Зебур 30 - Мукъаддес Китап

Аллагъа умют дувасы

¹ Баш чалгъыджы ичюн. Давутнынъ зебуры.

² Я РАББИ, Санъа умют багъладым, мен ич бир вакъыт утанмайым! Озь догърулыгъынъда къуртар мени!

³ Манъа къулакъ ас, тез-тез къуртар мени! Меним таянаджакъ къаям, мени къуртараджакъ сыгъынакъ эви ол!

⁴ Меним къаям ве сакълангъан ерим – Сенсинъ; Озь Адынъ ичюн мени етеклеп, манъа ёл косьтер!

⁵ Мен ичюн япылгъан гизли тузакътан чыкъар мени, чюнки сакълангъан ерим – Сенсинъ.

⁶ Рухумны Сенинъ къолунъа берем. Сен мени сатын алдынъ, я РАББИ, эй, акъикъий Алла!

⁷ Бош путларгъа ибадет эткенлерни кореджек козюм ёкъ, мен тек РАББИге ишанам.

⁸ Сенинъ буюк севгинъ ичюн мен къуванчнен къычырып севинеджегим, чюнки Сен ярамай алымны корьдинъ, джаным азап чеккенини бильдинъ.

⁹ Сен мени душманымнынъ къолуна бермединъ, аякъларымны къатты ерге къойдынъ.

¹⁰ Я РАББИ, манъа мерамет эт. Мен сыкъылып къалдым, къайгъыдан козьлерим коралмай, джаным ве беденим де такъаттан кесильди.

¹¹ Мына, аятым къасеветтен азды, омюр йылларым агълай-агълай кечип кетти. Гуналарымдан такъаттан кесильдим, кемиклерим де къуруды.

¹² Душманларым чокъ олгъаны ичюн, адамлар мени масхара этелер, къомшуларым манъа къыйыш бакъа, танышларыма да къоркъу сачам. Мени сокъакъларда корьгенлер менден къача.

¹³ Адамларнынъ юреклери мени, олюни киби, унуттылар; мен парчалангъан савуткъа ошап къалдым.

¹⁴ Чокъ адамнынъ яман сёзлерини эшитем; мына, къоркъу эр ерни басты, олар манъа къаршы анълашалар, джанымны алмагъа ниетленелер.

¹⁵ Мен исе Санъа ишанам, я РАББИ! «Сенсинъ меним Аллам», – дейим.

¹⁶ Эр бир кунюм Сенинъ къолунъда; душманларымнынъ ве мени къувалагъаннынъ къолларындан къуртар мени, я РАББИ!

¹⁷ Юзюнънинъ нуру къулунъны ярыкълатсын; Сенинъ буюк севгинъде мени къуртар!

¹⁸ Я РАББИ, Сени чагъыргъаныма утанмайым. Ярамайлар исе масхара олсун, олюлер дюньясында оларнынъ сеслери кесильсин.

¹⁹ Яланджыларнынъ тили тутулсын; олар утанмайып, инсафлыны акъаретлей, макътанып, юкъарыдан бакъалар.

²⁰ Сенден къоркъкъан адамлар ичюн Сен не къадар чокъ яхшылыкълар азырладынъ! Инсан огъулларынынъ козю огюнде Сен оларны Санъа ишангъанлар ичюн сакъладынъ!

²¹ Сен Санъа ишангъанларны янынъда сакълап, инсанларнынъ фитнесинден оларны къорчалайсынъ. Адамларнынъ яман тиллеринден гизли ерде оларны сакълайсынъ.

²² РАББИге шукюрлер олсун! Пекитильген шеэрде О, манъа аджайип севгисини косьтерди!

²³ Къасевет ичинде: «Козюнъден джоюлдым», – дедим. Амма Сенден ярдым истедим, ве Сен ялваргъан сесимни эшиттинъ.

²⁴ РАББИни севинъиз, Онынъ бутюн азизлери! РАББИ ишанчлы адамларны къорчалай, озьлерини юксек туткъанларгъа исе арткъачнен акъларыны бере.

²⁵ Эй, РАББИге ишангъанларнынъ эписи! Къуветли олунъыз, юреклеринъиз къавий олсунлар!