Зебур 142 - Мукъаддес Китап

Мерамет дувасы

Давутнынъ зебуры.

¹ Я РАББИ, дувамны эшит, ялварувыма къулакъ ас, акъикъатынъ ве адалетинъ иле манъа джевап бер!

² Къулунънен давагъа кирме, чюнки яшагъанлардан ич бириси Сенинъ алдынъда акъланмаз.

³ Душман джанымны къувалай, аятымны аякъ астына къойды, чокътан ольгенлерни киби, мени къаранлыкъта яшамагъа меджбур этти.

⁴ Меним тенимде гонъюль такъаттан кесильди, ичимдеки юрегим къатып къалды.

⁵ Къадимий куньлерни хатырлайым, бутюн ишлеринъ акъкъында тюшюнем, къолларынънынъ ишлери акъкъында ойлайым.

⁶ Къолларымны Сенинъ тарафынъа узатам, джаным, къуругъан ер киби, Санъа ынтыла. Сэла

⁷ Я РАББИ, мени тездже эшит, рухум такъаттан кесильди. Юзюнъни менден сакълама, ёкъса мен мезаргъа киргенлер киби олурым.

⁸ Саба эрте буюк севгинъ акъкъында эшитейим, чюнки Санъа ишандым. Бараджакъ ёлумны манъа косьтер, чюнки джаным Санъа ынтыла.

⁹ Душманларымдан къуртар мени, я РАББИ, чюнки мен Сенинъ алдынъа чаптым.

¹⁰ Ираденъни беджермеге мени огрет, чюнки Сенсинъ меним Аллам! Сенинъ хайырлы Рухунъ мени догъру топракъкъа алып барсын.

¹¹ Я РАББИ, Озь Адынъ ичюн тирильт мени, догърулыгъынъда джанымны белядан къуртар!

¹² Буюк севгинъ иле душманларымнынъ агъзыны къапат, джаныма зулум эткенлернинъ эписини ёкъ эт, чюнки мен Сенинъ къулунъ олам!