, анда ич кимсе ёкъ.

¹¹ Алчакъгонъюллилер исе ер юзюнинъ саиплери оладжакъ, олар аманлыкънынъ чокълугъынен зевкъ сюреджеклер.

Зайин

Зайин

¹² Ярамай адам инсафлыгъа яманлыкъ тилей, онъа къаршы тишлерини гъыджырдата.

¹³ РАББИ исе онынъ устюнден куле, онынъ куню биткенини коре.

Хет

Хет

¹⁴ Фукъарени ве факъырны ерге урмакъ ичюн, догъру ёлдан юргенлерни ольдюрмек ичюн, ярамай адамлар къылычыны чыкъара да, яйларыны тарталар.

¹⁵ Амма къылычлары озьлерининъ юрегине сапланаджакъ, яйлары исе сындырылып парчаланаджакълар.

Тет

Тет

¹⁶ Инсафлынынъ къолундаки аз шей чокъ инсафсызнынъ зенгинлигинден яхшыдыр,

¹⁷ чюнки инсафсызнынъ къудрети сындырылып кетеджек, инсафлыларгъа исе РАББИ кучь береджек.

Ёд

Ёд

¹⁸ РАББИ къабаатсызларнынъ куньлерини биле; оларнынъ мирасы эбедиен оладжакъ.

¹⁹ Агъыр заманда олар масхара олмаз, ачлыкъ куньлеринде де ашап тояджакълар.

Каф

Каф

²⁰ Амма ярамайлар гъайып оладжакъ, РАББИнинъ душманлары исе, къой ягъы киби, тютюн ичинде ирип кетеджек.

Ламет

Ламет

²¹ Инсафсыз борджкъа алып, оны къайтармай, инсафлы исе мерамет эте де, бере.

²² Алла Озю О, разы олгъан адамларгъа ер юзюни малы-мулькю киби береджек. О, къаргъагъан адамлар исе къырылып ташланаджакълар.

Мим

Мим

²³ РАББИ адамнынъ адымларыны догъурта, ве О, онынъ ёлундан разы олур.

²⁴ Шу адам йыкъылгъанда биле, ерге тюшмез, чюнки РАББИ онынъ къолуны тута.

Нун

Нун

²⁵ Мен яш эдим, энди къартайдым, амма инсафлыны ташлап кеткенлерини, я да онынъ сою отьмек тилегенини ич корьмедим.

²⁶ Куньден-кунь о, мерамет эте ве борджкъа бере, онынъ сою да адамларнынъ бахшышы олур.

Самек

Самек

²⁷ Яманлыкътан баш тартып, яхшылыкъ яп, о вакъыт эбедий яшайджакъсынъ.

²⁸ РАББИ догърулыкъны севе, О, Озь азизлерини ташлап кетмез. Олар эбедий къорчаланаджакълар, инсафсызларнынъ эвлятлары исе къырыладжакълар.

Айин

Айин

²⁹ Инсафлылар ер юзюнинъ саиплери олып, анда эбедиен яшайджакъ.

Пе

Пе

³⁰ Инсафлынынъ агъзындан икмет чыкъа, тили исе акъикъатны бильдире.

³¹ Алласынынъ Къануны онынъ юрегинде, онынъ аякълары ич сарсылмаз.

Саде

Саде

³² Ярамай адамлар инсафлынынъ артындан бакъа, оны ольдюрмек ичюн чаре къыдыра.

³³ Лякин РАББИ инсафлыны оларнынъ къолуна бермез, суд вакътында оны къабаатламагъа ёл бермез.

Коф

Коф

³⁴ РАББИден джевап бекле, Онынъ ёлуны тут. Сени ер юзюнинъ саиби япмакъ ичюн, РАББИ сени юксельтеджек. Ярамайлар къырылгъан заманны сен озюнъ кореджексинъ.

Реш

Реш

³⁵ Амансыз ярамай адамны корьдим: чокъ пытакълы ешиль терек киби, онынъ тесири артты.

³⁶ Амма о, кечип кетти, ёкъ олды, оны къыдырсам да, тапмайым.

Шин

Шин

³⁷ Саф юреклиге козь ташла, догъру яшагъан адамгъа бакъ! Бойле адамнынъ келеджеги – аманлыкъ.

³⁸ Амма Къанунны бозгъанлар эписи ёкъ этиледжек, ярамайларнынъ келеджеги кесиледжек.

Тав

Тав

³⁹ Инсафлыларнынъ къуртулышы РАББИден келир, къайгъы заманында О, Озю оларгъа къале олур.

⁴⁰ РАББИ оларгъа ярдым этер, оларны къорчалар, ярамайларнынъ къолундан оларны сакълар. Олар РАББИге сыгъынгъанлары ичюн, О, оларны къуртарыр.